ព្រឹទ្ធាចារ្យចាប៉ីដងវែង លោកគង់ ណៃ ទទួលបានទទួលពានរង្វាន់ពីជប៉ុន
ព្រឹទ្ធាចារ្យចាប៉ីដងវែងលោក គង់ ណៃ នាពេលថ្មីៗនេះ បានទទួលពានរង្វាន់សិល្បៈ និងវប្បធម៌ ហ្វូគុអុកា (Fukuoka Prize) របស់ប្រទេសជប៉ុន ឆ្នាំ២០១៧នេះ។ នេះបើយោងទៅតាម សេចក្តីប្រកាសព័ត៌មានរបស់ស្ថានទូតជប៉ុនប្រចាំកម្ពុជា។ ព្រឿន បញ្ញារី រាយការណ៍៖
ចុះផ្សាយនៅថ្ងៃ៖
ថ្លែងនៅក្នុងសេចក្តីប្រកាសព័ត៌មាន លោកឯកអគ្គរដ្ឋទូតជប៉ុនប្រចាំកម្ពុជា បានសម្តែងការកោតសរសើរចំពោះស្នាដៃរបស់សិល្បៈករចាប៉ីដងវែង លោក គង់ ណៃ នៅក្នុងកម្មវិធីផ្លាស់ប្ដូរវប្បធម៌ជប៉ុន-កម្ពុជា។ កោតសសើរជាពិសេសនូវចង្វាក់ភ្លេង និងទំនុកច្រៀងដ៏មានអត្ថន័យដែលបានច្រៀងស្វាគមន៍អ្នកចូលរួមមកពីបណ្ដាប្រទេសផ្សេងៗនារាត្រីនោះ។
ចំពោះពានរង្វាន់ដែលជប៉ុនផ្ដល់ជូនលោក គង់ ណៃ នាពេលនេះ ឯកអគ្គរដ្ឋទូតជប៉ុនសង្ឃឹមថា វានឹងក្លាយជាឱកាសល្អមួយក្នុងការផ្សព្វផ្សាយដល់ប្រជាជនទូទាំងតំបន់អាស៊ីស្គាល់សិល្បៈចាប៉ីដងវែង ដែលជាបេតិកភណ្ឌអរូបិយពិភពលោក និងដែលជាទម្រង់សិល្បៈចំណាស់មានប្រវត្តិដ៏យូរលង់។
ព្រឹទ្ធាចារ្យ គង់ ណៃ វ័យ៧១ឆ្នាំ ត្រូវគេស្គាល់ថា បានចាប់ផ្តើមប្រឡូកនៅក្នុងវិស័យចាប៉ីដងវែងចាប់តាំងពីនៅវ័យក្មេងខ្ចីម៉្លេះ។ ពោលគឺនៅក្នុងអំឡុងពេលដែលលោកមានអាយុប្រមាណ១៣ឬ១៤ឆ្នាំ។ ជានិច្ចជាកាល លោក គង់ ណៃ បានប្រគុំតន្ដ្រីពីចាប៉ីដងវែង អមដោយការច្រៀងរៀបរាប់យ៉ាងពិរោះ អំពីប្រធានបទផ្សេងៗដូចជា សិល្បៈ វប្បធម៌ និងសាសនាជាដើម។
គួរជម្រាបជូនថា ពានរង្វាន់សិល្បៈនិងវប្បធម៌ហ្វូគុអុកា ជាពានរង្វាន់ដែលបានបង្កើតឡើងចាប់តាំងពីឆ្នាំ១៩៩០ នៅទីក្រុងហ្វូគុអុកាប្រទេសជប៉ុន។ កន្លងមកពានរង្វាន់នេះត្រូវបានផ្តល់ជូនបុគ្គលដែលមានស្នាដៃឆ្នើមក្នុងតំបន់អាស៊ី ពាក់ព័ន្ធផ្នែក អប់រំ សិល្បៈ និងវប្បធម៌។
លោកព្រឹទ្ធាចារ្យចាប៉ីដងវែង គង់ ណៃ គឺជាបុគ្គលទី៣ហើយ ដែលបានទទួលពានរង្វាន់នេះ បន្ទាប់ពី លោក ឆេង ផុន និង លោក អាំង ជូលាន។ លោក ឆេង ផុន ជាអ្នកនិពន្ធរឿងល្ខោន និងជាអតីតរដ្ឋមន្ត្រីក្រសួងវប្បធម៌ និងវិចិត្រសិល្បៈ បានទទួលពានរង្វាន់នេះក្នុងឆ្នាំ១៩៩៧។ ចំណែកលោក អាំង ជូលាន អ្នកស្រាវជ្រាវខេមរសិក្សា បានទទួលពានរង្វាន់នេះនៅក្នុងឆ្នាំ២០១១៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ