គណបក្សសង្គ្រោះជាតិនឹងធ្វើពហិការកិច្ចប្រជុំរដ្ឋសភាព្រឹកថ្ងៃអង្គារ
អ្នកតំណាងរាស្ត្រ ទាំងអស់របស់គណបក្សសង្គ្រោះជាតិនឹងមិនចូលរួមប្រជុំរដ្ឋសភាជា វិសមញ្ញទេនៅព្រឹកថ្ងៃអង្គារទី៣១មករាស្អែកនេះ ដោយគណបក្សប្រឆាំងមួយនេះយល់ថា របៀបវារៈផ្ទុយនឹងឆន្ទៈរបស់ពួកគេចង់បាន។ កិច្ចប្រជុំសភាពេញអង្គនៅថ្ងៃអង្គារគឺផ្តោតទៅលើវិសោធនកម្ម បទបញ្ជាផ្ទៃក្នុងរដ្ឋសភា ប្រការ៤៨ថ្មី(បី)ត្រលប់ទៅយកខ្លឹមសារប្រការ៤៨ថ្មី(ពីរ) វិញ ដែលធ្វើឲ្យមានការបាត់បង់តួនាទីប្រធានក្រុមភាគតិចនិងប្រធានក្រុម ភាគច្រើននៅក្នុងរដ្ឋសភា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៣
តាមរយៈការជូនដំណឹងរបស់គណបក្សសង្គ្រោះជាតិនៅល្ងាចថ្ងៃចន្ទនេះ ដែលថាគណបក្សមួយនេះនឹងរៀបចំធ្វើសន្និសីទសារព័ត៌មាននៅព្រឹកថ្ងៃអង្គារវេលាម៉ោង៩នៅទីស្នាក់ការកណ្តាលគណបក្សរាជធានីភ្នំពេញ មានន័យថាអ្នកតំណាងរាស្ត្រទាំង៥៥រូបរបស់គណបក្សប្រឆាំងនឹងមិនចូលរួមក្នុងកិច្ចប្រជុំរដ្ឋសភាពេញអង្គជាវិសាមញ្ញទេ នាព្រឹកថ្ងៃដដែល។
លោក កែវ ភិរម្យ អ្នកតំណាងរាស្ត្រមណ្ឌលខេត្តក្រចេះ និងជាអគ្គលេខាធិការរងគណបក្សសង្គ្រោះជាតិថ្លែងប្រាប់វិទ្យុបារាំង RFI ថា លោកស៊ុន ឆ័យ អភិបាលក្រុមសមាជិកសភាគណបក្សសង្គ្រោះជាតិនឹងធ្វើសន្និសីទកាសែតមួយ ដែលបញ្ជាក់ពីជំហររបស់គណបក្សមិនចូលប្រជុំសភានៅព្រឹកថ្ងៃទី៣១មករា។ តាមលោក កែវ ភិរម្យ ប្រធានបទចំនួន២នឹងត្រូវលើកឡើងដោយលោក សុន ឆ័យ នៅចំពោះមុខអ្នកកាសែត ក្នុងនោះមានទី១ ទាក់ទងទៅនឹងវិសោធនកម្មមាត្រា៤៨ថ្មី(បី) ហើយទី២ នឹងមានការលើកឡើងពីសកម្មភាពរបស់អ្នកតំណាងរាស្ត្រគណបក្សសង្គ្រោះជាតិរយៈពេល ប៉ុន្មានខែចុងក្រោយនេះ។
ទោះយ៉ាងណា អ្នកនាំពាក្យគណបក្សប្រជាជនកម្ពុជាលោក សុខ ឥសាន មិនបានបង្ហាញនូវកង្វល់អ្វីទេជុំវិញពហិការរបស់តំណាងរាស្ត្រគណបក្សប្រឆាំង។ លោកលើកឡើងថាអវត្តមានរបស់អ្នកតំណាងរាស្ត្របក្សប្រឆាំងបង្ហាញពីការទទួលខុសត្រូវចំពោះមុខប្រជាពលរដ្ឋ ក្នុងនាមជាអ្នកតំណាង និងម្យ៉ាងទៀតដំណើរការនីតិវិធីនៃកិច្ចប្រជុំសភានឹងប្រព្រឹត្តិទៅដោយរលូនតាមយន្តការ៥០ភាគរយបូក១ ស្របតាមរដ្ឋធម្មនុញ្ញ។ សម្លេង៥០ភាគរយបូក១ គឺត្រូវការតែ៦៣រូបប៉ុណ្ណោះ ក្នុងចំណោមសមាជិកសភាគណបក្សប្រជាជនសរុបចំនួន៦៨រូប។
កាលពីថ្ងៃទី២៦ខែមករា កន្លងទៅនេះ គណៈកម្មការអចិន្ត្រៃយ៍រដ្ឋសភាក្រោមការដឹកនាំរបស់លោកហេង សំរិន ប្រធានរដ្ឋសភា បានអនុម័តយល់ព្រមលើសំណើរសុំកោះប្រជុំរដ្ឋសភាជាវិសាមញ្ញ ដើម្បីពិនិត្យនិងអនុម័តសេចក្តីស្នើវិសោធនកម្មជំពូកទី១២ថ្មី ប្រការ៤៨ថ្មី(បី) នៃបទបញ្ជាផ្ទៃក្នុងរដ្ឋសភា។ ភា្លមៗនោះដែរ មន្ត្រីជាន់ខ្ពស់គណបក្សសង្គ្រោះជាតិ លោក ហូ វ៉ាន់ បានប្រាប់អ្នកកាសែតថា តំណាងរាស្ត្រគណបក្សសង្គ្រោះជាតិទាំងអស់ពិបាកនឹងចូលរួមណាស់ ដោយហេតុថា ជាសកម្មភាពផ្ទុយនឹងការទាមទាររបស់ខ្លួន ដែលចង់រក្សាទុកប្រការ៤៨ថ្មី(បី) ប្រៀបបាននឹងរក្សាវប្បធម៌សន្ទនាឲ្យនៅគង់វង្សដូច្នោះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ