អង្គការលើកលែងទោសអន្តរជាតិធ្វើយុទ្ធនាការឲ្យដោះលែង លោក កឹម សុខា
អង្គការលើកលែងទោសអន្តរជាតិ( Amnesty International) ចាប់ផ្តើមធ្វើយុទ្ធនាការទាមទារឲ្យដោះលែងលោក កឹម សុខា និងអំពាវនាវឲ្យមានសកម្មភាពជាបន្ទាន់ចំពោះករណីចាប់ឃុំខ្លួនប្រធានអតីតគណបក្សសង្រ្គោះជាតិរូបនេះ។ នេះបើតាមសេចក្តីប្រកាសព័ត៌មាន ចេញថ្ងៃទី២១ធ្នូ។ ជាកត់សម្គាល់ យុទ្ធនាការនេះកើតឡើងស្របពេលដែលក្រុមការងាររបស់អង្គការសហប្រជាជាតិទទួលបន្ទុកការឃុំខ្លួនបែបបំពានកំពុងពិនិត្យមើលបណ្តឹងរបស់កញ្ញាកឹម មនោវិទ្យាដែលស្នើឲ្យចុះមកស៊ើបអង្កេតករណីឃុំខ្លួនឪពុករបស់នាង។
ចុះផ្សាយនៅថ្ងៃ៖
ដោយ អ៊ឹង ប៊ុនថន
អង្គការដែលមានមូលដ្ឋាននៅទីក្រុងឡុងដ៍ ប្រទេសអង់គ្លេសមួយនេះ បានបើកឲ្យមានការសរសេរលិខិតជាភាសារខ្មែរ អង់គ្លេស ឬក៏ភាសារដទៃទៀត (សំរាប់ជនបរទេស) ដោយទាមទារ ឲ្យអាជ្ញាធរកម្ពុជាដោះលែងលោកកឹម សុខា និងទម្លាក់ចោលការចោទប្រកាន់លើរូបលោក។លើសពីនេះទៀត យុទ្ធនាការនេះក៏បានទាមទារផងដែរ ឲ្យលោក កឹម សុខា បានជួបមេធាវី និងក្រុមគ្រួសារហើយទទួលបានការថែទាំសុខាភាពដោយឥតមានការរិតបន្តឹងក្នុងអំឡុងពេលដែលលោកជាប់ឃុំ។
ក្រៅពីនោះយុទ្ធនាការរបស់អង្គការលើកលែងទោសអន្តរជាតិមួយនេះ ក៏ទាមទារឲ្យសកម្មជននយោបាយទាំងអស់អាចធ្វើសកម្មភាពក្នុងការបញ្ចេញមតិនិងជួបជុំគ្នាដោយគ្មានការភ័យខ្លាចពីការចាប់ខ្លួនឬការរំខានណាមួយ។
សូមបញ្ជាក់ថា យុទ្ធនាការទាមទារឲ្យដោះលែង លោក កឹម សុខា នេះធ្វើឡើងស្របពេលគ្នាដែលកញ្ញា កឹម មនោវិទ្យា បានថ្លែងកាលពីថ្ងៃសុក្រថា ក្រុមការងាររបស់អង្គការសហប្រជាជាតិ (អ.ស.) ទទួលបន្ទុកការឃុំខ្លួនបែបបំពាន បានទទួលពាក្យបណ្តឹងពីក្រុមមេធាវីរបស់នាងដែលសុំឲ្យភ្នាក់ងារអង្គការសហប្រជាជាតិ(UN)ចុះមកស៊ើបអង្កេតការឃុំខ្លួនលោក កឹម សុខា។ បើតាមកញ្ញា កឹម មនោវិទ្យា វិធានការបន្តបន្ទាប់គឺគេនឹងទាក់ទងទៅអាជ្ញាធរកម្ពុជា ដើម្បីស៊ើបសួររឿងនេះ ហើយបើចាំបាច់គេនឹងចុះទៅធ្វើការស៊ើបអង្កេតដល់ប្រទេសកម្ពុជាតែម្ដង។
សម្រាប់លោក សុខ ឥសាន អ្នកនាំពាក្យគណបក្សកាន់អំណាច ចាត់ទុកយុទ្ធនាការរបស់អង្គការលើកលែងអន្តរជាតិ និងបណ្តឹងរបស់កូនស្រី លោក កឹម សុខា ទៅកាន់អង្គការសហប្រជាជាតិសុំចុះមកស៊ើបអង្កេតករណីឃុំខ្លួនឳពុករបស់នាងថាជាសិទ្ធិរបស់ពួកគេ។ប៉ុន្តែលោក សុខ ឥសាន អះអាងថាយុទ្ធនាការនេះមិនមានឥទ្ធិពលលើចំណាត់របស់តុលាការកម្ពុជាដែលធ្វើទៅតាមច្បាប់របស់ខ្លួននោះទេ។
គួរំលឹកថាលោក កឹម សុខា ត្រូវបានសមត្ថកិច្ចឆ្មក់ចូលចាប់ខ្លួនទាំងកណ្តាលអធ្រាត្រយប់ថ្ងៃទី៣ខែកញ្ញាឆ្នាំ២០១៧ ដោយមានកម្លាំងប៉ូលីសប្រហែល១០០នាក់ និងកងអង្គរក្សរបស់លោក ហ៊ុន សែន ៨នាក់ផងដែរ។នេះបើតាមការកត់សម្គាល់របស់អង្គការAmnesty International។ ក្រោយការចាប់ខ្លួន អាជ្ញាធរខ្មែរក៏បានបញ្ជូនលោកទៅឃុំនៅក្នុងពន្ធនាគារត្រពាំងផ្លុងក្នុងខេត្តត្បូងឃ្មុំ ដោយចោទប្រកាន់ពីបទឃុបឃិតជាមួយបរទេសដើម្បីផ្តួលរំលំរដ្ឋាភិបាលកម្ពុជាឬហៅថាបទក្បត់ជាតិ ដោយយោងលើវីដេអូមួយដែលលោកបានថ្លែងនៅក្រៅប្រទេសតាំងពី៥ឆ្នាំមុន។ប៉ុន្តែលោក កឹម សុខា ធ្លាប់បានបកស្រាយតាមរយៈមេធាវីរបស់លោកថា វីដេអូនោះត្រូវបានគេកាត់ជាកង់ៗ ដែលខុសពីខ្លឹមសារដើមដែលលោកបាននិយាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ