ប៉ាន់ រិទ្ធី នៅមហោស្រពភាពយន្តអន្តរជាតិ
“ស្តង់ភាពយន្តពិភពលោក” (Pavillon les Cinémas du monde) នៅមហោស្រពភាពយន្តអន្តរជាតិបានចាប់បើកធ្វើ នៅថ្ងៃសុក្រនេះ។ លោកប៉ាន់ រិទ្ធី សមិទ្ធិករភាពយន្តខ្មែរ ត្រូវបានគេជ្រើសរើសឲ្យដឹកនាំស្តង់នេះ។ ចំណែក សមិទ្ធិករភាពយន្តខ្មែរម្នាក់ទៀត ឈ្មោះ ហ្គីយ៉ូម សួន (Guillaume Suon) ក៏ត្រូវបានគេជ្រើសរើសឲ្យចូលក្នុងគណៈប្រតិភូ នៃស្តង់នេះដែរ។
ចុះផ្សាយនៅថ្ងៃ៖ កែប្រែថ្ងៃទី៖
បទអន្តរាគមន៍របស់ សេង ឌីណា
“ស្តង់ភាពយន្តពិភពលោក” ត្រូវបានបង្កើតឡើង កាលពីឆ្នាំ២០០៩ កន្លងទៅ។ កម្មវិធីនេះ បង្កើតឡើង នៅក្នុងមហោស្រពអន្តរជាតិដ៏ល្បីល្បាញ នៅទីក្រុងកាន ប្រទេសបារាំង គឺក្នុងគោលដៅជួយលើកតម្កើងភាពយន្ត មកពីបណ្តាប្រទេស ដែលមិនសូវមានមុខ មានមាត់ នៅក្នុងការប្រកួតប្រជែងមហោស្រពភាពយន្ត។
លោក ប៉ាន់ រិទ្ធី ត្រូវបានគេជ្រើសរើសឲ្យធ្វើជា “ឳពុកធម៌” របស់សមិទ្ធិករកុនស្រករក្រោយចំនួន១២នាក់ មកពីប្រទេសចំនួន ១២ ដែលគេជ្រើសរើសឲ្យចូលរួមក្នុងស្តង់ភាពយន្តពិភពលោកនេះ។ រួមជាមួយនឹងតារាភាពយន្តដ៏ល្បីល្បាញរបស់បារាំង ឈ្មោះ Sandrine Bonnaire លោកប៉ាន់ រិទ្ធី នឹងជួយមើលការខុសត្រូវ ណែនាំ និងផ្តល់យោបល់ ដល់សមិទ្ធិករទាំង១២រូប ព្រមទាំងធ្វើសកម្មភាពផ្សេងទៀត ក្នុងគោលដៅលើកតម្កើងវិស័យភាពយន្តនៃប្រទេសកំពុងអភិវឌ្ឍ។
ចូលរួមក្នុងពិធីបើកសម្ពោធស្តង់ភាពយន្តពិភពលោកនេះ យើងឃើញមានជាអាទិ៍ រដ្ឋលេខាធិការក្រសួងការបរទេសបារាំង ទទួលបន្ទុកកិច្ចការប្រទេសនិយាយភាសាបារាំង អភិបាលក្រុងកាន អគ្គនាយក RFI-France24-TV5 Monde ព្រមទាំងឥស្សរជនផ្សេងទៀតមកពីបណ្តាប្រទេសនៅអាហ្វ្រ៊ិក។
លោកហ្គីយ៉ូម សួន (Guillaume Suon) អ្នករៀបចំថតកុនឯកសាររឿង រំឭកពីឳពុកខ្ញុំ ត្រូវបានជ្រើសរើសឲ្យចូលរួមក្នុងស្តង់ភាពយន្តពិភពលោកនេះដែរ។ កុនរបស់លោកនឹងត្រូវគេដាក់បញ្ចាំង នៅក្នុងផ្សារភាពយន្ត នៅថ្ងៃទី២០ ឧសភា ខាងមុខ។ ចាប់ពីពេលនេះ រហូតដល់ការបិទបញ្ចប់មហោស្រពភាពយន្ត លោកហ្គីយ៉ូម សួន រួមជាមួយនឹងសមិទ្ធិករភាពយន្ត ១១រូបផ្សេងទៀត នឹងមានឱកាសជួបជាមួយអ្នកសារព័ត៌មាន អ្នកជំនាញខាងវិស័យភាពយន្ត និងចូលរួមក្នុងសិក្ខាសាលាផ្សេងៗ ស្តីពីវិស័យភាពយន្ត។
នៅក្នុងឱកាសសម្ពោធបើកស្តង់ភាពយន្តអន្តរជាតិ លោករដ្ឋលេខាធិការក្រសួងការបរទេសបារាំងបានថ្លែងសន្យាថានឹងខិតខំជួយជ្រោមជ្រែងដល់វិស័យភាពយន្ត នៅតាមបណ្តាប្រទេសនិយាយភាសាបារាំង ដែលកម្ពុជាក៏ជាសមាជិកមួយដែរ។ លោកបានថ្លែងថា នៅតាមបណ្តាប្រទេសកំពុងអភិវឌ្ឍមានអ្នកមានទេពកោសល្យ មានស្នាដៃ មានការបង្កើតភាពយន្តល្អៗ ដែលគេត្រូវតែសហការគ្នាថែរក្សា និងជំរុញបន្ថែម។
វិទ្យុបារាំងអន្តរជាតិ (RFI) គឺជាដៃគូដ៏សំខាន់មួយរបស់ស្តង់ភាពយន្តពិភពលោក ចាប់តាំងពីស្តង់នេះ ទើបនឹងបង្កើតម៉្លេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ