អង្គការជិត៣០ ថ្កោលទោសការបំពានលើបុគ្គលិកសិទ្ធិមនុស្សពីអាជ្ញាធរខេត្តឧត្តរមានជ័យ
អង្គការសង្គមស៊ីវិលជាតិ និងអន្តរជាតិចំនួន២៧ អង្គភាពដែលរួមមានដូចជា អង្គការសមធម៌កម្ពុជា លីកាដូ និង មជ្ឈមណ្ឌលសិទ្ធិមនុស្សកម្ពុជាជាដើម កាលពីល្ងាចម្សិលមិញបានចេញសេចក្តីថ្លែងការណ៍រួមមួយថ្កោលទោស និង ចោទប្រកាន់អាជ្ញាធរខេត្តឧត្តរមានជ័យថាបានរារាំង បំពារបំពាន និង គំរាមកំហែងបុគ្គលិកសិទ្ធមនុស្សរបស់អង្គការសមធម៌កម្ពុជា។ ប៉ុន្តែអាជ្ញាធរខេត្តបានច្រានចោលការចោទប្រកាន់ទាំងនេះ។
ចុះផ្សាយនៅថ្ងៃ៖
ស្តាប់ - ០២:១៩
ការថ្កោលទោសតាមរយៈសេចក្តីថ្លែងការណ៍រួមនេះ បានកើតឡើងក្រោយពីបុគ្គលិកមួយចំនួនរបស់អង្គការសមធម៌កម្ពុជាត្រូវបានអាជ្ញាធរខេត្តឧត្តរមានជ័យរារាំង និងបំពារបំពានដល់រាង្គកាយជាបន្តបន្ទាប់កាលពីពេលថ្មីៗកន្លងទៅនេះ។ ការរារាំងបានកើតឡើងនៅពេលដែលបុគ្គលិកអង្គការសមធម៌កម្ពុជា បានចុះទៅសិក្សាស្រាវជ្រាវទាក់ទងនឹងផលប៉ះពាល់ដោយសារចំការដំណាំអំពៅដែលគ្រប់គ្រងដោយក្រុមហ៊ុនមិត្រាផលគ្រុប ដែលជាក្រុមហ៊ុនផ្គត់ផ្គង់ភេសជ្ជៈកូការកូឡាធំទីបីលើពិភពលោក។
សេចក្តីថ្លែងការណ៍រួមនោះ ក៏បានលើកឡើងពីការរារាំងរបស់អាជ្ញាធរខេត្តឧត្តរមានជ័យលើបុគ្គលិកអង្គការសមធម៌កម្ពុជាកាលពីខែកញ្ញា និងក្នុងអំឡុងខែតុលានេះដែលមានទាំងការចាប់ឃុំខ្លួនបណ្តោះអាសន្ន និង ប្រើអំពើហិង្សាផងដែរ។ ក្រុមអង្គការសង្គមស៊ីវិលបានចោទចំៗលើស្នងការរងខេត្តឧត្តរមានជ័យគឺ លោក ឡុង សុគន្ធ ថា ជាអ្នករារាំងដល់ការធ្វើការរបស់បុគ្គលិកអង្គការសមធម៌កម្ពុជា។
លោក ឡុង សុគន្ធ ស្នងការរងខេត្តឧត្តរមានជ័យ បានច្រានចោលការចោទប្រកាន់នោះ។ លោកបានបញ្ជាក់ប្រាប់វិទ្យុបារាំងអន្តរជាតិថា ការដែលលោកឲ្យបុគ្គលិកអង្គការសមធម៌កម្ពុជាចាកចេញពីទីនោះកាលពីខែកញ្ញាកន្លងទៅ គឺមិនមែនជាការរារាំងទេ តែជាការអនុវត្តច្បាប់អន្តោប្រវេសន៍ ព្រោះបុគ្គលិកជាជនជាតិបរទេសរបស់អង្គការសមធម៌កម្ពុជាដែលចុះទៅនៅពេលនោះមិនមានលិខិតឆ្លងដែនជាប់នឹងខ្លួនឡើយ។ ពាក់ព័ន្ធនឹងអំពើហិង្សាលើបុគ្គលិកអង្គការសមធម៌ម្នាក់ទៀតកាលពីថ្ងៃទី ១១ តុលា លោក ឡុង សុគន្ធ បានអះអាងថា លោកមិនជាប់ពាក់ព័ន្ធនោះទេ។
ក្រុមអង្គការសង្គមស៊ីវិល ក៏បានអំពាវនាវឲ្យក្រសួងមហាផ្ទៃ និងតុលាការខេត្តធ្វើការស៊ើបអង្កេត និងផ្តន្ទាទោសបុគ្គលដែលប្រព្រឹត្តទង្វើមិនគប្បីលើបុគ្គលិកអង្គការសមធម៌កម្ពុជាផងដែរ។
លោក ខៀវ សុភ័គ អ្នកនាំពាក្យក្រសួងមហាផ្ទៃ បានឆ្លើយតបទៅនឹងការអំពាវនាវនោះតាមរយៈវិទ្យុបារាំងអន្តរជាតិថា បើមានអំពើហិង្សា និង បទល្មើសព្រហ្មទណ្ឌកើតមានមែននោះ អង្គការសមធម៌កម្ពុជាគូរតែដាក់ពាក្យបណ្តឹងទៅកាន់អាជ្ញាធរ និង តុលាការខេត្តឧត្តរមានជ័យប្រសើរជាងធ្វើការអំពាវនាវ។
លោក អៀង វុទ្ធី នាយកប្រតិបត្តិអង្គការសមធម៌កម្ពុជា បានបញ្ជាក់ថា លោកមិនទាន់បានពាក្យបណ្តឹងនៅឡើយទេពាក់ព័ន្ធករណីនេះ។ មិនទាន់ដាក់ ព្រោះលោកចង់ឃើញក្រសួងមហាផ្ទៃចាត់វិធានការទៅលើបញ្ហាដែលបានកើតឡើង និង ធ្វើការស៊ើបអង្កេតឲ្យបានច្បាស់លាស់ ហើយដាក់វិន័យរដ្ឋបាលដល់អាជ្ញាធរដែលប្រព្រឹត្តបទល្មើស។ យ៉ាងណាក៏ដោយ នៅពេលនេះ អង្គការសមធម៌កម្ពុជាកំពុងពិភាក្សាជាមួយក្រុមអ្នកច្បាប់ពីជម្រើសដាក់ពាក្យបណ្តឹងពីករណីនេះហើយ។ នេះបើតាមការឲ្យដឹងបន្ថែមពីលោក អៀង វុទ្ធី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ