សាលាដំបូងបដិសេធការបំភ្លឺតាមប្រព័ន្ធអ៊ីនធឺណិតរបស់ប្រធានគណបក្សប្រឆាំង
នៅថ្ងៃទី១៤ ខែសីហានេះ សាលាដំបូងរាជធានីភ្នំពេញ មិនអនុញ្ញាតឲ្យលោកសម រង្ស៊ីប្រធានគណបក្សប្រឆាំងបំភ្លឺតាមប្រព័នអ៊ីនធឺណិតនោះទេ ដោយសារតែលោកសម រង្ស៊ីជាជនជាប់សង្ស័យ មិនមែនជាសាក្សី។ ការឆ្លើយតបភ្លាមៗរបស់សាលាដំបូង ក្រោយពីលោកសម រង្ស៊ី តាមរយៈហ្វេសប៊ុករបស់ខ្លួនថាលោកយល់ព្រមទាក់ទងជាមួយតុលាការតាមប្រព័ន្ធអ៊ីនធឺណិតបំភ្លឺជុំវិញបណ្តឹង ដែលមេធាវីលោកហ៊ុន សែន បានប្តឹងរូបលោកកាលពីថ្ងៃទី១ សីហា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៨
មិនបានប៉ុន្មានម៉ោងផង ក្រោយពីលោកសម រង្ស៊ី ប្រធានគណបក្សប្រឆាំងយល់ព្រមឆ្លើយបំភ្លឺតាមប្រព័ន្ធអ៊ីនធឺណិតក្នុងករណីបណ្តឹងរបស់មេធាវីលោកហ៊ុន សែននោះ អ្នកនាំពាក្យសាលាដំបូងរាជធានីភ្នំពេញ លោក លី សុផាណាបានបញ្ជាក់ប្រាប់ក្រុមអ្នកសារព័ត៌មានតាមប្រព័ន្ធ Telegram ថាសាលាដំបូងមិនអនុញ្ញាតលើសំណើសុំរបស់ជនជាប់សង្ស័យឈ្មោះ សម រង្ស៊ី សម្រាប់ការស្តាប់ចម្លើយនៅថ្ងៃទី ១៩ ខែសីហា ២០១៦ តាមកម្មវិធី Teleconference ដោយប្រើប្រាស់ប្រព័ន្ធអ៊ីនធឺណិតទេ។
លោកលី សុផាណាជាបានបញ្ជាក់ ពីមូលហេតុថាលោកសម រង្ស៊ី ជាជនជាប់សង្ស័យមិនមែនជាសាក្សី។ លោកបន្តថាជនជាប់សង្ស័យត្រូវស្តាប់ចម្លើយចំពោះមុខព្រះរាជអាជ្ញាទៅតាមកាលបរិច្ឆេទកោះហៅ ដោយអនុលោមតាមនីតិវិធីដែលបញ្ញត្តិនៅក្នុងក្រមនីតិវីធីព្រហ្មទណ្ឌ។
លោកសម រង្ស៊ី ប្រធានគណបក្សប្រឆាំង ដែលកំពុងនិរទេសខ្លួននៅក្រៅប្រទេសនោះ បានសរសេរនៅក្នុងបណ្តាញសង្គមរបស់លោកនៅថ្ងៃទី១៤ ខែសីហាថា លោកយល់ព្រមផ្តល់ឲ្យតុលាការនូវហេតុផលទាំងឡាយ ដែលធ្វើឲ្យលោកជឿជាក់ថា រដ្ឋាភិបាលលោកហ៊ុន សែន ជាអ្នកនៅពីក្រោយខ្នងឃាតកម្ម បាញ់សម្លាប់លោកបណ្ឌិតកែម ឡី លោកជា វិជ្ជា និងលោកឈុត វុទ្ធី។ លោកសម រង្ស៊ីសរសេរបន្តថា លោកយល់ព្រមទាក់ទងជាមួយតុលាការ តាមរយៈប្រព័ន្ធអ៊ីនធឺណិត ដោយប្រើ Teleconference ដួចដែលតុលាការខ្មែរក្រហមបានទាក់ទងថ្មីៗនេះ ជាមួយសាក្សីមួយចំនួន ដែលមិនស្ថិតនៅក្នុងរាជធានីភ្នំពេញ។
លោកលី សុផាណាវិញក៏បានឲ្យដឹងទៀតថា សាលាក្តីខ្មែរក្រហមបានប្រើប្រាស់នូវតាមកម្មវិធី Teleconference ដោយប្រើប្រាស់ប្រពន្ធ័អ៊ីនធឺណិតសម្រាប់សាក្សីតែប៉ុណ្ណោះ ដែលជាវីធានការដោយឡែកហើយមិនត្រូវបានប្រើសម្រាប់ជនជាប់សង្ស័យ ឬជនត្រូវចោទឬជនជាប់ចោទនោះឡើយ។
សូមបញ្ជាក់ថាលោកសម រង្ស៊ី ត្រូវបានតុលាការក្រុងភ្នំពេញបានចេញដីកាកោះហៅឱ្យចូលខ្លួនឆ្លើយបំភ្លឺនៅថ្ងៃទី ១៩ សីហា នៅសាលាដំបូងរាជធានីភ្នំពេញ លើបណ្តឹងមួយទៀតរបស់មេធាវីលោកនាយករដ្ឋមន្ត្រីជុំវិញការ អត្ថាធិប្បាយរបស់លោក សម រង្ស៊ី និងសរសេរបង្ហោះតាមបណ្តាញសង្គម ដែលចោទរដ្ឋអំណាចរបស់លោកហ៊ុន សែន ថាជាអ្នករៀបចំអំពើភេរវកម្មបាញ់សម្លាប់លោកបណ្ឌិត កែម ឡី។
លោកសម រង្ស៊ី តាមរយៈសំណេរក្នុងហ្វេសប៊ុក ដដែលក៏បានចោទសួរលោកនាយករដ្ឋមន្ត្រីហ៊ុន សែន ថាតើហេតុអ្វីបានជាលោកនាយករដ្ឋមន្ត្រីមិនប្តឹងផងដែរ ប្រជាពលរដ្ឋជាង១០ម៉ឺននាក់ ដែលបានចុចចូលចិត្ត និងយល់ស្របតាមអ្វីដែលលោកសម រង្ស៊ីបានលើកឡើងពីករណីឃាតកម្មលោកបណ្ឌិតកែម ឡីនេះ លើទំព័រហ្វេសប៊ុករបស់លោក។
ចំណែកលោក សុខ ឥសាន្ត អ្នកនាំពាក្យគណបក្សប្រជាជនកម្ពុជាបានបញ្ជាក់ថា គេ(មេធាវីលោកនាយករដ្ឋមន្ត្រី)ប្តឹងអ្នកនិយាយ អ្នកមួលបង្កាច់ គេមិនប្តឹងអ្នកគាំទ្រទេ គេមិនប្តឹងទេ ដោយសារតែជារឿងប្រយោល។ លោកបន្ថែមថាទុកឲ្យតុលាការជាអ្នកស្រាវជ្រាវ តើអ្នកណាជាអ្នកជាប់ពាក់ព័ន្ធ៕
គួររំលឹកថា លោក សម រង្ស៊ី កំពុងតែ រស់នៅនិរទេសខ្លួនឯក្រៅប្រទេស ហើយរួមរឹតកាយដោយបណ្ដឹងចំនួន ៥ ក្នុងដែនសមត្ថកិច្ចតុលាការ ពាក់ព័ន្ធនឹង បទបរិហារកេរ្តិ៍ជាសាធារណៈ ឬ បទសមគំនិតក្នុងអំពើក្លែងបន្លំឯកសារសាធារណៈ ប្រើប្រាស់ឯកសារក្លែង។ បណ្តឹងចុងក្រោយ ត្រូវបានប្តឹងដោយមេធាវីតំណាងដោយអាណត្តិរបស់នាយករដ្ឋមន្រ្តីកម្ពុជា កាលពីថ្ងៃទី១ សីហា ២០១៦ ពាក់ព័ន្ធនឹងការវែកញែកដោយចំហរលើហ្វែសប៊ុករបស់លោក សម រង្ស៊ី ដែលចោទថា ការបាញ់សម្លាញ់លោក កែម ឡី ជាអំពើភេវរកម្ម រៀបចំដោយរដ្ឋអំណាច ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ