តុលាការកំពូលអង់គ្លេសតម្រូវអោយនាយករដ្ឋមន្ត្រីសុំការអនុញ្ញាតពីសភា មុនធ្វើនិតិវិធីBrexit
មុននឹងចាប់ផ្តើមនីតិវិធីចរចាដកខ្លួនចេញពីសហភាពអឺរ៉ុប ស្របតាមមាត្រា៥០នៃសន្ធិសញ្ញាក្រុងលីស្បូន រដ្ឋាភិបាលអង់គ្លេសត្រូវតែសុំការអនុញ្ញាតពីសភាជាមុនសិន។ នេះជាសេចក្តីសម្រេចរបស់តុលាការកំពូលអង់គ្លេស នៅថ្ងៃអង្គារនេះ។ ប៉ុន្តែ រដ្ឋាភិបាលមិនចាំបាច់មានការយល់ព្រមពីសភាតំបន់អេកូស រឺអៀឡង់ខាងជើងទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៦
ថ្ងៃអង្គារនេះ តុលាការកំពូលអង់គ្លេសបានចេញសេចក្តីសម្រេចអោយនាយករដ្ឋមន្ត្រីថេរេសា មៃ ទទួលការអនុញ្ញាតពីសភាជាមុនសិន មិននឹងចាប់ផ្តើមនីតិវីធីចរចាដកអង់គ្លេសចេញពីសហភាពអឺរ៉ុប។ តុលាការបានសម្រេចបដិសេធបណ្តឹងរបស់នាយករដ្ឋមន្ត្រី ដែលចង់ធ្វើនីតិវិធីនេះ អោយបានក្នុងខែមិនា ឆ្នាំ២០១៧នេះ ដោយមិនចាំបាច់ឆ្លងកាត់សភា។ កាលពីខែវិច្ឆិកា ឆ្នាំមុននេះ តុលាការជាន់ខ្ពស់ទីក្រុងឡុងដ៍បានសម្រេចរួចមកហើយដែរថា លោកស្រីមៃ ត្រូវសួរយោបល់ពីសភាដាច់ខាត មុននឹងធ្វើនីតិវិធី ស្របតាមមាត្រា៥០នៃសន្ធិសញ្ញាក្រុងលីស្បូន។
ការសម្រេចចិត្តរបស់តុលាការកំពូលអង់គ្លេសថ្ងៃនេះ បានបន្ធូរលក្ខខណ្ឌខ្លះ ដោយមិនតម្រូវអោយរដ្ឋាភិបាលមានការយល់ព្រមពីសភាតំបន់អេកូស និងអៀឡង់ខាងជើងទេ ប្រហែលដើម្បីកុំអោយយឺតយ៉ាវពេលវេលាការងារ។ ការសម្រេចចិត្តរបស់តុលាការកំពូលអង់គ្លេស ត្រូវបានគេមើលឃើញថា អាចអោយនាយករដ្ឋមន្ត្រីបន្ធូរជំហរតឹងតែងបានខ្លះ ទាក់ទងនឹងការចរចាដកខ្លួនពីអឺរ៉ុប។
ទោះនាយករដ្ឋមន្ត្រីតេរេសា មៃ គ្មានសម្លេងច្រើនក្នុងសភា ប៉ុន្តែ គាត់ប្រហែលមិនពិបាកនឹងទទួលបានការអនុញ្ញាតពីសភាទេ។ បក្សប្រឆាំងឡាបួ បានសន្យាមិនបង្អាក់រដ្ឋាភិបាលទេ។ ទោះយ៉ាងនេះក្តី ប្រធានបក្សឡាបួ បានលើកឡើង កាលពីថ្ងៃអាទិត្យថា នឹងដាក់វិសោធនកម្មក្នុងទិសដៅចៀសវាងកុំអោយអង់គ្លេសក្លាយជាប្រទេសជ្រកកោនផ្នែកពន្ធ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ