អ្នកជំនាញ មិនទាន់មើលឃើញថាទឹកជំនន់បង្កផលប៉ះពាល់ដល់កំណើនសេដ្ឋកិច្ចទេ
ទោះបីជាទឹកជំនន់បានបង្កជាផលប៉ះពាល់ដល់ហេដ្ឋារចនាសម្ព័ន្ធ បំផ្លាញដំណាំកសិកម្មនិងធ្វើឲ្យការប្រកបមុខរបរអាជីវកម្មមួយចំនួនរាំងស្ទះក៏ដោយ ក៏អ្នកជំនាញសេដ្ឋកិច្ចមិនទាន់មើលឃើញថា វាអាចបង្កផលប៉ះពាល់ដល់កំណើនសេដ្ឋកិច្ចកម្ពុជាក្នុងឆ្នាំ២០១៣នេះនៅឡើយទេ។ ធនាគារអភិវឌ្ឍន៍អាស៊ី និងធនាគារពិភពលោកបានព្យាករណ៍កំណើនសេដ្ឋកិច្ចកម្ពុជាជុំវិញ៧ភាគរយក្នុងឆ្នាំ ២០១៣នេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
ទឹកជំនន់ឆ្នាំ ២០១៣នេះ បានសម្លាប់មនុស្ស ១៦៨ នាក់ ប៉ះពាល់ដល់ប្រជាជនជាង ២លាននាក់ និងប៉ះពាល់ដល់ដំណាំស្រូវជាង ៣០ម៉ឺនហិកតា។ គ្រោះទឹកជំនន់នេះក៏បានបំផ្លាញហេដ្ឋារចនាសម្ព័ន្ធជាច្រើនទៀតដែលសរុបជាទឹកប្រាក់រាប់រយលានដុល្លារ។ នេះបើតាមតួលេខបណ្តោះអាសន្នផ្តល់ដោយគណៈកម្មាធិការជាតិគ្រប់គ្រងគ្រោះមហន្តរាយ។ ប៉ុន្តែ វាមិនទាន់បានធ្វើឲ្យប៉ះពាល់ដល់កំណើនសេដ្ឋកិច្ចនៅឡើយទេ។
នាយកធនាគារអភិវឌ្ឍន៍អាស៊ី(ADB) ប្រចាំប្រទេសកម្ពុជា លោក Eric Sidgwick បានប្រាប់ឲ្យដឹងនៅក្នុងសន្និសីទសារព័ត៌មានកាលពីថ្ងៃព្រហស្បតិ៍ថា ការខូចខាតដែលបណ្ដាលមកពីគ្រោះទឹកជំនន់ក្នុងឆ្នាំ២០១៣នេះ មានផលពាល់តិចតួចប៉ុណ្ណោះមកលើសេដ្ឋកិច្ចកម្ពុជា។
លោកបញ្ជាក់ថា ការខូចខាតនេះគ្រាន់តែមានក្នុងរយៈពេលបណ្ដោះអាសន្នដែលធ្វើឲ្យកំណើនសេដ្ឋកិច្ចកម្ពុជានៅតែមានសញ្ញាវិជ្ជមានដដែល។
កាលពី ឆ្នាំ២០១១ គ្រោះទឹកជំនន់មានសភាពធ្ងន់ធ្ងរជាងឆ្នាំនេះទៅទៀត តែវាគ្មានឥទ្ធិពលខ្លាំងទៅលើកំណើនសេដ្ឋកិច្ចកម្ពុជានោះទេ។ យ៉ាងណាក៏ដោយ អ្នកជំនាញរបស់ ADB ព្រមានថា ការព្យាករណ៍កំណើនសេដ្ឋកិច្ចកម្ពុជាឆ្នាំ ២០១៣ នេះអាចនឹងត្រូវកែតម្រូវខ្លះប្រសិនបើគេរកឃើញថា ក្នុងរយៈពេលយូរខាងមុខនេះ ការខូចខាតដោយទឹកជំនន់អាចមានសភាពធ្ងន់ធ្ងរនោះ។
គួរបញ្ជាក់ផងដែរថា ធនាគារអភិវឌ្ឍន៍អាស៊ីបានព្យាករណ៍ថា កំណើនសេដ្ឋកិច្ចរបស់ប្រទេសកម្ពុជា មានកំណើនក្នុងអត្រា ៧,២ ភាគរយ នៅក្នុងឆ្នាំ ២០១៣នេះ ហើយកំណើននេះនឹងឡើងដល់ ៧,៥ ភាគរយក្នុងឆ្នាំ ២០១៤។ មូលដ្ឋាននៃការព្យាករណ៍នេះ ត្រូវបានគេពន្យល់ថា មកពីសសរទ្រូងសេដ្ឋកិច្ចទាំង៤របស់កម្ពុជាគឺវិស័យកាត់ដេរ ទេសចរណ៍ កសិកម្ម និងសំណង់សុទ្ធតែមានសន្ទុះកើនឡើងគួរឲ្យកត់សម្គាល់។
ដោយឈរលើមូលដ្ឋាននេះដែរ ធនាគារពិភពលោកក៏បានព្យាករណ៍ស្រដៀងគ្នានេះដែរពោលគឺ ក្នុងឆ្នាំ ២០១៣ នេះ ប្រទេសកម្ពុជានឹងទទួលបានកំណើនសេដ្ឋកិច្ចក្នុងអត្រា ៧ភាគរយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ