មេដឹកនាំបក្សនយោបាយសំខាន់ៗមួយចំនួនបោះឆ្នោតនៅកំពង់ចាម
មេដឹកនាំបក្សនយោបាយសំខាន់ៗជាច្រើនបាននាំគ្នាទៅបោះឆ្នោតនៅក្នុងខេត្តកំពង់ចាម ដែលជាខេត្តធំជាងគេ មានរហូតដល់ ១៨ អាសនៈក្នុងរដ្ឋសភា។ មេដឹកនាំទាំងនោះសុទ្ធតែអះអាងពីក្តីសង្ឃឹមរៀងៗខ្លួន អំពីជ័យជំនៈដែលពួកគេនឹងទទួលបានក្នុងការបោះឆ្នោតថ្ងៃនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:២២
អ្នកបោះឆ្នោតបានតំរៀបជួរគ្នាតាំងពីមុនម៉ោង៧ព្រឹក ដែលជាពេលវេលានៃការបើកការិយាល័យបោះឆ្នោត។ មន្ត្រីគណៈកម្មការរៀបចំការបោះឆ្នោតបានអះអាងថា នៅក្នុងការបោះឆ្នោតលើកនេះ វាមានសន្ទុះនៃការចាប់អារម្មណ៍របស់អ្នកបោះឆ្នោតខ្លាំងជាងលើកមុនៗ។
នៅក្នុងក្រុងកំពង់ចាម មេដឹកនាំគណបក្សមួយចំនួនបានមកបោះឆ្នោតរួចរាល់នៅព្រឹកថ្ងៃអាទិត្យនេះ។ លោកហេង សំរិន ប្រធានកិត្តិយសគណបក្សប្រជាជនកម្ពុជាបានបោះឆ្នោតនៅ ម៉ោង៧ ព្រឹក ក្នុងមណ្ឌលបោះឆ្នោតសាលាបឋមសិក្សាឧត្តរ។ ព្រះអង្គម្ចាស់ក្សត្រីនរោត្តម អារុណ រស្មី ប្រធានគណបក្សហ៊្វុនស៊ីនប៉ិចបានបោះឆ្នោតនៅម៉ោង៩ព្រឹកនេះ នៅក្នុងមណ្ឌលសាលាបឋមសិក្សាទក្សិណ។
ចំណែកឯលោក កឹម សុខា អនុប្រធានគណបក្សសង្គ្រោះជាតិ បានបោះឆ្នោតនៅម៉ោង៩និង៣០នាទី នៅក្នុងការិយាល័យ និងមណ្ឌលបោះឆ្នោតសាលាបឋមសិក្សាទក្សិណជាមួយព្រះអង្គម្ចាស់ក្សត្រី នរោត្តម អារុណរស្មីដែរ។
អ្នកនយោបាយទាំងបី សុទ្ធតែបានអះអាងអំពីក្តីសង្ឃឹមរបស់គណបក្សខ្លួន។ ខណៈលោកហេង សំរិនសង្ឃឹមទទួលបាន១១អាសនៈ ក្នុងចំណោមអាសនៈទាំងអស់១៨ លោក កឹម សុខាអះអាង លោកសង្ឃឹមទទួល១២អាសនៈ។ រីឯព្រះអង្គម្ចាស់ក្សត្រីនរោត្តម អារុណរស្មីសង្ឃឹមថា ហ៊្វុនស៊ីនប៉ិចនឹងអាចទទួលបាន២អាសនៈដែរនៅក្នុងខេត្តនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ