ធម្មយាត្រា៦ទិសចូលទីក្រុងភ្នំពេញដើម្បីអបអរសាទរទិវាសិទ្ធិមនុស្ស
ក្បួនធម្មយាត្រា៦ទិសនឹងចាប់ផ្តើមចេញដំណើរពីថ្ងៃទី៥ធ្នូខាងមុខនេះហើយគ្រោងមកជួបជុំគ្នានៅទីក្រុងភ្នំពេញនៅថ្ងៃទី១០ធ្នូដែលជាទិវចាសិទ្ធិមនុស្សអន្តរជាតិ។ មនុស្សជាង ៦០០ នាក់ត្រូវបានគេប្រកាសថានឹងចូលរួមក្នុងក្បួនដង្ហែដោយថ្មើរជើងដែលមានចម្ងាយរាប់រយគីឡូម៉ែត្រដើម្បីជាការតស៊ូមតិឲ្យមានការគោរពសិទ្ធិមនុស្សនៅកម្ពុជា។
ចុះផ្សាយនៅថ្ងៃ៖
ស្តាប់ - ០២:០០
ក្បួនដង្ហែទាំង៦ទិសនឹងចេញដំណើរពីស្រុកកំពុងត្របែក ខេត្តព្រៃវែងកាត់តាមផ្លូវជាតិលេខ១ ចេញពីស្រុកគិរីវង្ស ខេត្តតាកែវ កាត់តាមផ្លូវជាតិលេខ២ ចេញពីស្រុកឈូក ខេត្តកំពតកាត់តាមផ្លូវជាតិលេខ៣ ចេញពីភ្នំពេជ្រនិល ខេត្តកំពង់ស្ពឺកាត់តាមផ្លូវជាតិលេខ៤ ចេញពីស្រុករលៀផ្អៀខេត្តកំពុងឆ្នាំងតាមផ្លូវជាតិលេខ៥ និងចេញពីស្រុកព្រៃឈ ខេត្តកំពង់ចាមតាមផ្លូវជាតិលេខ។
សេចក្តីប្រកាសព័ត៌មានរបស់អង្គការលីកាដូដែលចេញផ្សាយនៅថ្ងៃទី ២ធ្នូនេះបានឲ្យដឹងថា សកម្មជនសិទ្ធិមនុស្សនិងក្រុមមិត្ត១០ធ្នូជាង ៦០០ នាក់ដែលដឹកនាំដោយព្រះសង្ឃនឹងចូលរួមក្នុងក្បួនដង្ហែនេះដើម្បីប្រារព្ធខួបទី៦៦ឆ្នាំនៃទិវាសិទ្ធិមនុស្សអន្តរជាតិ ១០ ធ្នូ។សេចក្តីប្រកាសព័ត៌មានបានស្រង់សង្ឃដីការរបស់ព្រះតេជគុណ លួន សូវ៉ាត ដែលបានអំពាវនាវឲ្យគ្រប់ព្រះសង្ឃទាំងអស់ក្រោកឈឡើងចងជាធ្លុងមួយជាមួយសកម្មជនសិទ្ធិមនុស្សដទៃទៀតដើម្បីយុត្តិធម៌សង្គម។
ជាផ្នែកមួយនៃព្រឹត្តិការណ៍នេះដែរ សហគមន៍ជនជាតិភាគតិចជាង ៣០០ នាក់រួមជាមួយសកម្មជនព្រះសង្ឃមួយចំនួនផងក៏គ្រោងរៀបចំធម្មយាត្រាជាលើកដំបូងក្នុងខេត្តរតនគិរីផងដែរ។ នេះបើយោងតាមសេចក្តីប្រកាសព័ត៌មានដដែល។ ធម្មយាត្រានៅក្នុងខេត្តនេះនឹងចាប់ផ្តើមពីថ្ងៃទី៣ធ្នូតទៅហើយ។ ចំណែកឯក្បួនដង្ហែទាំង៦ទិសចូលមកទីក្រុងភ្នំពេញគ្រោងជួបជុំគ្នានៅថ្ងៃទី១០ធ្នូនៅពីមុខរដ្ឋសភាជាតិ។ សកម្មជនសិទ្ធិមនុស្សទាំងនោះគ្រោងដាក់ញត្តិជូនអ្នកតំណាងរាស្ត្រដើម្បីទាមទារឲ្យមានការគោរពសិទ្ធិមនុស្សនៅកម្ពុជា។
ទិវាសិទ្ធិមនុស្ស ១០ ធ្នូឆ្នាំនេះគ្រោងប្រារព្ធធ្វើជាផ្លូវការនៅលើទីលានមុខវត្តបុទមវត្តីក្នុងរាជធានីភ្នំពេញ។ ក្រុមសហគមន៍ដែលមានទំនាស់ដីធ្លីនិងក្រុមសហជីពកម្មករ និងតំណាងសង្គមស៊ីវិលនានានឹងឡើងថ្លែងសារអំពីបញ្ហាសិទ្ធិមនុស្សផងដែរ។ ទិវាសិទ្ធិមនុស្សឆ្នាំនេះក៏បានកើតឡើងស្របពេលដែលសកម្មជនដីធ្លី និងសកម្មជនបក្សប្រឆាំងមួយចំនួនកំពុងជាប់ពន្ធនាគារក្រោមការចោទប្រកាន់ពីបទល្មើសផ្សេងៗគ្នា។ គេក៏នៅមិនទាន់ដឹងដែរថា តើអាជ្ញាធរនឹងអនុញ្ញាតឲ្យសង្គមស៊ីវិលប្រារព្ធទិវាសិទ្ធិមនុស្សនៅលើទីលានមុខវត្តបុទមវត្តីដែរឬក៏អត់នោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ