លោក ហ៊ុន សែន ប្តេជ្ញាការពារដំណើរការបោះឆ្នោត និងធានាសុវត្ថិភាពជូនរាល់បេក្ខជននយោបាយ
ថ្លែងក្នុងឱកាសបិទសន្និបាតប្រចាំឆ្នាំ របស់ ក្រសួងមហាផ្ទៃ នៅថ្ងៃសុក្រនេះ លោកនាយករដ្ឋមន្ត្រី ហ៊ុន សែន បានប្តេជ្ញាការពារដំណើរការបោះឆ្នោត និងធានាសុវត្ថិភាពជូនរាល់បេក្ខជនគណបក្សនយោបាយដែលនឹងចូលរួម។ ការប្រកាសរបស់ប្រមុខរាជរដ្ឋាភិបាលនៅពេលនេះ គឺដើម្បីច្រានចោលរាល់ការចោទប្រកាន់ទាំងឡាយដែលថា លោក ហ៊ុន សែន មិនចង់បោះឆ្នោត ស្របពេលដែលការបោះឆ្នោតជ្រើសរើសក្រុមប្រឹក្សាឃុំសង្កាត់ឆ្នាំ២០១៧ នឹងមកដល់នៅខែមិថុនាខាងមុខ។
ចុះផ្សាយនៅថ្ងៃ៖
ស្តាប់ - ០២:៣៧
លោកនាយករដ្ឋមន្ត្រី ហ៊ុន សែន នៅថ្ងៃសុក្រនេះ បានប្តេជ្ញាការពារដំណើរការបោះឆ្នោតឲ្យប្រព្រឹត្តិទៅយ៉ាងទៀងទាត់ ប្រកបដោយសុវត្ថិភាព សេរីភាព យុត្តិធម៌ ត្រឹមត្រូវ និងទទួលយកបាន។ ក្នុងនាមជាអាជ្ញាធរលោកបានថ្លែងថា «ការបោះឆ្នោតនៅថ្ងៃទី៤ មិថុនា ២០១៧ នេះ ត្រូវតែជាការបោះឆ្នោតដ៏ត្រឹមត្រូវមួយ ហើយធានាសុវត្ថិភាពសម្រាប់បេក្ខជនទាំងអស់នៃបណ្តាបក្សនយោបាយណាក៏ដោយ »។
បើតាមប្រមុខរាជរដ្ឋាភិបាលកម្ពុជា ការប្រកាសបែបនេះនឹងច្រានចោលរាល់ការមួលបង្កាច់ទាំងឡាយរបស់អ្នកកំពុងរស់នៅក្រៅប្រទេសដែលចោទថា លោក ហ៊ុន សែន ចង់លុបចោលការបោះឆ្នោត។ លោកនាយករដ្ឋមន្ត្រីបញ្ជាក់ថា រាជរដ្ឋាភិបាល ត្រូវតែប្រតិបត្តិការណ៍ឲ្យទាល់តែបាន នូវការបោះឆ្នោតមូលដ្ឋាន និងបោះឆ្នោតសកល តាមការកំណត់ក្នុងច្បាប់ ដើម្បីធានាដំណើរប្រជាធិបតេយ្យសម្រាប់ប្រទេសកម្ពុជា។ ក្នុងន័យនេះ រាជរដ្ឋាភិបាល នឹងទទួលខុសត្រូវផ្នែកថវិកាសម្រាប់ គណៈកម្មការធិការជាតិរៀបចំការបោះឆ្នោត (គជប) និងធានាសុវត្ថិភាពជូនបេក្ខជនគណបក្សនយោបាយដែលចូលរួមប្រកួតប្រជែងការបោះឆ្នោត។
គិតត្រឹមដំណាច់ខែមករា ឆ្នាំ២០១៧ នៅកម្ពុជា មានគណបក្ស បានចុះបញ្ជីនៅ ក្រសួងមហាផ្ទៃ សរុប ៤៥ គណបក្ស ដោយក្នុងនោះមាន ១២គណបក្សនយោបាយ កំពុងជាប់បណ្តឹងនៅតុលាការ។ គណៈកម្មធិការជាតិរៀបចំការបោះឆ្នោត (គជប) នឹងផ្តើម ទទួលពាក្យចុះបញ្ជីបេក្ខជនគណបក្សនយោបាយឈរឈ្មោះបោះឆ្នោតឃុំសង្កាត់ ត្រឹមរយះពេល ៣ថ្ងៃ ចាប់ពីថ្ងៃទី ៣ ដល់ថ្ងៃទី៥ ខែមីនា ហើយ គជប បិទផ្សាយបញ្ជីបេក្ខជនផ្លូវការ នៅថ្ងៃទី១៨ ខែមេសា។
លោក ហ៊ុន សែន ក៏បានឆ្លៀតចំអកដល់ គណបក្សនយោបាយខ្លះ ដែលកំពុងជម្លោះផ្ទៃក្នុងអំពីលំដាប់លេខរៀងឈរឈ្មោះរបស់បេក្ខជនសម្រាប់ការបោះឆ្នោតឃុំសង្កាត់អាណត្តិទី៤ ហើយបានទាយទុកជាមុនថា នឹងមានចលនាទម្លាក់ផ្លាកគណបក្សនយោបាយចោលជាច្រើនកន្លែង ដោយសារតែរឿងជម្លោះផ្ទៃក្នុងនេះ។ ប្រមុខរាជរដ្ឋាភិបាលកម្ពុជា ក៏បានការពារខ្លួនដែរថា សូមកុំចោទប្រកាន់រដ្ឋាភិបាល ជាអ្នករុញច្រានឲ្យមានការតវ៉ា។
គួររំលឹកថា ក្នុងការបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៣ ឆ្នាំ២០១២ អង្គការសង្កេតការណ៍បោះឆ្នោត ខុមហ្វ្រែល បានរកឃើញថា ឆ្នាំ២០១២ មានករណីឃាតកម្មទាក់ទិនសកម្មជនគណបក្សនយោបាយ ៣ករណី ព្រមទាំងមានការបំភិតបំភ័យ ភាពមិនប្រក្រតី ការរារាំងសកម្មភាពឃោសនាបោះឆ្នោតជាដើម។ ខុមហ្វ្រែល វាយតម្លៃថា ការបោះឆ្នោតអាណត្តិទី៣ ប្រព្រឹត្តិទៅ និងចាត់ចែងដំណើរការបោះឆ្នោតមិនមានអំពើហិង្សា និងភាពមិនប្រក្រតីធ្ងន់ធ្ងររហូតធ្វើឲ្យស្ទុះដល់ដំណើរការបោះឆ្នោតទេ តែ «សេរី» ក្នុងការបោះឆ្នោតនៅមានកំរិត និង «យុត្តិធម៌» ក្នុងការបោះឆ្នោតមិនមានការកែលំអរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ