ក្រសួងអប់រំអំពាវនាវឲ្យបន្តបោះឆ្នោតគាំទ្រអ្នកគ្រូនាង ផល្លា ទោះបីជ័យលាភីត្រូវបានទៅលើគ្រូបង្រៀនអាមេរិក
ក្រសួងអប់រំយុវជននិងកីឡា បានអំពាវនាវតាមរយៈទំព័របណ្ដាញសង្គមរបស់ខ្លួន ឲ្យសាធារណជនបន្តបោះឆ្នោតគាំទ្រអ្នកគ្រូ នាង ផល្លា សម្រាប់ជ័យលាភីប្រជាប្រិយភាព។ សេចក្ដីអំពាវនាវនេះ ធ្វើឡើងកាលពីម៉ោងជាង១០ យប់ថ្ងៃអាទិត្យម្សិលមិញ គឺភ្លាមៗបន្ទាប់ពីការប្រកាសលទ្ធផលជ័យលាភីគ្រូបង្រៀនឆ្នើមពិភពលោក នៅទីក្រុងឌូបៃ។ ជាជ័យលាភីភ្ជាប់ជាមួយប្រាក់រង្វាន់១លានដុល្លារ ដែលបានធ្លាក់ទៅលើអ្នកគ្រូ Nancie Atwell ដែលជាគ្រូបង្រៀននៅសហរដ្ឋអាមេរិក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
បើទោះបីជាជ័យលាភីគ្រូបង្រៀនឆ្នើមពិភពលោក បានធ្លាក់ទៅលើគ្រូបង្រៀនរបស់សហរដ្ឋអាមេរិកហើយក៏ដោយ ក៏ក្រសួងអប់រំយុវជននិងកីឡា បានបន្តអំពាវនាវតាមរយៈទំព័របណ្ដាញសង្គមរបស់ខ្លួន ឲ្យសាធារណជនបន្តបោះឆ្នោតគាំទ្រអ្នកគ្រូ នាង ផល្លា សម្រាប់ជ័យលាភីប្រជាប្រិយភាព។
ភ្ជាប់ជាមួយរូបថតអ្នកគ្រូ នាង ផល្លា ឈរញញឹមនៅពីមុខទង់ជាតិខ្មែរបក់រវិច ក្រសួងអប់រំក៏បានថ្លែងអំណរគុណដល់អ្នកគ្រូ នាង ផល្លា ដែលតំណាងឲ្យគ្រូទូទាំងប្រទេសកម្ពុជា ដែលបានជាប់ជាបេក្ខជនទាំង១០រូបចុងក្រោយ ក្នុងកម្មវិធីគ្រូបង្រៀនឆ្នើមពិភពលោក។ បើតាមក្រសួងអប់រំ ការលះបង់កម្លាំងកាយចិត្តក្នុងការបង្រៀនកុមារពិការភ្នែកនិងគថ្លង់នៅកម្ពុជារបស់អ្នកគ្រូ នាង ផល្លា គឺជាចំណែកមួយ ក្នុងការជួយពង្រឹង និងលើកកម្ពស់វិស័យអប់រំដល់កុមារគ្រប់ៗរូប។ ក្រសួងអប់រំបានគូសបញ្ជាក់បន្ថែមទៀតថា បើទោះបីជាអ្នកគ្រូមិនបានទទួលជ័យលាភីក៏ដោយ យើងទាំងអស់គ្នាសូមកោតសរសើរនូវការលះបង់ដ៏ធំធេងរបស់អ្នកគ្រូ ហើយនៅតែបន្តការលើកទឹកចិត្ត និងគាំទ្រដល់អ្នកគ្រូ ក្នុងការបំពេញការងារគ្រប់ភារកិច្ចឲ្យបានជោគជ័យ។ នេះបើតាមក្រសួងអប់រំ។
សូមជម្រាបជូនថា សាធារណជននៅតែអាចបន្តបោះឆ្នោតគាំទ្រដល់អ្នកគ្រូ នាង ផល្លា រហូតដល់ថ្ងៃទី១៧ខែមីនា ដើម្បីឲ្យអ្នកគ្រូអាចទទួលបាននូវជ័យលាភីគ្រូបង្រៀនដែលមានប្រជាប្រិយភាពបំផុត។ ការបោះឆ្នោតអាចធ្វើឡើងតាមរយៈបណ្ដាញសង្គមហ្វេសប៊ុក ដែលមានអាសយដ្ឋាន facebook.com/teacherprize។ គិតត្រឹមព្រឹកថ្ងៃចន្ទ ទី១៦មីនានេះ អ្នកគ្រូ នាង ផល្លា ទទួលបានសំឡេងឆ្នោតគាំទ្រច្រើនដាច់គេ ដែលមានចំនួនជាង១២ម៉ឺនសំឡេងហើយ។
គួររំលឹកថា អ្នកគ្រូ នាង ផល្លា គឺជាគ្រូបង្រៀនកុមារពិការភ្នែក គ ថ្លង់ តាំងពីឆ្នាំ១៩៨៦ នៅក្នុងជំរុំសាយធូ និងក្រោយមកនៅអង្គការគ្រួសារថ្មី ចាប់តាំងពីឆ្នាំ១៩៩៣ រហូតមកទល់បច្ចុប្បន្ន។ កិច្ចខិតខំប្រឹងប្រែងរបស់អ្នកគ្រូ នាង ផល្លា ត្រូវបានពិភពលោកទទួលស្គាល់ រហូតធ្វើឲ្យអ្នកគ្រូបានជាប់ជាបេក្ខជនម្នាក់ ក្នុងចំណោមបេក្ខជនទាំង១០រូបចុងក្រោយ សម្រាប់ពានរង្វាន់គ្រូបង្រៀនឆ្នើមពិភពលោក របស់មូលនិធិ Varkey៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ