ក្រសួងបរិស្ថាន ផ្សព្វផ្សាយផែនការយុទ្ធសាស្ត្រ ឆ្លើយតបនឹងការប្រែប្រួលអាកាសធាតុ នៅកម្ពុជា រយៈពេល ១០ឆ្នាំ
ផែនការយុទ្ធសាស្ត្រឆ្លើយតបនឹងការប្រែប្រួលអាកាសធាតុកម្ពុជា ចាប់ពីឆ្នាំ២០១៤ ដល់ឆ្នាំ២០២៣ ត្រូវបានក្រសួងបរិស្ថាន ប្រកាសផ្សព្វផ្សាយ នាព្រឹកថ្ងៃទី២៥មិថុនានេះ។ ឯកសារផែនការយុទ្ធសាស្ត្រ សម្រាប់ទប់ទល់នឹងបញ្ហាប្រែប្រួលអាកាសធាតុនៅកម្ពុជា រយៈពេល ១០ ឆ្នាំ ត្រូវបានមន្ត្រីក្រសួងបរិស្ថាន អះអាងថា ជាឆន្ទៈនយោបាយ និងការប្តេជ្ញាមោះមុត របស់រដ្ឋាភិបាល។ ចំណែកម្ចាស់ជំនួយអន្តរជាតិ បានប្រកាសសន្យា ជួយរដ្ឋាភិបាលកម្ពុជា ទាំងផ្នែកបច្ចេកទេស និងទាំងផ្នែកហិរញ្ញវត្ថុ សម្រាប់អនុវត្តយុទ្ធសាស្ត្រប្រែប្រួលអាកាសធាតុនេះ។
ចុះផ្សាយនៅថ្ងៃ៖
ស្តាប់ - ០២:៤៣
ផែនការយុទ្ធសាស្ត្រឆ្លើយតបនឹងការប្រែប្រួលអាកាសធាតុកម្ពុជា ចាប់ពីឆ្នាំ២០១៤ ដល់ឆ្នាំ២០២៣ ត្រូវបានលោកនាយករដ្ឋមន្ត្រី ហ៊ុន សែន ប្រកាសដាក់ឲ្យប្រើប្រាស់ ជាផ្លូវការ កាលពីថ្ងៃទី៥ ខែវិច្ឆិកា ឆ្នាំ២០១៣។ ៧ ខែក្រោយមក ពោលគឺនៅថ្ងៃទី ២៥មិថុនានេះ ក្រសួងបរិស្ថាន បានផ្សព្វផ្សាយពីផែនការយុទ្ធសាស្ត្រ រយៈពេល ១០ឆ្នាំនោះ។
ជាឯកសារផែនការ ក្នុងការដោះស្រាយផលប៉ះពាល់ នៃការប្រែប្រួលអាកាសធាតុ មកលើការអភិវឌ្ឍជាតិ និងការគាំទ្រជាបន្ត ដល់កិច្ចប្រឹងប្រែងពិភពលោក ដើម្បីកាត់បន្ថយការបញ្ចេញឧស្ម័នផ្ទះកញ្ចក់ នៅក្រោមអនុសញ្ញាក្របខ័ណ្ឌសហប្រជាជាតិ ស្តីពី ការប្រែប្រួលអាកាសធាតុ។ នេះបើតាមការកត់សម្គាល់របស់លោក ប៉ុន សារឿន អនុរដ្ឋលេខាធិការ ក្រសួងបរិស្ថាន។
ក្នុងសិក្ខាសាលា នៅព្រឹកថ្ងៃ២៥មិថុនានេះ លោក ប៉ុន សារឿន លើកឡើងថា ការប្រែប្រួលអាកាសធាតុ គឺជាបញ្ហាប្រឈមដ៏ពិតប្រាកដមួយ សម្រាប់កម្ពុជា។ ព្រឹត្តិការណ៍ធាតុអាកាស មិនប្រក្រតីកាន់តែញឹកញាប់ ដូចជា គ្រោះទឹកជំនន់ គ្រោះរាំងស្ងួត និងខ្យល់ព្យុះ បង្កឲ្យមានការខូចខាត និងបាត់បង់ថវិកា ប៉ះពាល់លើសេដ្ឋកិច្ចសង្គម និងជីវភាពប្រជាជន។ ជាក់ស្តែង កាលពីឆ្នាំ២០១៣ គ្រោះទឹកជំនន់ដ៏ធ្ងន់ធ្ងរ បានបណ្តាលឲ្យបាត់បង់ជីវិតមនុស្សប្រមាណ ១៦៨នាក់ និងខូចខាតផលដំណាំ ហេដ្ឋារចនាសម្ព័ន្ធ និងទ្រព្យសម្បត្តិប្រជាពលរដ្ឋ គិតជាទឹកប្រាក់ប្រមាណ ៣៥៦ លានដុល្លារ។
ផែនការយុទ្ធសាស្ត្រឆ្លើយតបនឹងការប្រែប្រួលអាកាសធាតុកម្ពុជា រយៈពេល ១០ ឆ្នាំ ចាប់ពីឆ្នាំ២០១៤ ដល់ឆ្នាំ២០២៣ មិនទាន់កំណត់ពីការចំណាយថវិកាប៉ុន្មាននៅឡើយទេ។ បើតាមលោក ស៊ុំ ធី ប្រធាននាយកដ្ឋានប្រែប្រួលអាកាសធាតុ របស់ក្រសួងបរិស្ថាន ផែនការរយៈពេល ១០ឆ្នាំនេះ មាន ៨ យុទ្ធសាស្ត្រសំខាន់ៗ ដែលរួមមាន៖ ការធានាសន្តិសុខស្បៀង ការកាត់បន្ថយផលប៉ះពាល់ ពីការប្រែប្រួលអាកាសធាតុ និងការកាត់បន្ថយឧស្ម័នផ្ទះកញ្ចក់ ជាដើម។
ថ្វីបើមិនទាន់ដឹងពីការចំណាយលើផែនការសកម្មភាពនីមួយៗ ប៉ុន្តែលោកស្រី Setsuko Yamazaki នាយកប្រចាំប្រទេស UNDP បានប្រកាសថា កម្មវិធីអភិវឌ្ឍន៍សហប្រជាជាតិ UNDP សហភាពអឺរ៉ុប និងរដ្ឋាភិបាលស៊ុយអែត មានការប្តេជ្ញា ដើម្បីបន្តផ្តល់ការគាំទ្រទាំងខាងបច្ចេកទេស និងហិរញ្ញវត្ថុ ដល់រដ្ឋាភិបាលកម្ពុជា ដើម្បីពង្រឹងសមត្ថភាពរបស់ខ្លួន សម្រាប់អនុវត្តផែនការយុទ្ធសាស្ត្រប្រែប្រួលអាកាសធាតុ។
សកម្មភាពទប់ទល់នឹងការប្រែប្រួលអាកាសធាតុ គិតចាប់ពីឆ្នាំ២០១០ រហូតដល់ខែមិថុនា ឆ្នាំ២០១៤ ម្ចាស់ជំនួយ UNDP សហភាពអឺរ៉ុប ទីភ្នាក់ងារដានីដា របស់ស្វីស និង ADB បានចំណាយប្រមាណ ៥៥ លានដុល្លារ ដល់រដ្ឋាភិបាលកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ