សំណុំរឿង ០០៣ និង ០០៤ដំណើរការទៅមុខតែមួយភាគី
អង្គជំនុំជម្រះវិសាមញ្ញក្នុងតុលាការកម្ពុជា កាលពីថ្ងៃអង្គារទី៣មីនាម្សិលមិញ បានចេញសេចក្តីប្រកាសព័ត៌មាន ដោយបន្តនីតិវិធីសំណុំរឿង ០០៣ និង ០០៤ ។ ជាការសម្រេចដាក់ ជនត្រូវចោទ អ៊ឹម ចែម និងមាសមុត អតីតមេដឹកនាំខ្មែរក្រហម ឱ្យស្ថិតនៅក្រោមការត្រួតពិនិត្យដោយកំបាំងមុខ។ តែយ៉ាងណាក៏ដោយ ករណី០០៣ និង ០០៤នេះ គឺមានតែភាគីអន្តរជាតិតែប៉ុណ្ណោះដែលជាអ្នកដំណើរការ។
ចុះផ្សាយនៅថ្ងៃ៖
ស្តាប់ - ០២:១៥
អតីមេដឹកនាំកម្ពុជាប្រជាធិបតេយ្យពីររូបទៀតត្រូវបានចៅក្រមអន្តរជាតិនៃសាលាក្តីខ្មែរក្រហមដាក់ឱ្យនៅក្រោមការត្រួតពិនិត្យដោយកំបាំងមុខក្នុងសំណុំរឿង ០០៣ និង ០០៤ ខណៈដែលភាគីចៅក្រមជាតិបន្តប្រកាន់គោលជំហរនៅស្ងាត់ស្ងៀម។ លោកស្រី អ៊ឹម ចែម ដែលជាអតីតចៅហ្វាយស្រុកព្រះនេតព្រះ និងលោក មាស មុត អតីតមេទាហ៊ានជើងទឹក បានរងការចោទប្រកាន់ពីបទមនុស្សឃាត ឧក្រិដ្ឋកម្មប្រឆាំងមនុស្សជាតិ និង ឧក្រិដ្ឋកម្មសង្គ្រាម។ នេះបើយោងតាមសេចក្តីប្រកាសព័ត៌មានរបស់សាលាក្តីខ្មែរក្រហម។
ជនជាប់ចោទទាំងពីរគឺជាមនុស្សពីរនាក់ក្នុងចំណោមជនជាប់ចោទទាំងប្រាំក្នុងសំណុំរឿង ០០៣ និង ០០៤។ ចៅក្រមអន្តរជាតិរកឃើញថា លោក មាស មុត ក្នុងអំណាចរបស់លោក បានជាប់ពាក់ព័ន្ធឹនឹងការធ្វើឃាតមនុស្ស ការសម្លាប់រង្គាល និងការធ្វើទុក្ខបុកម្នេញដោយសារមូលហេតុនយោបាយ និងពូជសាសន៍ជាដើម។ ដោយឡែក លោកស្រី អ៊ឹម ចែម ក៏ត្រូវបានចៅក្រមអន្តរជាតិបានរកឃើញថាបានជាប់ពាក់ព័ន្ធនឹងការសម្លាប់មនុស្ស នៅមន្ទីរសន្តិសុខភ្នំទ្រយោង និងការដ្ឋានស្ពានស្រែង ដោយបានធ្វើឃាតមនុស្ស និងការធ្វើឱ្យទៅជាទាសករជាដើម។
លោក ឡាស អូលសិន មន្ត្រីផ្នែកច្បាប់នៃសាលាក្តីខ្មែរក្រហម បានឱ្យដឹងថា តុលាការកំពុងបន្តិនិតវិធីស៊ើបអង្កេតរបស់ខ្លួន។ ហើយថាសំណុំរឿងនេះនឹងត្រូវដំណើរការទៅមុខជាបន្តទៀត។ ដោឡែកលោក នេត្រ ភក្ត្រា អ្នកនាំពាក្យសាលាក្តីខ្មែរក្រហម បានបញ្ជាក់ថា បើទោះបីជាចៅក្រមភាគីកម្ពុជា និងចៅក្រមភាគីអន្តរជាតិខ្វែងគំនិតគ្នាលើសំណុំរឿង០០៣ និង ០០៤ ក៏ដោយប៉ុន្តែភាគីទាំងពីរនៅតែធ្វើការជាមួយគ្នាដើម្បីដំណើរស៊ើបអង្កេតជាបន្ត។ ហើយការដាក់ឱ្យនៅក្រោមការត្រួតពិនិត្យដោយកំបាំងមុខនេះ គឺនឹងអាចពន្លឿននៃការស៊ើបអង្កេតដែលចុងបញ្ចប់ការស៊ើបអង្កេតនឹងអាចឈានដល់ចេញដីការដំណោះស្រាយដោយអាចដោះលែង ឬបញ្ជូនទៅជំនុំជំរៈ។ លោក ឡាត់ កី មន្ត្រីអង្កការសិទ្ធមនុស្សអាដហុក និងជាអ្នកតាមដានសាលាក្តីខ្មែរក្រហម បាននិយាយថា ការចោទប្រកាន់ជនជាប់ចោទទាំងពីរដោយគ្មានការចាប់ឃុំខ្លួននេះ គឺជាការអនុវត្តន៍ស្តង់ដាពីររបស់សាលាក្តី ខណៈដែលជនជាប់ចោទក្នុងសំណុំរឿង០០១ និង ០០២ ត្រូវបានចាប់ឃុំខ្លួន។
សូមបញ្ជាក់ថា ភាគីចៅក្រមកម្ពុជានៅតែប្រកាន់គោលជំហរមិនចង់បន្តករណី០០៣ និង ០០៤បន្តទៀតនោះទេ។ ទន្ទឹមនឹងនេះ លោកនាយករដ្ឋមន្ត្រីហ៊ុន សែន កាលពីពេលថ្មីៗនេះ ធ្លាប់បានលើកឡើងថា ការពង្រីកវិសាលភាពនៃការកាត់ទោសរបស់សាលាក្តីនឹងអាចឱ្យមានសង្គ្រាមស៊ីវិលនៅកម្ពុជាសាជាថ្មី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ