ជនជាតិចិនជិត១០០០នាក់ហើយដែលត្រូវបានឃាត់ខ្លួនពីករណីជំរិតទារប្រាក់តាមទូរស័ព្ទនៅកម្ពុជា
ជនជាតិចិន ត្រូវបានចាប់ និងបញ្ជូនត្រលប់ទៅវិញជុំវិញករណីជំរិតទារប្រាក់តាមទូរស័ព្ទ និងប្រព័ន្ធអ៊ីនធើណេត គិតចាប់តាំងពីឆ្នាំ២០១១ មកទល់នឹងពេលនេះ សរុបមានចំនួន១៣ករណី និងឃាត់ខ្លួនបានប្រមាណជាង៩០០នាក់។ ហើយតួលេខនេះគឺគិតទាំងករណីចុងក្រោយដែលបានកើតឡើងកាលពីថ្ងៃទី២សីហាម្សិលមិញ ដោយអាជ្ញាធរខ្មែរបានឃាត់ខ្លួនជនជាតិចិនទ្រង់ទ្រាយធំជាង២០០នាក់។
ចុះផ្សាយនៅថ្ងៃ៖
ស្តាប់ - ០១:៥២
អត្ថបទដោយ៖ ហេង ពុធីរៈ
លោក អ៊ុក ហៃសិលា ប្រធានផ្នែកស៊ើបអង្កេត និងអនុវត្តនីតិវិធី នៃអគ្គនាយកដ្ឋាន អន្តោប្រវេសន៍ក្រសួង មហាផ្ទៃ បានប្រាប់វិទ្យុបារាំងនៅថ្ងៃនេះថា ក្រោយពីមានការផ្ដល់ព័ត៌មានពីភាគីចិន អគ្គនាយកដ្ឋានអន្តោប្រវេសន៍នៃក្រសួងមហាផ្ទៃ បានសហការគ្នាជាមួយក្រសួងទូរគមនាគមន៍ ដើម្បីស្រាវជ្រាវបន្ត រួចចុះចាប់បានជនជាតិចិនចំនួន២០០នាក់ ភ្លាមៗដោយផ្ទាល់ជាមួយអគ្គស្នងការដ្ឋាននគរបាលជាតិ នៅពេលដែលជនជាតិចិនទាំងនោះកំពុងតែឆបោកតាមទូរស័ព្ទ។ លោកបានបន្ថែមទៀតថា ក្រសួងកំពុងតែរៀបចំទាក់ទងគ្នាជាមួយភាគីចិន ដើម្បីបញ្ជួនជនជាតិចិនទាំងនោះ ចេញពីប្រទេសកម្ពុជាទៅប្រទេសចិនវិញក្នុងរយៈពេលមួយអាទិត្យ។
កាលពីថ្ងៃទី៦ខែកក្កដា និង ថ្ងៃទី២៦កក្កដា ឆ្នាំ២០១៧ សមត្ថកិច្ចបានបង្ក្រាបជនជាតិចិនចំពោះករណីដដែលនេះ ចំនូន២ករណី ដែលមានជនសង្ស័យសរុប១០៤នាក់ និងនៅដើមខែសីហានេះ បង្ក្រាបបាន១ករណីជាង ២០០នាក់ថែមទៀត។ ខណៈពេលនេះតុលាការកំពុងតែធ្វើការសាកសួរបន្ត ដោយបានបញ្ជាក់ថាពួកគេគឺប្រកបរបរតែមួយគត់គឺជំរិតទារប្រាក់តាមទូរស័ព្ទ និងប្រព័ន្ធអ៊ីនធើណេត។
គួរកត់សម្គាល់ថា ឆ្នាំ២០១៧នេះគឺជាឆ្នាំដែលចាប់បានជនជាតិចិនក្នុងករណីដូចគ្នានេះច្រើនជាងគេ ដែលមានចំនួនជាង ៣០០នាក់ នៃចំនួនសរុបជាង៩០០នាក់ គិតចំពោះទាំង១៣ករណី ដែលកើតឡើងតាំងពីឆ្នាំ២០១១មក។
ចំពោះករណីចុងក្រោយនេះ គឺជាការបង្ក្រាបដោយសមត្ថកិច្ចលើជនជាតិចិន ដែលមានលក្ខណៈទ្រង់ទ្រាយធំហើយមិនធ្លាប់មានពីមុនមក។ ពួកគេទាំងនោះបានមករស់នៅលើទឹកដីកម្ពុជាដោយខ្លះមានឬមិនមានលិខិតឆ្លងដែន និងឯកសារគ្រប់គ្រាន់ទៅតាមនិតិវិធី។
ជុំវិញបញ្ហានេះ ក្រសួងក៏បានអំពាវនាវដល់ប្រជាពលរដ្ឋខ្មែរទាំងអស់ដែលជាម្ចាស់សណ្ឋាគារ ផ្ទះសំណាក់ ឬ បន្ទប់ជួលធំៗសម្រាប់ជួលឲ្យជនជាតិបរទេសរស់នៅជាក្រុមនោះ សូមឲ្យមានការប្រុងប្រយ័ត្ន ពិនិត្យមើលពួកគេឲ្យបានច្បាស់លាស់ និងរបៀបរបបស្នាក់នៅរបស់ពួកគេប្រចាំថ្ងៃឲ្យបានជាប់លាប់ ជៀសវាងការកើតឡើងដូចករណីខាងលើនេះ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ