អង្គការលីកាដូរិះគន់សេចក្តីព្រាងច្បាប់ស្តីពីទូរគមនាគមន៍
ដោយថ្លែងជាភាសាអង់គ្លេសតាមរយៈទំព័រហ្វេសប៊ុករបស់អង្គការលីកាដូ អ្នកស្រី ណាលី ពីឡូក បានរិះគន់សេចក្តីព្រាងច្បាប់ស្តីពីទូរគមនាគមន៍ ដែលទីស្តីការគណៈរដ្ឋមន្ត្រីកម្ពុជាទើបបានអនុម័តម្សិលមិញ។ ការអះអាងរបស់នាយិការូបនេះ អាចមានន័យជាភាសាខ្មែរថា វា«ជាការប៉ុនប៉ងច្បាស់ក្រឡែតមួយរបស់គណបក្សប្រជាជនកម្ពុជា ដើម្បីគ្រប់គ្រងទាំងស្រុងលើអ៊ីនធើណិតនៅកម្ពុជា»។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
ជាបឋម សូមរម្លឹកថា កាលពីថ្ងៃសុក្រ ទីស្តីការគណៈរដ្ឋមន្ត្រីកម្ពុជាបានប្រជុំអនុម័តសេចក្តីព្រាងច្បាប់ស្តីពីទូរគមនាគមន៍ ក្រោមអធិបតីភាពរបស់លោកនាយករដ្ឋមន្ត្រី ហ៊ុន សែន។
យោងតាមរបាយករណ៍នៃអង្គប្រជុំនោះ សេចក្តីព្រាងច្បាប់ថ្មីដែលមានគោលដៅ«កំណត់សមត្ថកិច្ចគ្រប់គ្រង (...) និងតាមដានប្រតិបត្តិការលើវិស័យទូរគមនាគមន៍»នោះ មានគោលបំណងចម្បងៗបី៖ ១) ធានាគុណភាព និងប្រសិទ្ធភាពនៃការប្រើប្រាស់ហេដ្ឋារចនាសម្ព័ន្ធនិងបណ្ដាញ និងការផ្តល់សេវាទូរគមនាគមន៍ ២) លើកទឹកចិត្តចំពោះការវិនិយោគលើវិស័យទូរគមនាគមន៍និងការការពារអ្នកប្រើប្រាស់ និង៣) កៀរគរចំណូលជាតិ។
របាយការណ៍នោះបញ្ជាក់ថា ក្រសួងប្រៃសណីយ៍ និងទូរគមនាគមន៍កម្ពុជា ដែលជាអ្នកចងក្រងសេចក្តីព្រាងច្បាប់ស្តីពីទូរគមនាគមន៍ បានកត់សម្គាល់ឃើញនូវ«ស្ថានភាពប្រែប្រួលរីកចម្រើនយ៉ាងឆាប់រហ័ស ប្រកបដោយការប្រឈមនៃវិស័យទូរគមនាគមន៍នៅក្នុងព្រះរាជាណាចក្រកម្ពុជា»។
ប៉ុន្តែ មិនយូរប៉ុន្មានក្រោយពីការអនុម័តដោយទីស្តីការគណៈរដ្ឋមន្ត្រីកម្ពុជា សម្ព័ន្ធខ្មែរជំរឿន និងការពារសិទ្ធិមនុស្សលីកាដូ បានរិះគន់សេចក្តីព្រាងច្បាប់ថ្មីនោះយ៉ាងខ្លាំង តាមរយៈទំព័រហ្វេសប៊ុករបស់ខ្លួន។ អ្នកស្រី ណាលី ពីឡូក ដែលជានាយិកា បានថ្លែងសារជាភាសាអង់គ្លេសដែលអាចមានន័យជាភាសាខ្មែរថា៖ «សេចក្តីព្រាងច្បាប់ស្តីពីឧក្រិដ្ឋកម្មតាមប្រព័ន្ធបច្ចេកវិទ្យាព័ត៌មាន និងសេចក្តីព្រាងច្បាប់ស្តីពីទូរគមនាគមន៍ជាការប៉ុនប៉ងច្បាស់ក្រឡែតមួយរបស់គណបក្សប្រជាជនកម្ពុជា ដើម្បីគ្រប់គ្រងទាំងស្រុងលើអ៊ីនធើណិតនៅកម្ពុជា»។
អ្នកស្រីបន្តថា៖ «កិច្ចការសម្ងាត់បំផុតដែលថារដ្ឋាភិបាលកម្ពុជានឹងអនុវត្តតាមច្បាប់នេះ ទំនងជាអាច និងប្រហែលជាដើម្បីលុបបំបាត់ដោយប្រយោល រាល់ទម្រង់នៃខ្លឹមសាររិះគន់តាមអ៊ីនធើណិត»។
សូមបញ្ជាក់ថា រួមជាមួយអង្គការមិនមែនរដ្ឋាភិបាលផ្សេងៗទៀត អង្គការលីកាដូធ្វើការយ៉ាងសកម្មនៅក្នុងការប្រឆាំងនឹងសេចក្តីព្រាងច្បាប់ស្តីពីឧក្រិដ្ឋកម្មតាមប្រព័ន្ធបច្ចេកវិទ្យាព័ត៌មាននៅកម្ពុជា។ អង្គការនេះក៏បានចងក្រងការស្រាវជ្រាវមួយដែលមានចំណងជើងថា៖ «ដំណើរឃ្លាតចេញពីអ៊ីនធឺណិត? ការគម្រាមកំហែងចំពោះសេរីភាពលើប្រព័ន្ធអ៊ីនធឺណិតដែលទើបរកឃើញថ្មីនៅកម្ពុជា»ផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ