លោកហ៊ុន សែន និងមន្ត្រីរដ្ឋាភិបាល ៥រូបទៀត ឆ្លងជំងឺផ្តាសាយជ្រូក A(H1N1)
លោកនាយករដ្ឋមន្ត្រីហ៊ុន សែន និងមន្ត្រីរដ្ឋាភិបាលកម្ពុជា ៥ រូបផ្សេងទៀតត្រូវបានក្រសួងសុខាភិបាល ឲ្យដឹងថាបានឆ្លងជំងឺផ្តាសាយថ្មី A(H1N1)។ ប៉ុន្តែរហូតមកទល់នឹងថ្ងៃនេះស្ថានភាពសុខភាពរបស់លោកបាន វិលត្រឡប់មករកភាពប្រក្រតីវិញហើយ។ ចំណែកឯមន្ត្រីរដ្ឋាភិបាលផ្សេងទៀត ក៏ត្រូវបានក្រុមគ្រូពេទ្យបន្តតាមដានព្យាបាល នៅមន្ទីរពេទ្យផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍ របស់នេត្រ ភក្រ្តាពីទីក្រុងភ្នំពេញ
ប្រមុខរដ្ឋាភិបាលកម្ពុជា លោកហ៊ុន សែន រួមនឹងមន្ត្រីរដ្ឋាភិបាលកម្ពុជាប្រាំរូបផ្សេងទៀតបានឆ្លងជំងឺផ្តាសាយប្រភេទថ្មី A(H1N1) ដែលគេស្គាល់ថា ជាជំងឺផ្តាសាយជ្រូក។ នេះជាការប្រកាសឲ្យដឹងរបស់លោកម៉ម ប៊ុនហេង រដ្ឋមន្ត្រីក្រសួងសុខាភិបាល កាលពីយប់ថ្ងៃអង្គារម្សិលមិញ។ រហូតមកទល់នឹងថ្ងៃពុធនេះមិនមាន ការវិវឌ្ឍអ្វីថ្មីជុំវិញសុខភាពរបស់លោកនាយករដ្ឋមន្ត្រីទេ។ បើតាមការលើកឡើងរបស់ ម៉ម ប៊ុនហេង ស្ថានភាពសុខភាពរបស់ប្រមុខរដ្ឋាភិបាលខ្មែរមានភាពប្រក្រតីវិញហើយ បន្ទាប់ពីទទួលបាននូវការព្យាបាលដោយយកចិត្តទុកដាក់ខ្ពស់ពីសំណាក់ក្រុមគ្រូពេទ្យកម្ពុជាដ៏ចំណានរួចមក។
យោងតាមក្រសួងសុខាភិបាល លោកនាយករដ្ឋមន្ត្រីហ៊ុន សែន បានឆ្លងជំងឺគ្រុនផ្តាសាយថ្មី A(H1N1) នៅថ្ងៃទី២៥ ខែមិថុនា ឆ្នាំ ២០១០។ ថ្ងៃសុក្រ សបា្តហ៍ មុន គណៈរដ្ឋមន្រ្តីបានប្រារព្ធ ការប្រជុំប្រចាំសប្តាហ៍របស់ខ្លួនក្រោមអធិបតភាពរបស់លោកនាយករដ្ឋមន្ត្រីហ៊ុនសែន។ ក្រសួងសុខាភិបាលបានឲ្យដឹងថា បន្ទាប់ពីកិច្ចប្រជុំនោះមក មានលេចឡើងនូវឧប្បតិ្តហេតុនៃជំងឺគ្រុនផ្តាសាយថ្មី AH1N1 ដែលបានឆ្លងទៅលើរូបលោកនាយករដ្ឋមន្រ្តី និងតម្រូវឲ្យមានវិធានការព្យាបាលជាបន្ទាន់មួយ។
លោករដ្ឋមន្ត្រីក្រសួងសុខាភិបាលម៉ម ប៊ុនហេង បានបន្ថែមទៀតថា ឧប្បត្តិហេតុនេះ បានបង្ខំឲ្យលោកនាយករដ្ឋមន្ត្រីហ៊ុន សែន អនុប្រធានគណបក្សប្រជាជនកម្ពុជា អវត្តមាន នៅក្នុងពិធីខួបកំណើតលើកទី ៥៩ នៃគណបក្សប្រជាជនកម្ពុជា និងត្រូវលុបចោលកម្មវិធីការងារមួយចំនួនទៀត។ ក្រសួងសុខាភិបាលក៏បានឲ្យដឹងថា បន្ទាប់ពីមានឧប្បត្តិហេតុនេះកើតឡើង រដ្ឋាភិបាលក៏បានចាត់វិធានការជាបន្ទាន់។
ការធ្វើតេស្តចំពោះឥស្សរជនទាំងអស់ដែលបានចូលរួមប្រជុំក្នុងអង្គគណៈរដ្ឋមន្រ្តី រកឃើញនូវមុខសញ្ញាវិជ្ជមាននៃជំងឺផ្តាសាយថ្មី AH1N1 លើរូបលោកឧបនាយករដ្ឋមន្រ្តី យឹម ឆៃលី លោកទេសរដ្ឋមន្រ្តី ឆាយ ថន រដ្ឋមន្ត្រីក្រសួងផែនការ លោកតាវ សេងហួរ ទេសរដ្ឋមន្ត្រីទទួលបន្ទុកបេសកកម្មពិសេស និងមន្ត្រីរដ្ឋាភិបាលពីររូបទៀតផ្សេងទៀត។ ក្រសួងក៏បានថ្លែងថា ឥស្សរជនទាំងនេះក៏ត្រូវបានក្រុមគ្រូពេទ្យជំនាញកំពុងធ្វើការព្យាបាលដោយយកចិត្តទុកដាក់ដែរ។
សេចក្តីជូនដំណឹងនេះត្រូវបានផ្សព្វផ្សាយភ្លាមៗ នៅតាមប្រព័ន្ធផ្សាយ បំណងដើម្បីជូនដំណឹងដល់សាធារណជនទាំងអស់ ដើម្បីបំបាត់ការងឿងឆ្ងល់ចំពោះអវត្តមានរបស់លោកនាយករដ្ឋមន្ត្រីហ៊ុន សែន និងដើម្បីបញ្ជៀសការរាដាលនៃជំងឺនេះ ដោយសារមិនបានចាប់អារម្មណ៍យកចិត្តទុកដាក់។
គួរបញ្ជាក់ថា យោងតាមតួលេខរបស់ក្រសួងសុខាភិបាល រហូតដល់ថ្ងៃទី ២៤ ខែមិថុនា ឆ្នាំ ២០១០ ប្រទេសកម្ពុជាមានការឆ្លងជំងឺគ្រុនផ្តាសាយប្រភេទថ្មី A(H1N1) ឬផ្តាសាយជ្រូក ចំនួន ៥៩១ករណី ដែលក្នុងនោះមានមនុស្សចំនួន ៦ នាក់បានស្លាប់បាត់បង់ជីវិត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ