ក្រសួងធម្មការបញ្ជាក់ថា ព្រះសង្ឃ វ៉ា ស៊ីណាន នឹងត្រូវចាប់ផ្សឹក បើគេរកឃើញ
ក្រសួងធម្មការនិងសាសនា កំពុងស្វែងរកមុខព្រះសង្ឃមួយអង្គ ព្រះនាម អគ្គមុនី វ៉ា ស៊ីណាន ដើម្បីចាត់វិធានការទៅតាមវិន័យសង្ឃ បន្ទាប់ពីរូបភាពអាសអាភាសនិងរូបភាព សំញ៉ែងខ្សែកទូរសព្ទដៃទំនើប និងប្រាក់ដុល្លារជាច្រើនសន្លឹករបស់ព្រះអង្គ ត្រូវបានគេបង្ហោះ នឹងចែកចាយពេញបណ្តាញសង្គមហ្វេសបុក។ ក្រសួងធម្មការនិងសាសនាបញ្ជាក់ថា ព្រះសង្ឃ វ៉ា ស៊ីណាន នឹងត្រូវចាប់ផ្សឹក បើគេរកឃើញ។
ចុះផ្សាយនៅថ្ងៃ៖
ស្តាប់ - ០២:៣៦
រឿងអាស្រូវនៅក្នុងព្រះពុទ្ធសាសនា បានលេចឮជាបន្តបន្ទាប់នៅរយៈពេលចុងក្រោយនេះ។ អស់ពីសំណុំរឿងព្រះមេគណខេត្តកំពង់ស្ពឺព្រះនាម ឌូ សុវណ្ណឌឿន ឡើងច្រៀងលើឆាកតន្រ្តីសម័យ ឥឡូវដល់វេនព្រះសង្ឃមួយអង្គទៀត ដែលបានបង្ហោះរូបភាពអាសអាភាស និងរូបភាពសំញ៉ែងខ្សែក, ទូរសព្ទដៃទំនើប និងប្រាក់ដុល្លារ ជាច្រើនសន្លឹក នៅលើបណ្តាញសង្គមហ្វេសបុក។
ព្រះសង្ឃដែលកំពុងបង្ករឿងអាស្រូវ និងរំជើបរំជួលក្នុងវិស័យព្រះពុទ្ធសាសនាអង្គនេះ ត្រូវបានគេដឹងថា ព្រះនាមអគ្គមុនី វ៉ា ស៊ីណាន ជាធម្មកថិកដែលធ្លាប់គង់នៅវត្តច្បារអំពៅ ស្ថិតនៅក្នុងទីក្រុងភ្នំពេញ។ ប៉ុន្តែព្រះចៅអធិការវត្តច្បារអំពៅ ព្រះនាមសង្ឃទីប្រឹក្សា ហោ សុខុន ធ្លាប់បានបញ្ជាក់ថា ព្រះសង្ឃអង្គនេះ ត្រូវបានបណ្តេញចេញពីវត្តតាំងពីខែកុម្ភៈមកម្ល៉េះ។
លោក សេង សុមុនី អ្នកនាំពាក្យក្រសួងធម្មការនិងសាសនា បានបញ្ជាក់ថា ក្រសួងកំពុងបន្តស្វែងរកមុខព្រះសង្ឃអង្គនេះ ដើម្បីចាត់វិធានការទៅតាមធម៌វិន័យព្រះពុទ្ធសាសនា។ លោកបញ្ជាក់ថា ព្រះសង្ឃអង្គនេះនឹងត្រូវចាប់ផ្សឹក ប្រសិនបើគេរកឃើញ។ តែយ៉ាងណាក៏ដោយ ក្រសួងចង់បានការបំភ្លឺផ្ទាល់ពីព្រះសង្ឃអង្គនេះ មុននឹងមានចំណាត់ការណាមួយ ព្រោះថា ការធ្វើសកម្មភាពបែបឆ្កួតលីលាបែបនេះ អាចបណ្តាលមកពីព្រះអង្គមានជម្ងឺវិប្បលាស (ឆ្កួត) ឬគេហៅថា បែកកម្មដ្ឋាន។ ប៉ុន្តែរហូតមកទល់នឹងពេលនេះ គេនៅមិនទាន់ទទួលបានដំណឹងពីវត្តមានរបស់ព្រះសង្ឃ វ៉ា ស៊ីណាន គង់នៅទីណានៅឡើយទេ។ តែមានការលើកឡើងថា ព្រះសង្ឃអង្គនេះ កំពុងស្ថិតនៅក្នុងប្រទេសថៃ។
គួរកត់សម្គាល់ថា នេះគឺជារឿងអាស្រូវក្នុងវិស័យព្រះពុទ្ធសាសនាថ្មីមួយទៀត បន្ទាប់ពី ព្រះសង្ឃមួយអង្គព្រះនាម ឌូ សុវណ្ណឌឿន ដែលមានតួនាទីជាព្រះមេគណខេត្តកំពង់ស្ពឺផង បានឡើងច្រៀងនៅលើឆាកតន្រ្តីសម័យឲ្យពុទ្ធបរិស័ទរាំ នៅក្នុងឱកាសនៃពិធីបុណ្យចូលឆ្នាំថ្មីប្រពៃណីជាតិ។ ហើយថ្មីៗនេះទៀតសោត នៅលើបណ្តាញសង្គមហ្វេសបុក ក៏មានការលេចចេញរូបភាពព្រះសង្ឃមួយអង្គទៀត ដែលកំពុងនែបនិត្យជាមួយនឹងស្រ្តីវ័យក្មេង២នាក់។ ប៉ុន្តែលោក សេង សុមុនី បញ្ជាក់ថា នោះគឺជារូបភាពចាស់ ដែលអ្នកប្រើប្រាស់ហ្វេសបុកមួយចំនួន បានបង្ហោះវាឡើងវិញ ដើម្បីបង្ខូចតម្លៃព្រះពុទ្ធសាសនា។
យ៉ាងណាក៏ដោយ ទង្វើឬសកម្មភាពរបស់ភិក្ខុសង្ឃមួយចំនួនក្នុងពេលបច្ចុប្បន្ននេះ កំពុងទាញតម្លៃព្រះពុទ្ធសាសនាឲ្យធ្លាក់ចុះ ខណៈមានការរិះគន់ទៅលើសកម្មភាពរបស់ព្រះសង្ឃមួយចំនួន។ អំណឹះតទៅ ក្រសួងធម្មការនិងសាសនា ឬមន្រ្តីសង្ឃគ្រាក់ៗ គួរពិនិត្យពិច័យឲ្យបានច្បាស់ មុននឹងសម្រេចឲ្យបុគ្គលណាម្នាក់ចូលបួសនៅក្នុងព្រះពុទ្ធសាសនា នោះគឺដើម្បីជៀសវាងកុំឲ្យបុគ្គលនោះ ធ្វើឲ្យខូចតម្លៃព្រះពុទ្ធសាសនា និងព្រះសង្ឃឯទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ