លោក ធន សារាយ លាឈប់ពីអង្គការខុមហ្វ្រែល ព្រោះយល់ថា ការសង្កេតការណ៍បោះឆ្នោត លែងសូវសំខាន់
លោក ធន សារាយ សុំលាឈប់ពីប្រធានគណៈកម្មការនាយកអង្គការខុមហ្វ្រែល។ នេះបើតាមលិខិតរបស់លោក ធន សារាយ ផ្ញើជូនសមាជិកគណៈកម្មការនាយកខុមហ្វ្រែល ចុះថ្ងៃទី០៥សីហា និងដែលត្រូវបានផ្សព្វផ្សាយជាសាធារណៈនៅថ្ងៃព្រហស្បតិ៍ម្សិលមិញ។ បើតាមលិខិតដដែល លោក ធន សារាយលាឈប់ពីអង្គការខុមហ្វ្រែល ដោយសារតែលោកមមាញឹកជាមួយការងារនៅអង្គការអាដហុក និងម្យ៉ាងទៀត ដោយសារតែលោកយល់ថា ការសង្កេតការណ៍បោះឆ្នោត ពុំសូវមានសារៈសំខាន់ដូចមុនទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៦
លោក ធន សារាយ ដែលជាប្រធានអង្គការការពារសិទ្ធិមនុស្សអាដហុក បានលាឈប់ពីតំណែងជាប្រធានគណៈកម្មការនាយក នៃគណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា ហៅកាត់ថាខុមហ្វ្រែល។ ជាតំណែងដែលលោកកាន់កាប់តាំងពីឆ្នាំ១៩៩៥មក។
លោក ធន សារាយ បានបញ្ជាក់នៅក្នុងលិខិតសុំលាឈប់ថា ការលាឈប់របស់លោក ធ្វើឡើងដោយសង្កេតការវិវត្តន៍ចុងក្រោយនៃស្ថានភាពនយោបាយ ដែលអាចឈានទៅរកការផ្លាស់ប្ដូរដ៏ធំមួយ ក្នុងបរិបទនយោបាយកម្ពុជាបច្ចុប្បន្ន ជាពិសេសការផ្លាស់ប្ដូរសមាសភាព គជប ថ្មី ការធ្វើវិសោធនកម្មរដ្ឋធម្មនុញ្ញ ច្បាប់បោះឆ្នោត និងបទបញ្ជាផ្ទៃក្នុងរដ្ឋសភាជាដើម។
តាមរយៈការកែទម្រង់នេះ លោក ធន សារាយសង្ឃឹមថា ដំណើរការបោះឆ្នោតនឹងមានភាពល្អប្រសើរឡើង។ លោកយល់ឃើញថា ការងារអង្កេតទៅលើការបោះឆ្នោតពីសំណាក់សង្គមស៊ីវិល ពុំសូវមានសារៈសំខាន់ដូចមុនទៀត និងដោយសារតែលោកមានភាពមមាញឹកលើកិច្ចការសិទ្ធិមនុស្ស លោកក៏សម្រេចលាឈប់ពីប្រធានគណៈកម្មការនាយកអង្គការខុមហ្វ្រែល។
បើតាមលោក ធន សារាយ សមាគមអាដហុក មើលឃើញថា អំពើហិង្សានយោបាយ និងការរំលោភសិទ្ធិមនុស្សតាមរូបភាពផ្សេងៗ នៅតែជាក្ដីកង្វល់ដ៏ធ្ងន់ធ្ងរ។ ដូច្នេះហើយទើបសមាគមអាដហុក ត្រូវតែប្រមូលធនធានដែលខ្លួនមាន ទាំងធនធានមនុស្ស និងហិរញ្ញវត្ថុ ដើម្បីយកចិត្តទុកដាក់ ខិតខំតាមឃ្លាំមើលទិដ្ឋភាពសិទ្ធិមនុស្ស និងភាពមិនប្រក្រតីធ្ងន់ធ្ងរនានា។ ភាពមិនប្រក្រតី ដែលដូចជាអំពើហិង្សានយោបាយ ការគម្រាមកំហែង ការបំភិតបំភ័យ មុនពេល អំឡុងពេល និងក្រោយពេលបោះឆ្នោតក្រុមប្រឹក្សាឃុំសង្កាត់ និងបោះឆ្នោតជាតិ នាពេលខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ