សហជីពកម្មករ បង្ហាញជំហរខ្វែងគ្នាចំពោះការទាមទារឡើងប្រាក់ខែកម្មករ
ដូចការគ្រោងទុក នៅព្រឹកថ្ងៃទី១៦តុលានេះ មេដឹកនាំសហជីពកម្មករមកពី ៨ ស្ថាប័ន ដែលបានធ្វើយុទ្ធនាការទាមទារឡើងប្រាក់ខែកម្មករ រួមមាន៖ សហជីពរបស់លោកអាត់ ធន់ និងសហជីពលោកប៉ាវ ស៊ីណា ជាដើម បានជួបជាមួយលោក អ៊ិត សំហេង រដ្ឋមន្ត្រីក្រសួងការងារ និងជាប្រធានគណៈកម្មការប្រឹក្សាការងារ ដើម្បីពិភាក្សាពីការដំឡើងប្រាក់ឈ្នួលអប្បបរមា។ ក្នុងកិច្ចប្រជុំប្រហែល២ ម៉ោង នៅក្រសួងការងារ មេដឹកនាំសហជីព បានបង្ហាញជំហរផ្សេងៗពីគ្នាលើការទាមទារប្រាក់ខែកម្មករ។ សហជីពភាគច្រើនទាមទារឡើងប្រាក់ខែកម្មករសម្រាប់ឆ្នាំ២០១៥ ត្រឹម ១៥០ ដុល្លារ។
ចុះផ្សាយនៅថ្ងៃ៖
ស្តាប់ - ០២:២១
ជាជំហរថ្មី ធ្វើឡើងដោយផ្ទាល់មាត់ ចំពោះមុខលោករដ្ឋមន្ត្រីក្រសួងការងារ ក្នុងកិច្ចប្រជុំ នៅព្រឹកថ្ងៃទី១៦តុលានេះ។ នោះគឺមេដឹកនាំសហជីពកម្មករ ចំនួន ៨ ស្ថាប័ន ដែលបានធ្វើយុទ្ធនាការ ទាមទារឡើងប្រាក់ខែកម្មកររោងចក្រកាត់ដេរ សម្រាប់ឆ្នាំ២០១៥ បានបង្ហាញជំហររៀងៗខ្លួន។ មេដឹកនាំសហជីពស្ទើរតែទាំងអស់ បានបង្ហាញជំហរ ទាមទារឡើងប្រាក់ខែកម្មករ នៅត្រឹម ១៥០ ដុល្លារ។ ប៉ុន្តែសហជីពកម្មកររបស់លោកស្រី យ៉ាង សុភ័ណ្ឌ នៅរក្សាជំហរ ១៧៧ ដុល្លារ។
លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករ ស្ថិតក្នុងចំណោមមេដឹកនាំសហជីពកម្មករទាំង ៨ ដែលចូលជួបលោករដ្ឋមន្ត្រី នៅព្រឹកមិញ បានលើកឡើងថា ដោយសារតែជំហររបស់សហជីព និងថៅកែរោងចក្រ មិនត្រូវរ៉ូវគ្នា លើការតម្លើងប្រាក់ខែកម្មករ សម្រាប់ឆ្នាំ២០១៥ ដូច្នេះមានតែលោករដ្ឋមន្ត្រី តំណាងរដ្ឋាភិបាលទេ ដែលត្រូវវះពោះ អារកាត់ លើចំនួនប្រាក់ខែកម្មករ ដែលត្រូវតម្លើង នៅឆ្នាំក្រោយ។
ចំណែកលោកស្រី យ៉ាង សុភ័ណ្ឌ ប្រធានសហជីពសម្ព័ន្ធកម្ពុជា បានរក្សាជំហរ ទាមទារឡើងប្រាក់ខែកម្មករ ១៧៧ ដុល្លារ ហើយបានព្រមាននៅថ្ងៃនេះថា បើសិនជាភាគីថៅកែរោងចក្រ និងរដ្ឋាភិបាល ឡើងប្រាក់ខែមិនដល់ចំនួន ដែលសហជីពចង់បានទេ នោះនឹងមានបាតុកម្ម តវ៉ា ជាមិនខាន។
យ៉ាងណាក៏ដោយ ចំពោះមុខមេដឹកនាំសហជីពកម្មករ ក្នុងកិច្ចប្រជុំ នៅព្រឹកថ្ងៃ១៦តុលានេះ លោក អ៊ិត សំហេង រដ្ឋមន្ត្រីក្រសួងការងារ បានជំរុញឲ្យមេដឹកនាំសហជីពទាំងអស់ ជជែករកមតិរួម លើការទាមទារឡើងប្រាក់ខែកម្មករ។
មេដឹកនាំសហជីព ៩ រូប មានទាំងសហជីពរបស់លោកអាត់ ធន់ លោកប៉ាវ ស៊ីណា និងសហជីពលោកស្រី យ៉ាង សុភ័ណ្ឌ ជាដើម នឹងត្រូវចូលរួមកិច្ចប្រជុំ ពិភាក្សាប្រាក់ឈ្នួលអប្បបរមា ផ្នែកវាយនភណ្ឌ កាត់ដេរសម្លៀកបំពាក់ និងផលិតស្បែកជើង សម្រាប់ឆ្នាំ២០១៥។ កិច្ចពិភាក្សារបស់ក្រុមការងារ ដែលទើបបង្កើត មានតំណាងភាគីកម្មករនិយោជិត ៩ រូប តំណាងភាគីនិយោជក ៩ រូប និងតំណាងភាគីរាជរដ្ឋាភិបាល ៩ រូប នឹងចាប់ផ្តើមប្រជុំប្រចាំថ្ងៃ ចាប់ពីថ្ងៃទី២០ ដល់ថ្ងៃទី៣០ ខែតុលា នៅក្រសួងការងារ។
ដោយឡែក កិច្ចប្រជុំត្រីភាគីរវាងសហជីពកម្មករ ថៅកែរោងចក្រកាត់ដេរ និងតំណាងរដ្ឋាភិបាល លើការសម្រេចតម្លើងប្រាក់ខែកម្មករ សម្រាប់ឆ្នាំ២០១៥ នឹងធ្វើឡើង នៅក្នុងខែវិច្ឆិកា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ