រដ្ឋមន្ត្រីការពារជាតិកម្ពុជា បញ្ជារឲ្យកងកម្លាំងត្រៀមបង្ក្រាបចលនាសង្គ្រោះជាតិ បើកើតមាននៅកម្ពុជា
រដ្ឋមន្ត្រីការពារជាតិកម្ពុជា បានព្រមានកម្ទេចចលនាសង្គ្រោះជាតិ ដែលកំពុងផ្តួចផ្តើមបង្កើតឡើងដោយលោក សម រង្ស៊ី អតីតប្រធានគណបក្សសង្គ្រោះជាតិ។ ទន្ទឹមគ្នានេះ នៅក្នុងថ្ងៃតែមួយ រដ្ឋមន្ត្រីក្រសួងមហាផ្ទៃកម្ពុជា បានថ្លែងដែរថា ការបោះឆ្នោតនៅកម្ពុជា នឹងប្រព្រឹត្តដោយរលូន បើទោះបីជាមានអ្នកគ្រោងធ្វើសកម្មភាពបង្ករឿងក៏ដោយ។
ចុះផ្សាយនៅថ្ងៃ៖
ស្តាប់ - ០២:២៦
លោកឧបនាយករដ្ឋមន្ត្រី ទៀ បាញ់ រដ្ឋមន្ត្រីក្រសួងការពារជាតិកម្ពុជា បានព្រមានបង្ក្រាបជាមុន នូវចលនាដែលមានឈ្មោះថា “សង្គ្រោះជាតិ” ដែលទើបផ្តួចផ្តើមគំនិតបង្កើតឡើងដោយលោក សម រង្ស៊ី អតីតប្រធានគណបក្សសង្គ្រោះជាតិ។ លោកឧបនាយករដ្ឋមន្ត្រី ដែលបានថ្លែងនៅក្នុងពិធី បិទសន្និបាតបូកសរុបលទ្ធផលការងារកងរាជអាវុធហត្ថលើផ្ទៃប្រទេសសម្រាប់ឆ្នាំ២០១៧ និងលើកទិសដៅការងារឆ្នាំ២០១៨ នៅឯទីបញ្ជាការដ្ឋានកងរាជអាវុធហត្ថលើផ្ទៃប្រទេស កាលពីព្រឹកថ្ងៃទី ២៣ មករា នេះ បានណែនាំឲ្យកងកម្លាំងប្រដាប់អាវុធទាំងអស់ ត្រៀមខ្លួនឲ្យរួចរាល់ ប្រសិនបើចលនាថ្មីនេះ កើតមានឡើងនៅក្នុងប្រទេសកម្ពុជា។ លោកឧបនាយករដ្ឋមន្ត្រីទៀ បាញ់ បានចោទប្រកាន់ ចលនាថ្មីនេះ មានគម្រោងបង្កជាអំពើហិង្សា នៅក្នុងប្រទេសកម្ពុជាតែម្តង។
ទន្ទឹមគ្នានេះ លោកនាយឧត្តមសេនីយ៍ សៅ សុខា មេបញ្ជាការកងរាជអាវុធហត្ថលើផ្ទៃប្រទេស ក៏បានថ្លែងនៅក្នុងកិច្ចប្រជុំនេះដែរ ដោយបានចាត់ទុក «ចលនាសង្គ្រោះជាតិ» នោះថា គឺជាសកម្មភាពភេវកម្មសុទ្ធសាត ហើយកងរាជអាវុធហត្ថ នឹងមិនបណ្ដោយឲ្យ លោក សម រង្ស៊ី ធ្វើអ្វីស្រេចតែចិត្តនោះទេ ហើយថា កងរាជអាវុធហត្ថត្រៀមខ្លួនជានិច្ច ដើម្បីទប់ស្កាត់សកម្មភាពទាំងនោះ។
គួរជំរាបជូនថា កាលពីថ្ងៃទី ១២ មករា ដើមឆ្នាំ២០១៨នេះ អតីតសមាជិកនៃអតីតគណបក្សសង្គ្រោះជាតិមួយក្រុមដឹកនាំដោយលោក សម រង្ស៊ី បានប្រកាសពីក្រៅប្រទេស ដោយបង្កើតឡើងនូវចលនាសង្គ្រោះជាតិថ្មីមួយ ក្រៅពីគណបក្សសង្គ្រោះជាតិ ដើម្បីធ្វើសកម្មភាពស្រោចស្រង់លទ្ធិប្រជាធិបតេយ្យនៅកម្ពុជា។ បើតាមសេចក្តីថ្លែងការណ៍ ចលនាថ្មីនេះ ក៏មានបេសកម្មទាមទារឲ្យមានការដោះលែងលោក កឹម សុខា រួមជាមួយអ្នកទោសនយោបាយ និងទាមទារឲ្យមានការបើកឲ្យដំណើរការឡើងវិញនូវអតីតគណបក្សសង្គ្រោះជាតិ ដើម្បីចូលរួមក្នុងការបោះឆ្នោតនៅខែកក្កដា ឆ្នាំ២០១៨ នេះ។ ចលនាដែលបង្កើតឡើងដោយលោក សម រង្ស៊ី អតីតប្រធានគណបក្សសង្គ្រោះជាតិនេះ គ្រោងនឹងប្រកាសជាផ្លូវការ នៅចុងខែមករា ឆ្នាំ ២០១៨ នេះ។
ទន្ទឹមនឹងការព្រមានពីរដ្ឋមន្ត្រីការពារជាតិ នៅថ្ងៃនេះដែរ លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ ក៏បានធានាថា ការបោះឆ្នោតនៅកម្ពុជា នឹងប្រព្រឹត្តដោយរលូន បើទោះបីជាមានអ្នកគ្រោងធ្វើសកម្មភាពបង្ករឿងក៏ដោយ។ ការលើកឡើងរបស់លោកឧបនាយករដ្ឋមន្ត្រី ស ខេង គឺសំដៅដោយត្រង់ ទៅលើចលនាថ្មីរបស់លោក សម រង្ស៊ី ដែលទើបតែប្រកាសបង្កើតឡើងនាពេលថ្មីៗនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ