លោក ហ៊ុន សែន ត្រលប់មកដល់កម្ពុជាវិញ ក្រោយបញ្ចប់ទស្សនកិច្ចរយៈពេល៣ថ្ងៃនៅស្វ៊ីស
លោកនាយករដ្ឋមន្ត្រី ហ៊ុន សែន បានដឹកនាំគណៈប្រតិភូកម្ពុជា វិលត្រលប់មកដល់មាតុប្រទេសវិញហើយ កាលពីវេលាម៉ោង៩និង១៥នាទី ព្រឹក ថ្ងៃទី ៦ កក្កដា នេះ បន្ទាប់ពីចំណាយពេលអស់៣ថ្ងៃ ដើម្បីចូលរួមកិច្ចប្រជុំជាច្រើននៅឯទីក្រុងសឺណែវ ប្រទេសស្វីស។ ទន្ទឹមនឹងការមកដល់របស់គណៈប្រតិភូខ្មែរ ក្រសួងការបរទេសកម្ពុជា បានចេញសេចក្តីប្រកាសព័ត៌មានមួយ ដោយបានប្រកាសពីជោគជ័យនៃដំណើរទស្សនកិច្ចនេះ។
ចុះផ្សាយនៅថ្ងៃ៖
ស្តាប់ - ០៣:០៩
តាមរយៈសេចក្តីប្រកាសព័ត៌មាន នៅក្នុងដំណើររយៈពេល៣ថ្ងៃនៅក្នុងប្រទេសស្វីសនេះ លោកនាយករដ្ឋមន្ត្រី ហ៊ុន សែន បានឡើងថ្លែងសុន្ទរកថាគន្លឹះសំខាន់ៗចំនួនពីរ ទី១ គឺសុន្ទរកថា នៅក្នុងពិធីបើកកិច្ចប្រជុំត្រួតពិនិត្យឡើងវិញជាសកលលើកទី៧ ស្តីពី «ជំនួយសម្រាប់ពាណិជ្ជកម្ម» នៅឯទីស្នាក់ការអង្គការពាណិជ្ជកម្មពិភពលោក និងទី២គឺសុន្ទរកថានៅក្នុងសម័យប្រជុំលើកទី៤១ នៃក្រុមប្រឹក្សាសិទ្ធិមនុស្សអង្គការសហប្រជាជាតិ។
តាមរយៈសេចក្តីប្រកាសព័ត៌មានដដែល នៅក្នុងសុន្ទរកថាគន្លឹះ នៅក្នុងពិធីបើកកិច្ចប្រជុំត្រួតពិនិត្យឡើងវិញជាសកលលើកទី៧ ស្តីពី «ជំនួយសម្រាប់ពាណិជ្ជកម្ម» ប្រមុខរដ្ឋាភិបាលកម្ពុជា បានចែករំលែកនូវបទពិសោធន៍របស់កម្ពុជា ក្នុងការរៀបចំគោលនយោបាយ និងយុទ្ធសាស្ត្រពាណិជ្ជកម្ម និងជោគជ័យនៃការអភិវឌ្ឍសង្គម-សេដ្ឋកិច្ច ក្រោយពេលដែលកម្ពុជាបានក្លាយជាសមាជិកអង្គការ WTO នៅឆ្នាំ ២០០៤ ព្រមទាំងតួនាទីរបស់កម្ពុជានាពេលបច្ចុប្បន្ន និងទៅអនាគត។ នៅក្នុងកិច្ចប្រជុំនោះ លោកនាយករដ្ឋមន្ត្រី ក៏បានគូសបញ្ជាក់ឡើងវិញ នូវចក្ខុវិស័យរបស់កម្ពុជា ក្នុងការប្រែក្លាយកម្ពុជា ឲ្យទៅជាប្រទេសដែលមានចំណូលមធ្យមកំរិតខ្ពស់នៅឆ្នាំ ២០៣០ និងជាប្រទេសដែលមានចំណូលខ្ពស់នៅឆ្នាំ ២០៥០។ ប៉ុន្តែព្រមជាមួយគ្នានេះ លោកនាយករដ្ឋមន្ត្រីបានអំពាវនាវឲ្យប្រទេសសមាជិកជឿនលឿន និងដៃគូអភិវឌ្ឍទាំងអស់ ពិចារណាផ្តល់ការឧបត្ថម្ភគាំទ្របន្តទៀត ដើម្បីឲ្យកម្ពុជាសម្រេចដល់គោលដៅនេះ។
ដោយឡែក នៅក្នុងសុន្ទរកថាទៅកាន់សម័យប្រជុំលើកទី៤១ នៃក្រុមប្រឹក្សាសិទ្ធិមនុស្សអង្គការសហប្រជាជាតិវិញ លោកនាយករដ្ឋមន្ត្រី ហ៊ុន សែន បានលើកឡើងអំពីការពិតជាក់ស្តែងដែលកំពុងតែកើតឡើងនៅកម្ពុជា ពាក់ព័ន្ធនឹងបញ្ហាសិទ្ធិមនុស្ស សង្គមស៊ីវិល និងដំណើរការលទ្ធិប្រជាធិបតេយ្យ។ ឆ្លៀតនៅក្នុងឱកាសនោះ លោកនាយករដ្ឋមន្ត្រី ក៏បានរំលឹកឡើងវិញអំពីសោកនាដកម្មរបស់កម្ពុជាក្នុងប្រវត្តិសាស្ត្រថ្មីៗរបស់កម្ពុជា ដែលបានបំផ្លិចបំផ្លាញប្រទេសកម្ពុជាដល់សូន្យ។ ប៉ុន្តែក្រោមគោលនយោបាយឈ្នះឈ្នះ បាននាំឲ្យកម្ពុជាបញ្ចប់នូវសង្គ្រាមទាំងស្រុង និងទទួលបាននូវសុខសន្តិភាពពេញលេញ ដោយគ្មានការប្រើប្រាស់អាវុធ ឬគ្រាប់រំសេវ សូម្បីតែមួយគ្រាប់។
ប៉ុន្តែទោះបីជាយ៉ាងនេះក្តី នៅក្នុងជំនួបទ្វេភាគីជាមួយអគ្គនាយកអង្គការពាណិជ្ជកម្មពិភពលោក WTO លោក រ៉ូប៊ែតួ អាហ្សេវ៉េដូ លោកនាយករដ្ឋមន្ត្រី ហ៊ុន សែន បានសម្តែងការសោកស្តាយ ចំពោះការបើកនូវនីតិវិធីផ្លូវការនៃការដកភាពអនុគ្រោះពន្ធ EBA ពីប្រទេសកម្ពុជា។ លោក នាយករដ្ឋមន្ត្រីបានគូសបញ្ជាក់ថា សហភាពអឺរ៉ុបកំពុងអនុវត្តនូវស្តងដារច្រើន។ ក្រៅពីនេះ ប្រមុខរដ្ឋាភិបាលកម្ពុជា ក៏បានជួបពិភាក្សាទ្វេភាគីជាមួយលោក រតនាការ អាឌីការី នាយកប្រតិបត្តិនៃក្របខណ្ឌពង្រឹងសមាហរណកម្មពាណិជ្ជកម្មនៃអង្គការ WTO លោក វិល ស្គីនណារី រដ្ឋមន្ត្រីសហប្រតិបត្តិការអភិវឌ្ឍន៍ និងពាណិជ្ជកម្មអន្តរជាតិនៃប្រទេសហ្វាំងឡង់ និងលោកស្រី ម៉ីស្សែល បាឆេឡេត ឧត្តមស្នងការទទួលបន្ទុកសិទ្ធិមនុស្សអង្គការសហប្រជាជាតិផងដែរ។
សូមជំរាបជូនថា លោកនាយករដ្ឋមន្ត្រី ហ៊ុន សែន និងគណៈប្រតិភូកម្ពុជា បានបញ្ចប់ដំណើរចូលរួមកិច្ចប្រជុំនៅក្នុងប្រទេសស្វីស កាលពីថ្ងៃទី ៥ កក្កដា នឹងបានមកដល់ប្រទេសកម្ពុជាវិញ នៅព្រឹកថ្ងៃទី ៦ កក្កដា នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ