អាជ្ញាធរ ទុកពេល៣ ថ្ងៃ ឲ្យពលរដ្ឋរុះរើសំណង់នៅតំបន់ឧទ្យានអង្គរ
ចាប់តាំងពីថ្ងៃម្សិលមិញ អាជ្ញាធរផ្តើមរុះរើសំណង់របស់ប្រជាពលរដ្ឋដែលសាងសង់គ្មានការអនុញ្ញាតនៅតំបន់អង្គរ ចន្លោះថ្ងៃទី ២០ ឧសភា ដល់ថ្ងៃទី ២ មិថុនា។ បើតាមនាយកប៉ុស្តិ៍សង្កាត់នគរធំ អាជ្ញាធរអប្សរាទុកពេលឲ្យប្រជាពលរដ្ឋ ៣ ថ្ងៃទៀត រុះរើចេញដោយខ្លួនឯង បើមិនដូច្នោះទេ អាជ្ញាធរនឹងរុះរើដោយខ្លួនឯងនិងមិនទទួលខុសត្រូវចំពោះការខូចខាតអ្វីនោះទេ។
ចុះផ្សាយនៅថ្ងៃ៖
ស្តាប់ - ០២:១២
លោក ហុក ប៉េងសែ អគ្គនាយករងអាជ្ញាធរជាតិអប្សរា បានបញ្ជាក់ថាសំណង់ដែលត្រូវរុះរើពេលនេះសុទ្ធតែជាសំណង់ដែលពុំមានច្បាប់អនុញ្ញាត ហើយប៉ះពាល់អវិជ្ជមានខ្លាំងដល់បេតិកភណ្ឌផ្ទាល់ ដោយសារតែសំណង់ទាំងនេះស្ថិតនៅចំងាយប្រមាណតែ៥០ម៉ែត្រពីកំពែងប្រាសាទប៉ុណ្ណោះ។
អាជ្ញាធរជាតិអប្សរា នៅថ្ងៃទី ៨ មិថុនា បានចេញសេចក្តីជូនដំណឹងដល់គ្រប់ម្ចាស់សំណង់ទាំងអស់ឲ្យរុះរើនូវសំណង់ ដីចាក់បំពេញចេញវិញក្នុងរយ:ពេលមួយសប្តាហ៍។ បន្ទាប់ពីសង្កេតឃើញថាសំណង់ ចំនួន៥២១ករណីបានសាងសង់នៅតំបន់ទី១ និងតំបន់ទី២ និងចាក់ដីបំពេញក្នុងតំបន់រមណីយដ្ឋានអង្គរក្នុងចន្លោះថ្ងៃទី២០ ខែឧសភា រហូតដល់ថ្ងៃទី២០ ខែមិថុនា កន្លងមក។ ក៏ប៉ុន្តែភា្លមៗក្រោយចេញសេចក្តីអំពាវនាវនេះ មិនមានប្រជាពលរដ្ឋរុះរើចេញនោះឡើយ។
រហូតដល់ថ្ងៃទី ១៩ មិថុនា ប្រជាពលរដ្ឋមួយចំនួន រស់នៅភូមិរហាល សង្កាត់នគរធំ ក្រុងសៀមរាបបានសម្រេចធ្វើការរុះរើសំណង់ខុសច្បាប់របស់ខ្លួនដោយស្ម័គ្រចិត្ត ឯប្រជាពលរដ្ឋខ្លះទៀតបានចុះកិច្ចសន្យាថានឹងរុះរើ។ នេះបើតាមលោកយ៉ោម យ៉ាត នាយប៉ុស្តិ៍សង្កាត់នគរធំ ក្រុងសៀមរាប ខេត្តសៀមរាប។
ជាការកត់សម្គាល់ ចាប់ពីថ្ងៃទី២០ ឧសភាដល់ថ្ងៃទី ០២ មិថុនា គឺអំឡុងពេលនៃយុទ្ធនាការឃោសនារកសំឡេងឆ្នោត កន្លងទៅនេះ ប្រជាពលរដ្ឋរស់នៅតាមបរិវេណរមណីយដ្ឋានអង្គរ បានសម្រុកសាងសង់លំនៅដ្ឋានរបស់ខ្លួន រំលោភបំពានទៅនឹងបំរាមរបស់អាជ្ញាធរជាតិអប្សរា និងលក្ខខន្តិកៈរបស់អង្គការយូណេស្កូផងដែរ។
លោក ឡុង កុសល អ្នកនាំពាក្យអាជ្ញាធរជាតិអប្សរា បានថ្លែងថា សំណង់ទាំងនោះ មានស្ថិតនៅជិតៗប្រាសាទ ហើយខ្លះទៀតឆ្ងាយពីប្រាសាទ តែក៏បង្កផលប៉ះពាល់ដល់បុរាណដ្ឋានប្រវត្តិសាស្រ្ត។
បន្ទាប់ពីប្រាសាទអង្គរបានចុះបញ្ជីសម្បត្តិបេតិកភណ្ឌពិភពលោក នៅឆ្នាំ១៩៩២ អង្គការយូណេស្កូ បានដាក់លក្ខខណ្ឌឲ្យកម្ពុជាជាម្ចាស់ប្រាសាទ ថែរក្សាឲ្យបានល្អប្រសើរ។ ក្នុងករណី កម្ពុជាមិនអាចធ្វើបានទេនោះ កម្ពុជានឹងមិនអាចស្នើដាក់ប្រាសាទដទៃទៅក្នុងបញ្ជីសម្បត្តិបេតិកភណ្ឌពិភពលោកនោះទេ។ បន្ថែមលើនេះ កម្ពុជាអាចប្រឈមការដកប្រាសាទអង្គរ ចេញពីបញ្ជីសម្បត្តិបេតិកភណ្ឌពិភពលោកផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ