រដ្ឋាភិបាលត្រៀមកងកម្លាំង៨ម៉ឺននាក់ដើម្បីការពារសន្តិសុខការបោះឆ្នោតជាតិនាពេលខាងមុខ
រដ្ឋាភិបាលកម្ពុជា បានត្រៀមកងកម្លាំងប្រមាណ៨ម៉ឺននាក់ ដើម្បីចូលរួមការពារសន្តិសុខ និងសណ្តាប់ធ្នាប់នៅក្នុងអំឡុងពេលបោះឆ្នោតជាតិនាថ្ងៃទី២៩ ខែកក្កដាខាងមុខ។ នេះបើតាមការអះអាងរបស់លោកគៀត ច័ន្ទថារិទ្ធ អគ្គស្នងការរងនគរបាលជាតិ។ ចំពោះចំនួននេះ អង្គការឃ្លាំមើលការបោះឆ្នោតនៅកម្ពុជាមើលឃើញថាមានចំនួនច្រើនជាងពេលបោះឆ្នោតមុនៗ។ ការណ៍នេះធ្វើឲ្យពួកគេបារម្ភថា វាអាចនឹងប៉ះពាល់ដល់អារម្មណ៍របស់ពលរដ្ឋដែលទៅបោះឆ្នោត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៦
កងកម្លាំងប្រដាប់អាវុធមកពីកងយោធពលខេមរភូមិន្ទ និងកងរាជអាវុធហត្ថជាង៥ម៉ឺននាក់បូករួមទាំងកម្លាំងប្រជាការពារជាងពីរម៉ឺន៥ពាន់នាក់ទៀត ត្រូវបានអគ្គស្នងការដ្ឋាននគរបាលជាតិត្រៀមសម្រាប់ចូលរួមការពារសន្តិសុខ និងសណ្តាប់ធ្នាប់នៅថ្ងៃបោះឆ្នោតជាតិ២៩ កក្កដា។ លោកគៀត ច័ន្ទថារិទ្ធ អគ្គស្នងការរងនិងជាអ្នកនាំពាក្យអគ្គស្នងការដ្ឋាននគរបាលជាតិបានបញ្ជាក់ថា កងកម្លាំងជាង៥ម៉ឺននាក់ នឹងត្រូវដាក់ពង្រាយនៅការិយាល័យបោះឆ្នោតនីមួយៗ រីឯកម្លាំងប្រជាការពារវិញ នឹងត្រូវដាក់ឲ្យប្រចាំការនៅតាមឃុំ សង្កាត់និងក្រុង ស្រុក ខណ្ឌ ដើម្បីទុកត្រៀមជួយអន្តរាគមន៍ក្នុងករណីមានភាពអសកម្មណាមួយកើតឡើង។
បើបៀបធៀបនឹងការបោះឆ្នោតឃុំ សង្កាត់កាលពីឆ្នាំ២០១៧កន្លងទៅ ការត្រៀមកងកម្លាំងសម្រាប់ការពារសន្តិសុខការបោះឆ្នោតជាតិនៅឆ្នាំនេះ គឺមានចំនួនច្រើនជាងគួរសម ដោយកាលពីការបោះឆ្នោតឃុំ សង្កាត់ រដ្ឋាភិបាលកម្ពុជាបញ្ចេញកងកម្លាំងតែជាង៥ម៉ឺននាក់។ ការណ៍នេះធ្វើឲ្យអង្គការឃ្លាំមើលការបោះឆ្នោតនៅកម្ពុជាមានការព្រួយបារម្ភ។ បារម្ភនៅត្រង់ថា វាអាចនឹងធ្វើឲ្យប្រជាពលរដ្ឋទៅបោះឆ្នោត និងអ្នកសង្កេតការណ៍បោះឆ្នោតមានអារម្មណ៍ភ័យខ្លាចនៅពេលឃើញមានកងកម្លាំងច្រើននៅជិតការិយាល័យបោះឆ្នោតនោះ។ នេះបើតាមការអះអាងរបស់លោកសំ គន្ធាមី នាយកប្រតិបត្តិអង្គការនិកហ្វិក។
ក៏ប៉ុន្តែលោកគៀត ច័ន្ទថារិទ្ធ បានបកស្រាយថា ការដែលអគ្គស្នងការដ្ឋាននគរបាលជាតិបង្កើនកងកម្លាំងការពារសន្តិសុខបែបនេះ គឺមិនមែនសំដៅបំភ័យឬគំរាមកំហែងប្រជាពលរដ្ឋអ្វីទេ តែជាការបង្កើន ដើម្បីឲ្យស្របទៅនឹងចំនួនកើនឡើងនៃការិយាល័យបោះឆ្នោតតែប៉ុណ្ណោះ។
ការបោះឆ្នោតជ្រើសតាំងតំណាងរាស្រ្តអាណត្តិទី៦ នឹងធ្វើឡើងនៅថ្ងៃទី២៩ ខែកក្កដា ពោល គឺនៅសល់ពេលតែជាង៣ខែទៀតប៉ុណ្ណោះ។ ចំពោះបញ្ហាសន្តិសុខនៅថ្ងៃបោះឆ្នោតនេះដែរ គណៈកម្មាធិការជាតិរៀបចំការបោះឆ្នោត(គ.ជ.ប)ក៏បានចេញការណែនាំ៥ចំណុចដល់ប្រធានគណៈកម្មការរាជធានី-ខេត្តរៀបចំការបោះឆ្នោត។ ចំណុចទាំងនេះ មានជាអាទិ៍ គឺតម្រូវឲ្យពង្រឹងទំនាក់ទំនងនិងសហការឲ្យកាន់តែខ្លាំងជាមួយនឹងអាជ្ញាធរមានសមត្ថកិច្ច។ ក្រៅពីនេះ គ.ជ.ប ក៏បានជំរុញឲ្យអាជ្ញាធររៀបចំការបោះឆ្នោតត្រូវតាមដានត្រួតពិនិត្យសភាពការណ៍ និងសុំអន្តរាគមន៍ពីកម្លាំងមានសមត្ថកិច្ចបើមានករណីអុកឡុក គំរាមកំហែងនិងអំពើហិង្សាក្នុងពេលបោះឆ្នោត។ បន្ថែមលើនេះ ក៏មានដែរ ត្រូវផ្តល់ព័ត៌មាន ឬរបាយការណ៍ជាប្រចាំអំពីស្ថានភាពសន្តិសុខ សុវត្ថិភាព ជុំវិញដំណើរការនៃការបោះឆ្នោតផ្ញើជូនអគ្គលេខាធិការដ្ឋាន គ.ជ.បឲ្យបានទៀងទាត់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ