ជម្លោះដណ្តើមទីស្នាក់ការគណបក្សរាជានិយម ចាប់ផ្តើមផ្ទុះចេញពីខេត្តសៀមរាប
នៅថ្ងៃអាទិត្យនេះ សម្តេចក្រុមព្រះនរោត្តម រណឬទ្ធិ បានសម្រេចព្រះទ័យប្តូរទីតាំងនៃពិធីជួបជុំគ្នាមួយនៅក្នុងខេត្តសៀមរាប ដោយសារតែទីតាំងស្នាក់ការគណបក្សហ្វ៊ុនស៊ិនប៉ិច នេះត្រូវបានគ្រប់គ្រងដោយគណបក្សខ្មែររួបរួមជាតិរបស់លោកញឹក ប៊ុនឆៃ។ ក្រុមអ្នកវិភាគបានមើលឃើញថា ជម្លោះដណ្តើមកេរនៅក្នុងគណបក្សរាជានិយមបងប្អូនទាំងពីរ កំពុងផ្ទុះឡើង ដោយបានផ្តើមចេញពីខេត្តសៀមរាប។
ចុះផ្សាយនៅថ្ងៃ៖
ស្តាប់ - ០២:១៣
ជម្លោះដណ្តើមទីស្នាក់ការគណបក្សរាជានិយម បានចាប់ផ្តើមផ្ទុះឡើង បន្ទាប់ពីមេដឹកនាំនៃគណបក្សរាជានិយមបងប្អូនទាំងពីរ បានរៀបចំកម្មវិធីជាន់គ្នានៅលើទីតាំងតែមួយ កាលពីព្រឹកថ្ងៃអាទិត្យ ទី៦ ខែមិនា ឆ្នាំ២០១៦នេះ។ គឺជាទីតាំងដែលស្ថិតនៅក្នុងស្រុកពួក ខេត្តសៀមរាប។ ប៉ុន្តែដើម្បីជៀសផុតពីការប៉ះទង្គិចគ្នា ភាគីគណបក្សហ្វ៊ុនស៊ិនប៉ិចដែលដឹកនាំដោយសម្តេចក្រុមព្រះនរោត្តម រណឬទ្ធិ បានសម្រេចព្រះទ័យប្តូរទីតាំងនៃពិធីសំណេះសំណាលរបស់ព្រះអង្គ ទៅកាន់ទីតាំងផ្សេងវិញ។
សម្តេចក្រុមព្រះ នរោត្តម រណឬទ្ធិ ដែលបានបញ្ជារឲ្យក្រុមការងាររបស់ព្រះអង្គ ផ្លាស់ប្តូរទីកន្លែងនៃពិធីសំណេះសំណាលជាមួយថ្នាក់ដឹកនាំ ពីទីស្នាក់ការគណបក្សដែលមានទីតាំងស្ថិតនៅខាងលិចរង្វង់មូលផ្លូវបំបែកទៅកាន់វាលយន្តហោះក្រុងសៀមរាប ដោយទៅរៀបចំ ពិធីជួបជុំ នៅព្រះដំណាក់របស់ព្រះអង្គ ដែលមានទីតាំងស្ថិតនៅក្នុងឃុំទឹកវិល ក្រុងសៀមរាប ខេត្តសៀមរាបវិញ។ ការផ្លាស់ប្តូរទីកន្លែងប្រារព្ធពិធីជួបសំណេះសំណាលជាមួយថ្នាក់ដឹកនាំឃុំ និងស្រុក នៅទូទាំងខេត្តសៀមរាបនេះ គឺដើម្បីបញ្ជៀសការប៉ះទង្គិចគ្នារវាងក្រុមអ្នកគាំទ្រគណបក្សហ៊្វុនស៊ិនប៉ិច និងក្រុមអ្នកគាំទ្ររបស់លោក ញឹក ប៊ុនឆៃ ដែលបានមកទាមទារសិទ្ធិកាន់កាប់ និងប្រារព្ធពិធីនៅលើទីតាំងស្នាក់ការគណបក្សហ្វ៊ុនស៊ិនប៉ិច ដោយមានការអន្តរាគមន៍ពីសមត្ថកិច្ចមូលដ្ឋាន។
នេះគឺជាជម្លោះដណ្តើមទីស្នាក់ការរបស់គណបក្សរាជានិយមបងប្អូនទាំងពីរជាលើកដំបូង ដែលបានផ្តើមចេញពីខេត្តសៀមរាប បន្ទាប់ពីគណបក្សហ្វ៊ុនស៊ិនប៉ិច បានបែកជាពីរជាលើកទី២កាលពីដើមឆ្នាំ២០១៦នេះ។ ក្រុមរបស់លោក ញឹក ប៊ុនឆៃ ដែលមិនសប្បាយចិត្តចំពោះការដឹកនាំរបស់សម្តេចក្រុមព្រះនរោត្តម រណឬទ្ធិ ដោយទៅបង្កើតគណបក្សថ្មីមួយ ដែលមានឈ្មោះថា គណបក្សខ្មែររួបរួមជាតិ។ ជាឈ្មោះថ្មី តែមានរចនាសម្ព័ន្ធដឹកនាំចាស់។ លោក ញឹក ប៊ុនឆៃ ដែលជាប្រធានគណបក្សថ្មីនេះ បានផ្ញើលិខិតទៅកាន់រដ្ឋមន្រ្តីក្រសួងមហាផ្ទៃ លោក ស ខេង ដើម្បីរំលាយលទ្ធផលសមាជគណបក្សហ្វ៊ុនស៊ិនប៉ិចកាលពីថ្ងៃទី១៩មករា ២០១៥ និងបានទាមទារសិទ្ធិគ្រប់គ្រងលើទីស្នាក់ការចាស់របស់គណបក្សហ្វ៊ុនស៊ិនប៉ិចចំនួន២១នៅទូទាំងប្រទេស។ ប៉ុន្តែយ៉ាងណាក៏ដោយ ការទាមទារនេះ ត្រូវបានច្រានចោលដោយអគ្គលេខាធិការដ្ឋានគណបក្សហ្វ៊ុនស៊ិនប៉ិច។
សម្រាប់ក្រុមអ្នកវិភាគ ជម្លោះដណ្តើមទីស្នាក់ការគណបក្សរាជានិយមបងប្អូនទាំងពីរ នឹងអាចបញ្ចប់ទៅបាន តាមរយៈផ្លូវតុលាការប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ