បន្ទាប់ពីអង្គការសមាគមក្នុងស្រុក អង្គការអន្តរជាតិ ថ្កោលទោសចំពោះចំណាត់ការរបស់ ACU
អង្គការអន្តរជាតិ ដែលធ្វើការពាក់ព័ន្ធនឹងសិទ្ធិមនុស្ស បានចេញសេចក្តីថ្លែងការណ៍ជាបន្តបន្ទាប់ថ្កោលទោសចំពោះចំណាត់ការរបស់អង្គភាពប្រឆាំងអំពើពុករលួយ ពាក់ព័ន្ធនឹងករណីការឃាត់មន្រ្តីសង្គមស៊ីវិល និងមន្រ្តីជាន់ខ្ពស់ គជប។ បើតាមសេចក្តីថ្លែងការណ៍ អង្គការអន្តរជាតិទាំងនោះ ចាត់ទុកថា ចំណាត់ការនេះ គឺធ្វើឲ្យប៉ះពាល់ដល់ការបំពេញការងាររបស់មន្រ្តីសង្គមស៊ីវិល ដែលធ្វើការបម្រើប្រជាពលរដ្ឋ និងអំពាវនាវឲ្យតុលាការទម្លាក់ការចោទប្រកាន់។សេចក្តីរាយការណ៍ដោយ សរ ពិសី៖
ចុះផ្សាយនៅថ្ងៃ៖
ស្តាប់ - ០២:១៧
«អាជ្ញាធរ និងគណបក្សប្រជាជនកម្ពុជា ត្រូវតែបញ្ឈប់ជាបន្ទាន់ នូវយុទ្ធនាការដែលកំពុងដំណើរការ និងមិនស្របច្បាប់របស់ខ្លួនក្នុងការយាយីគណបក្សប្រឆាំង និងធ្វើឱ្យប៉ះពាល់ដល់ការងាររបស់ក្រុមមន្រ្តីការពារសិទ្ធិមនុស្ស និង អ្នកធ្វើអត្ថាធិប្បាយនយោបាយ»។ នេះបើតាមសេចក្តីថ្លែងការណ៍របស់អង្គការលើកលែងទោសអន្តរជាតិ ចុះពីថ្ងៃទី ០៣ ខែ ឧសភា។
អង្គការលើកលែងទោសអន្តរជាតិ (Amnesty International) ចាត់ទុកថា នៅខណៈពេលនេះគឺជាពេលវេលាមួយដ៏សមស្រប ដែលសហគមន៍អន្តរជាតិ ត្រូវលូកដៃ និងអំពាវនាវឲ្យមានការបញ្ឈប់ការគំរាមគំហែង ដែលធ្វើឱ្យខូចខាតយ៉ាងខ្លាំងទៅលើសិទ្ធិជាសាកលរបស់ប្រជាជនកម្ពុជា ដែលធានាការពារដោយរដ្ឋធម្មនុញ្ញ។
ជាមួយគ្នានេះដែរ លោកស្រី អេលេណា ប៉ានហ្វីឡូរ៉ា អនុប្រធានក្រុមប្រឹក្សាភិបាលរបស់អង្គការតម្លាភាពអន្តជាតិ បានមានប្រសាសន៍ថា អង្គការតម្លាភាពអន្តរជាតិ មានការព្រួយបារម្ភយ៉ាងខ្លាំងចំពោះ ការកើនឡើងការជ្រៀតជ្រែក ផ្នែក នយោបាយ និងការគំរាមគំហែង ដល់អ្នកការពារសិទ្ធិមនុស្ស និងអ្នកប្រឆាំងអំពើពុករលួយ។
លោកស្រី សង្កត់ធ្ងន់ថា អង្គភាពប្រឆាំងអំពើពុករលួយ មិនគួរអនុវត្តតួនាទីរបស់ខ្លួនដើម្បី យាយី និងព្យាយាមបំបិទសម្លេងសកម្មជនសង្គមស៊ីវិល ហើយចាត់ទុកថា ការអនុវត្តបែបនេះ គឺបញ្ជូនសារអវិជ្ជមានទៅកាន់ប្រជាពលរដ្ឋខ្មែរ។
មិនខុសគ្នាពីស្ថាប័នអន្តរជាតិ ទាំងពីរខាងលើ អង្គការឃ្លាំមើលសិទ្ធិមនុស្ស Human Rights Watch បានឲ្យដឹងថា ដើម្បីធានានិរន្តភាពសិទ្ធិមនុស្សនៅកម្ពុជា ម្ចាស់ជំនួយ ព្រមទាំងអង្គការសហប្រជាជាតិ ត្រូវតែធ្វើការរួមគ្នាដើម្បីប្រឆាំងនឹងចំណាត់ការរបស់រដ្ឋាភិបាល និង សកម្មភាពផ្សេងៗទៀតដែលកំពុងតែបំភ័យសកម្មជនសិទ្ធិមនុស្ស។
លោក ប្រេដ អាដាម នាយកប្រតិបត្តិទទួលបន្ទុកតំបន់អាស៊ីនៃអង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch) យល់ថា វាគឺជាការគំរាមគំហែងដោយរងឥទ្ធិពិលនៃនយោបាយយ៉ាងធ្ងន់ធ្ងរ។
មន្ត្រីអង្គការសិទ្ធិមនុស្សអាដហុក ៤រូប រួមទាំងអគ្គលេខាធិការរងគណៈកម្មាធិការជាតិរៀបចំការបោះឆ្នោតមួយរូប គឺ លោក នី ចរិយា ត្រូវបានព្រះរាជអាជ្ញាសាលាដំបូងរាជធានីចោទប្រកាន់ពីបទសូកប៉ាន់សាក្សី និងបញ្ជូនបន្តទៅចៅក្រមស៊ើបសួរ ដែលបទល្មើសនេះ អាចត្រូវផ្តន្ទាទោសដាក់ពន្ធនាគារ ពី ៥ ឆ្នាំ ទៅ ១០ ឆ្នាំ។
សូមរំឮកជូនដែរថា ការជាប់ឃុំរបស់មន្រ្តីសិទ្ធិមនុស្សទាំង ៤ រូប និង អគ្គលេខាធិការរង គជប ១ រូប ផ្តើមចេញពីរឿងរ៉ាវ ដែលជាប់ពាក់ព័ន្ធនឹងទំនាក់ទំនងស្នេហា រវាង លោក កឹម សុខា និង កញ្ញា ខុម ចាន់តារ៉ាទី ហៅស្រីមុំ ដែលពេលនេះ កំពុងនៅក្នុងនិតិវិធីតុលាការនៅឡើយ។ ជាមួយគ្នានេះដែរ កាលពីថ្ងៃទី ០៣ ខែ ឧសភា ដែរ លោក កឹម សុខា និងតំណាងរាស្រ្តទាំងពីរ របស់គណបក្សប្រឆាំង ក៏ត្រូវបានតុលាការចេញដីការកោះហៅសាកសួរដែរ ក្នុងនោះ លោក កឹម សុខា ត្រូវបំភ្លឺទាក់ទងនឹងបណ្តឹងរបស់ កញ្ញា ធី សុវណ្ណថា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ