ក្រសួងវប្បធម៌ពិន័យតារាសម្ដែងស៊ិចស៊ីម្នាក់មិនឲ្យមានសកម្មភាពសិល្បៈមួយឆ្នាំ
ក្រសួងវប្បធម៌ និងវិចិត្រសិល្បៈនៅថ្ងៃទី១៧កញ្ញាម្សិលមិញ បានសម្រេចដាក់ពិន័យ តារាសម្ដែងម្នាក់ឈ្មោះ សេង សូណា មិនឲ្យមានសកម្មភាពសិល្បៈគ្រប់រូបភាពរយៈពេល១ឆ្នាំ។ មូលហេតុដោយសារតែ កញ្ញា សេង សូណា នៅតែបន្តប្រើប្រាស់សម្លៀកបំពាក់ស៊ិចស៊ី។ តែសម្រាប់អ្នកអភិរក្សវប្បធម៌ ផ្ដល់យោបល់ថា ភាគីទាំងពីរគួរថយមួយជំហ៊ានលើចំណុចនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤២
ជាថ្មីម្តងទៀត តារាសម្ដែង កញ្ញា សេង សូណា ត្រូវបានក្រសួងវប្បធម៌ និងវិចិត្រសិល្បៈហាមមិនឲ្យរូបនាង មានសកម្មភាពសម្ដែងពេញមួយឆ្នាំ ចាប់ពីថ្ងៃទី១៧កញ្ញា ម្សិលមិញ រហូតដល់ថ្ងៃទី១៧ខែកញ្ញា ឆ្នាំ២០១៩។ សកម្មភាពទាំងនោះរួមមាន៖ ការសម្ដែង ការថតខ្សែភាពយន្ត ខារ៉ាអូខេ ស្ពត និងចម្រៀង ដែលបង្ហាញមុខតាមកញ្ចក់ទូរទស្សន៍ជាដើម។
បើតាមក្រសួងវប្បធម៌ ការផ្អាកសកម្មភាពរបស់តារាសម្ដែង សេង សូណា ក៏ព្រោះតែនាងនៅតែបន្តប្រើប្រាស់សម្លៀកបំពាក់ និងឥរិយាបថធ្វើឲ្យប៉ះពាល់ដល់ទំនៀមទម្លាប់ ប្រពៃណីជាតិ។ ជុំវិញបម្រាមជាថ្មីនេះ គេមិនទាន់ឃើញមានប្រតិកម្មពីកញ្ញា សេង សូណា នៅឡើយទេ។ បើទោះបីជាមិនទាន់មានការឆ្លើយតបយ៉ាងណាក៏ដោយ តែកន្លងមកគេតែងស្ដាប់ពីមូលហេតុនៃតារាចូលចិត្តបង្ហាញភាពស៊ិចស៊ីមួយចំនួនថា មកពីចំណង់ចំណូលចិត្តផ្ទាល់ខ្លួន និងការដើរឲ្យទាន់សិល្បៈបែបសម័យ។
សូមបញ្ជាក់ថា វិធានការឆ្លើយតបរបស់ក្រសួងវប្បធម៌ចំពោះតារាសម្ដែង ដែលមានភាពស៊ិចស៊ី បានធ្វើឡើងជាបន្តបន្ទាប់ដោយក្នុងនោះរួមមាន តារាសម្ដែងដេនីក្វាន់ លោក អេនឌី រួមនឹងកញ្ញា សេង សូណា ពេលនេះ ជាដើម។
ដោយឡែក អ្នកសិក្សាសង្គម និងវប្បធម៌ផ្សេងទៀត បានលើកទឹកចិត្តដល់ភាគីទាំងពីរគឺក្រសួងវប្បធម៌ និងតារា ដែលមានភាពស៊ិចស៊ី គួរថយមួយជំហានម្នាក់ ដើម្បីវិស័យសិល្បៈរបស់ខ្មែរ។
លោកបណ្ឌិត ឈត ប៊ុនថង មន្ដ្រីស្រាវជ្រាវផ្នែកទំនាក់ទំនង វប្បធម៌ អប់រំ និងទេសចរណ៍ នៃរាជបណ្ឌិតសភាកម្ពុជាលើកឡើងថា គ្រប់តារាសម្ដែង ដែលចូលចិត្តភាពស៊ិចស៊ី គួរតែបែងចែកឲ្យដាច់រវាងចំណង់ចំណូលចិត្ត និងការហាមប្រាមរបស់ក្រសួងក្នុងការស្លៀកពាក់។ ដូចគ្នាដែរ ក្រសួង មិនគួរណាបិទសេរីភាពសម្រាប់ជីវិតឯកជនរបស់សិល្បៈករ ក្នុងការស្លៀកពាក់ឡើយ។ នេះបើតាមលោក ឈត ប៊ុនថង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ