បោះឆ្នោតក្រុមប្រឹក្សាឃុំសង្កាត់៖ សមត្ថកិច្ចជាង៣ម៉ឺននាក់នឹងត្រូវដាក់ពង្រាយការពារសន្តិសុខ
កងកម្លាំងសមត្ថកិច្ចជាង៣ម៉ឺន៧ពាន់នាក់ នឹងត្រូវដាក់ពង្រាយដើម្បីការពារការិយាល័យបោះឆ្នោតនិងរាប់សន្លឹកឆ្នោត នៅក្នុងការបោះឆ្នោតក្រុមប្រឹក្សាឃុំសង្កាត់ខាងមុខ។ នេះបើយោងតាមអ្វីដែលអគ្គស្នងការនគរបាលជាតិ លោក នេត សាវឿន គូសបញ្ជាក់នៅក្នុងកិច្ចប្រជុំគណៈបញ្ជាការសន្តិសុខអចិន្ត្រៃយ៍ នាថ្ងៃព្រហស្បតិ៍នេះ ក្រោមវត្តមាន លោក ស ខេង រដ្ឋមន្ដ្រីក្រសួងមហាផ្ទៃ និង លោក ស៊ិក ប៊ុនហុក ប្រធាន គជប។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៤
ក្នុងចំណោមកងកម្លាំងសមត្ថកិច្ចដែលត្រូវដាក់ពង្រាយនៅក្នុងការបោះឆ្នោតទាំងជាង៣ម៉ឺន៧ពាន់នាក់ មានកងកម្លាំងនគរបាល៣ម៉ឺន៥ពាន់នាក់ កងយោធិពលខេមរភូមិន្ទ១ពាន់៨រយនាក់ និងសល់ពីនោះជាកម្លាំងកងរាជអាវុធហត្ថ។
លោក នេត សាវឿន អគ្គស្នងការនគរបាលជាតិ បានឲ្យដឹងថា កងកម្លាំងទាំងអស់នេះ នឹងត្រូវដាក់ពង្រាយ នៅទូទាំង២៥រាជធានីខេត្ត ក្នុងនោះខេត្តខ្លះ នឹងត្រូវដាក់ពង្រាយយ៉ាងតិច៣នាក់ក្នុង១ការិយាល័យ ខណៈខេត្តរាជធានីមួយខ្លះទៀត នឹងដាក់ពង្រាយកម្លាំង២នាក់ក្នុងមួយការិយាល័យ។ ចំណែកខេត្តមួយចំនួនទៀត មានកម្លាំងការពារម្នាក់ក្នុងមួយការិយាល័យ។
សូមជម្រាបថា ខេត្តដែលដាក់ពង្រាយកម្លាំង៣នាក់ក្នុងមួយការិយាល័យឬមួយគោលដៅ រួមមាន ខេត្តកណ្ដាល ខេត្តបន្ទាយមានជ័យ ឧត្តរមានជ័យ រតនគិរី ស្ទឹងត្រែង កោះកុង មណ្ឌលគិរី ប៉ៃលិន និងខេត្តកែប ដែលត្រូវប្រើកម្លាំងសរុបជាង៧ពាន់នាក់។ ចំណែករាជធានីខេត្តដែលដាក់កងកម្លាំង២នាក់ក្នុងមួយការិយាល័យ មានជាអាថិ៍ ភ្នំពេញ ព្រៃវែង បាត់ដំបង កំពង់ចាម តាកែវ សៀមរាប ត្បូងឃ្មុំ កំពង់ធំ កំពត ស្វាយរៀង កំពង់ឆ្នាំង ពោធិ៍សាត់ ក្រចេះ និងព្រះវិហារ ដែលត្រូវប្រើកម្លាំងសរុបប្រមាណ២ម៉ឺន៧ពាន់នាក់។ ដោយឡែក ខេត្តព្រះសីហនុ នឹងមានកម្លាំងការពារម្នាក់ក្នុងមួយការិយាល័យ ខណៈខេត្តកំពង់ស្ពឺ វិញ ត្រូវប្រើកងកម្លាំងប្រមាណ១ពាន់៣រយនាក់ សម្រាប់ការិយាល័យចំនួនជាង១ពាន់៤រយការិយាល័យ។
ជាការកត់សម្គាល់ ក្រៅពីបែងចែកកម្លាំងការពារសម្រាប់ការបោះឆ្នោតនិងរាប់សន្លឹកឆ្នោតហើយ គណៈបញ្ជាការសន្តិសុខអចិន្ត្រៃយ៍ ក៏បានត្រៀមដាក់ពង្រាយសមត្ថកិច្ចការពារសរុប១ម៉ឺន៩ពាន់នាក់ផងដែរ សម្រាប់យុទ្ធនាការឃោសនាបោះឆ្នោត១៤ថ្ងៃ ពីថ្ងៃទី២០ខែឧសភា ដល់ថ្ងៃទី២ខែមិថុនា។
រដ្ឋមន្ដ្រីក្រសួងមហាផ្ទៃ លោក ស ខេង បានណែនាំដល់កងកម្លាំងក្រោមបង្គាប់ ឲ្យយកចិត្តទុកដាក់តាមដានសភាពការណ៍នៃការបោះឆ្នោតឲ្យបានទាន់ពេល ជាពិសេសដំណាក់កាលឃោសនាបោះឆ្នោតខាងមុខតែម្ដង ព្រោះថាវាជាដំណាក់កាលដែលទំនាស់ព្រមទាំងបទល្មើសងាយនឹងកើតឡើង។ ហើយប្រសិនបើមានហេតុការណ៍ ឬឧបទ្ទវហេតុផ្សេងៗកើតឡើងដែលអាចរារាំងដល់ដំណើរការបោះឆ្នោត លោករដ្ឋមន្ដ្រី បានណែនាំឲ្យអាជ្ញាធរដែនដីនិងកងកម្លាំងសមត្ថកិច្ចចាត់វិធានការតាមច្បាប់នៅនឹងកន្លែងភ្លាមៗតែម្ដង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ