ការសាកសួរមន្ត្រីសង្គមស៊ីវិលនៅតុលាការកំពុងបន្ត ខណៈមានមនុស្សតវ៉ានៅខាងមុខតុលាការ
នៅរសៀលម៉ោង៦ និង៣០នាទីនេះ ការសាកសួរមន្ត្រីសង្គមស៊ីវិលទាំង៤នាក់ និងមន្ត្រីរបស់ គ.ជ.ប ម្នាក់ កំពុងតែបន្តធ្វើនៅឡើយ នៅសាលាដំបូងរាជធានីភ្នំពេញ។ ការសាកសួរបានធ្វើឡើងចាប់តាំងពីម៉ោង ៨ និង៣០នាទីព្រឹក ដោយអយ្យការសាលាដំបូងរាជធានីភ្នំពេញ ខណៈដែលនៅខាងមុខសាលាដំបូងក៏មានប្រជាពលរដ្ឋប្រមាណ១០នាក់ឈរតវ៉ា។
ចុះផ្សាយនៅថ្ងៃ៖
ស្តាប់ - ០១:៤៦
បើទោះបីជាថ្ងៃអាទិត្យក្តី ប៉ុន្តែ គិតចាប់តាំងពីម៉ោង ៨ និង៣០នាទីព្រឹក រហូតមកដល់ម៉ោង ៦ និង៣០នាទីល្ងាចនេះ សាលាដំបូងរាជធានីភ្នំពេញ មិនទាន់បញ្ចប់ការសាកសួរមន្ត្រីសមាគមអាដហុកចំនួន៤នាក់ និងអគ្គលេខាធិការរងគណៈកម្មាធិការជាតិរៀបចំការបោះឆ្នោត ទាក់ទងនឹងអំពើពុករលួយនៅឡើយទេ។ មន្ត្រីទាំង៥នាក់នោះរួមមាន លោកនី ចរិយា អគ្គលេខាធិការរង គជប និងមន្ដ្រី៤រូបមកពីសមាគមអាដហុក មានជាអាថិ៍៖ លោក នី សុខា លោក យី សុខសាន្ត លោក ណៃ វ៉ងដា និងលោកស្រី លឹម មុនី។
ខណៈដែលអយ្យការ និងចៅក្រមកំពុងតែស៊ើបសួរបុគ្គលទាំង៥រូប ដែលទើបតែបញ្ចប់ការសាកសួរ និងឃាត់ខ្លួនដោយអង្គភាពប្រឆាំងអំពើពុករលួយនោះ នៅខាងមុខសាលាដំបូងមានប្រជាពលរដ្ឋប្រមាណ១០នាក់ បានកាន់មេក្រូស្រែកទាមទារឲ្យទម្លាក់បទចោទលើបុគ្គលទាំង៥រូបនោះ ហើយក៏មានដែរការរុញច្រានគ្នារវាងក្រុមប្រជាពលរដ្ឋសហគមន៍បឹងកក់ និងអាជ្ញាធររដ្ឋាភិបាលដែលដាក់ពង្រាយនៅក្បែរអគារតុលាការ។
ក្រៅពីក្រុមប្រជាពលរដ្ឋដែលកំពុងតវ៉ាក៏មានសាច់ញាតិ ប្រពន្ធកូន របស់មន្ត្រីទាំង៥រូបនេះ នៅឈរខាងក្រៅរបងសាលាដំបូងចាំស្តាប់លទ្ធផលពីតុលាការ។ ក្រុមគ្រួសាររបស់អ្នកទាំង៥រូប ក៏បានអំពាវនាវឲ្យតុលាការដោះលែងអ្នកទាំង៥រូបនោះផងដែរ។
សូមបញ្ជាក់ថា មន្ត្រីអង្គការ និងអគ្គលេខាធិការរង គ.ជ.ប. ទាំងនោះ ត្រូវបាន ACU ឃាត់ខ្លួន កាលពីថ្ងៃទី២៨ ខែមេសា បន្ទាប់ពីអ្នកទាំងនោះបានចូលខ្លួនទៅបំភ្លឺជាបន្តបន្ទាប់តាមការកោះហៅ កាលពីថ្ងៃទី២៧ និងថ្ងៃទី២៨ ខែមេសា កន្លងមកដែលពាក់ព័ន្ធនឹងការឆ្លើយដាក់ពីកញ្ញា ខុម ចាន់តារ៉ាទី ហៅស្រីមុំ ក្នុងសំណុំរឿងខ្សែអាត់សំឡេង ដែលគេសង្ស័យថាជាសម្លេងលោកកឹម សុខា អនុប្រធានគណបក្សសង្រ្គោះជាតិ និងកញ្ញា ខុម ចាន់តារ៉ាទី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ