ពលរដ្ឋខ្មែរមួយចំនួននៅអូស្រ្តាលី គ្រោងប្រមូលផ្តុំគ្នាតវ៉ាប្រឆាំងនឹងវត្តមានលោក ហ៊ុន ម៉ាណែត
លោក ហុង លឹម តំណាងរាស្រ្តសភា ប្រចាំរដ្ឋ Victoria ប្រទេសអូស្ត្រាលី បានបញ្ជាក់ប្រាប់វិទ្យុបារាំងថា ពលរដ្ឋខ្មែររស់នៅរដ្ឋធំៗចំនួនបី ក្នុងប្រទេសអូស្រ្តាលី នឹងប្រមូលផ្តុំគ្នាលើកបដាតវ៉ាប្រឆាំងនឹងវត្តមានលោក ហ៊ុន ម៉ាណែត កូនប្រុសលោកនាយករដ្ឋមន្រ្តី ហ៊ុន សែន លើទឹកដីអូស្ត្រាលី។ លោក ហ៊ុន ម៉ាណែត ដែលមានគម្រោងដឹកនាំកម្មវិធីជួបជុំសមាជិកថ្មីបក្សប្រជាជនកម្ពុជា នៅអូស្ត្រាលី នៅយប់ថ្ងៃទី៧តុលា គឺ ចំពេលតែមួយនឹងពិធីកាន់ទុក្ខ១០០ថ្ងៃ របស់សហគមន៍ខ្មែរនៅអូស្រា្តលី ជូនលោក បណ្ឌិត កែម ឡី។ បើទោះបីជាយ៉ាងដូច្នេះក៏ដោយ បក្សប្រជាជនកម្ពុជាអះអាងថា នឹងនៅបន្តរៀបចំពិធីជួបជុំសមាជិកថ្មី នៅប្រទេសអូស្រ្តាលីដដែល គ្មានការប្រែប្រួលឡើយ បើទោះជាត្រូវប្រឈមនឹងការធ្វើបាតុកម្មតវ៉ាក្ដី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
លោក ហុង លឹម តំណាងរាស្រ្តសភា ប្រចាំរដ្ឋ Victoria ប្រទេសអូស្រា្តលី បានប្រាប់វិទ្យុបារាំងអន្តរជាតិ តាមខ្សែទូរស័ព្ទ ពីប្រទេសអូស្រ្តាលីថា នឹងមានពលរដ្ឋខ្មែរ រាប់រយនាក់ ចូលរួមបាតុកម្ម នៅមុខ ភោជនីយដ្ឋាន អាណាប៊ែលឡា ទីក្រុងម៉ែលប៊ន ប្រឆាំងនឹង កូនប្រុសលោក នាយករដ្ឋមន្រ្តី ហ៊ុន សែន ដែលនឹងដឹកនាំពិធីជួបជុំស្វាគមន៍សមាជិកថ្មី បក្សប្រជាជនកម្ពុជា នៅយប់ថ្ងៃទី៧ ខែតុលា គឺចំពេលដែល សហគមន៍ខ្មែរនៅអូស្រ្តាលី កំពុងកាន់ទុក្ខ១០០ថ្ងៃ ជូនលោកបណ្ឌិត កែម ឡី។
លោកបានស្នើថា ពិធីនេះ គួររង់ចាំឲ្យចប់ការកាន់ទុក្ខចប់សិន ដោយចាត់ទុកថា ការជប់លាងក្នុងពេលកំពុងកាន់ទុក្ខ នេះ ជាការប្រមាថមើលងាយ ចំពោះវិញ្ញាណក្ខ័ន្ត របស់ លោក កែម ឡី និង ប្រមាថពលររដ្ឋខ្មែរ ដែលកំពុងកាន់ទុក្ខ ព្រមទាំង បន្ថែមកំលួសកំហឹងពុះកញ្ជ្រោលក្នុងចិត្ត កាន់តែខ្លាំងថែមទៀត។
តំណាងរាស្រ្តសភា ប្រចាំរដ្ឋ Victoria រូបនេះ សម្តែងការបារម្ភថា បាតុកម្មនេះ អាចឈានដល់ប៉ះទង្គិចគ្នា រវាងកងអង្គរក្សលោក ហ៊ុន ម៉ាណែត និងពលរដ្ឋខ្មែរនៅអូស្រា្តលី ដែលលើកគ្នាតវ៉ា ឬបណ្តាលឲ្យកកស្ទុះចរាចរណ៍ដែរ ទើបប៉ូលីសអូស្រ្តាលី បានប្រកាសបិទផ្លូវនាបរិវេណតវ៉ានោះ។ លោកបន្ថែមថា ពលរដ្ឋខ្មែរ រស់នៅ ក្នុងរដ្ឋធំៗបី រួមមាន រដ្ឋអូស្រ្តាលីខាងត្បូង ស៊ីដនី និងម៉ែលប៊ន រាប់រយនាក់ នឹងរៀបចំបាតុកម្ម ប្រឆាំង វត្តមានកូនលោកនាយករដ្ឋមន្រ្តី លើទឹកដីអូស្រ្តាលី ដែលជាឱកាសបញ្ចេញឆន្ទៈ មិនសប្បាយចិត្ត នឹងរបបដឹកនាំសព្វថ្ងៃ។
អ្នកនាំពាក្យបក្សប្រជាជនកម្ពុជា លោក សុខ ឥសាន្ត បានថ្លែងថា វាជាសិទ្ធិសម្តែងមតិស្របច្បាប់ សហគមន៍ខ្មែរនៅអូស្ត្រាលី ក្នុងការតវ៉ា។ ទោះបីជាយ៉ាងណា លោក សុខ ឥសាន្ត បានបញ្ជាក់ថា បក្សប្រជាជនកម្ពុជានឹងមិនលើកថ្ងៃ រៀបចំពិធី ទទួលស្វាគមន៍សមាជិកថ្មីនេះឡើយ ដោយចាត់ទុកថា ពិធីកាន់ទុក្ខមរណភាពមួយរយថ្ងៃ និងពិធីជួបជុំសមាជិកបក្ស ជារឿងដោយឡែកពីគ្នា ឬជារឿងដើមផ្លូវចុងផ្លូវ។
គួរជម្រាបថា កាលពីថ្ងៃទី១០ ខែសីហា ឆ្នាំ២០១៦ ក្រសួងការបរទេសកម្ពុជា បានចេញសេចក្តីថ្លែងការណ៍មួយ ចាត់ទុក បុគ្គល ហុង លឹម ជា «ជនមិនត្រូវបានស្វាគមន៍» និង មិនត្រូវបានអនុញ្ញាតឲ្យចូលក្នុងប្រទេសកម្ពុជាឡើយ បន្ទាប់ពី តំណាងរាស្រ្ត រដ្ឋ Victoria រូបនេះ បានផ្តល់បទសម្ភាសន៍ជាមួយនឹង វិទ្យុអាស៊ីសេរី កាលពីថ្ងៃពុធ ទី៣ កក្កដា ប្រដូច របបដឹកនាំនៅកម្ពុជា សព្វថ្ងៃ ជា របបតិរច្ឆាន។ តែ លោក ហុង លឹម បានចាត់ទុកថា ការហាមឃាត់នេះ គឺខុសនឹងរដ្ឋធម្មនុញ្ញកម្ពុជា និងបំពានច្បាប់អន្តរជាតិ ដែលហាមប្រាម អ្នកមានកំណើតនៅស្រុកខ្មែរ មិនឲ្យចូលដីខ្មែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ