កិច្ចប្រជុំ ICC នឹងត្រូវបញ្ចប់នៅល្ងាចថ្ងៃនេះបន្ទាប់ពីចាប់ផ្តើមកាលពីថ្ងៃពុធម្សិលមិញ
កិច្ចប្រជុំ ICC បានឈានចូលដល់ថ្ងៃបញ្ចប់ហើយនៅថ្ងៃទី០៥ មិថុនានេះ ដោយប្រធានបទជាច្រើនត្រូវបានពិភាក្សាសម្រេចប្រកបដោយភាពវិជ្ជមាន។ នៅសល់តែប្រធានបទចំនួន ៤ទៀតប៉ុណ្ណោះ ដែលត្រូវដាក់ឲ្យជជែកគ្នា បន្ទាប់មកគណៈកម្មការ ICC នឹងចេញជាអនុសាសន៍ និងសេចក្តីប្រកាសរួមផងដែរ។
ចុះផ្សាយនៅថ្ងៃ៖
ស្តាប់ - ០២:០៦
កិច្ចប្រជុំ គណៈកម្មការអន្តរជាតិសម្របសម្រួលកិច្ចគាំពារនិងអភិវឌ្ឍន៍តំបន់អង្គរហៅកាត់ថា ICC អង្គរ លើកទី២៣ បានបន្តធ្វើនៅថ្ងៃព្រហស្បតិ៍ទី០៥មិថុនានេះជាបន្តទៀត នៅខេត្តសៀមរាប ដែលជាថ្ងៃបញ្ចប់កិច្ចប្រជុំដ៏សំខាន់នេះផងដែរ។
លោក អ៊ឹម សុរិទ្ធី អ្នកនាំពាក្យអាជ្ញាធរអប្សរា បានថ្លែងប្រាប់វិទ្យុបារាំងអន្តរជាតិ RFI ថាដំណើរការប្រជុំពីប្រធានបទមួយទៅប្រធានបទមួយបានប្រព្រឹត្តិទៅយ៉ាងរលូន។ ហើយនៅរសៀលនេះ គណៈកម្មការ ICC នឹងបញ្ចប់ប្រធានបទសំខាន់ចំនួន៤ទៀត ក្នុងនោះមានការគ្រប់គ្រងទឹកនៅតំបន់អង្គរ ការអភិវឌ្ឍន៍ភ្នំគូលែន បញ្ហាអភិវឌ្ឍន៍សហគមន៍ និងបញ្ហាអភិវឌ្ឍន៍ហេដ្ឋារចនាសម្ព័ន្ធសម្រាប់ទទួលទេសចរ។
សូមរំលឹកថា កាលពីថ្ងៃម្សិលមិញដែលជាថ្ងៃដំបូងនៃកិច្ចប្រជុំ គណៈកម្មការICC បានសម្រេចនូវរបៀបវារៈជាច្រើនក្នុងចំណោមរបៀបវារៈដែលបានគ្រោងទុកជាង១។លើសពីនេះរដ្ឋាភិបាលកម្ពុជាបានទទួលជាលើកដំបូងពីរដ្ឋាភិបាលនូវែលសេឡង់ លើគម្រោងលើកស្ទួយបេតិកភណ្ឌសហគមន៍អង្គរ និងសេដ្ឋកិច្ច នូវថវិកាចំនួនជាង ៣លាន៧សែនដុល្លារ ហើយដែលត្រូវបានចុះហត្ថលេខារវាង លោកប៊ុន ណារិទ្ធិ អគ្គនាយកអាជ្ញាធរអប្សរា និងតំណាងស្ថានទូតនូវែលសេឡង់ប្រចាំទីក្រុងបាងកក សម្រាប់លើកតម្កើងជីវភាព នៅឧទ្យានអង្គររយៈពេល ៥ឆ្នាំ ចាប់ពីឆ្នាំ២០១៤ ដល់ឆ្នាំ២០១៩។
សូមបញ្ជាក់ថាគណៈកម្មការ ICC បានបង្កើតឡើងនៅឆ្នាំ១៩៩៣ ក្រោយសន្នីសីទអន្តរជាតិលើកទី១ ស្តីពីអង្គរនៅទីក្រុងតូក្យូ ប្រទេសជប៉ុន តាមសំណូមពររបស់គណៈកម្មាធិការ
បេតិកភ័ណ្ឌពិភពលោកពេលទទួលចុះអង្គរទៅក្នុងបញ្ជីបេតិកភណ្ឌពិភពលោក។ ការបង្កើតយន្តការអន្តរជាតិ ICC សម្រាប់អង្គរជាលក្ខខណ្ឌមួយក្នុងចំណោមលក្ខខណ្ឌទាំង៥ដែលតម្រូវឲ្យអាជ្ញាធរកម្ពុជាបំពេញក្នុងរយៈពេល៣ឆ្នាំ ១៩៩៣ដល់ឆ្នាំ១៩៩៦ ហើយសមាជិកICC មានចំនួន៣៧ប្រទេស មកពីទ្វីពទាំង៥ និងមានអង្គការជាតិចំនួន១៣ទៀតចូលរួម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ