ព្រះសង្ឃរងការរិះគន់តាមបណ្តាញសង្គមពីរឿង UPDATEសេរីទូរស័ព្ទក្រោយភ្ជុំបិណ្ឌ
ប៉ុន្មានថ្ងៃកន្លងទៅនេះ ប្រព័ន្ធបណ្តាញសង្គមហ្វេសប៊ុក បានបង្ហាញរូបភាពព្រះសង្ឃជាច្រើនអង្គនៅក្នុងទីផ្សារ ដើម្បីទិញទូរស័ព្ទទំនើបៗ។ ជាការកត់សម្គាល់នៅក្នុងទំព័រហ្វេសប៊ុក លោក អៀវ ចំរើន ដែលជាស្នងការនគរបាលខេត្តកណ្តាល បានសរសេរពីការទទួលបាននូវកុសលផលបុណ្យ ដែលប្រជាជនខ្មែរបានធ្វើនៅក្នុងឱកាសបុណ្យភ្ជុំបិណ្ឌ កន្លងទៅនេះ «សូម្បីព្រះសង្ឃ ក៏បានទទួលនូវចំហាយពីមនុញ្ញផលនៃបុណ្យភ្ជុំបិណ្ឌនេះផងដែរ» ក៏ប៉ុន្តែការផ្សព្វផ្សាយនេះត្រូវបានច្រានចោលដោយមន្ត្រីសង្ឃជាន់ខ្ពស់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៤
ការលើកឡើងបែបនេះគឺដោយសារតែមានព្រះសង្ឃអង្គខ្លះបានចូលផ្សារតូចមួយនៅក្រុងភ្នំពេញ ដើម្បីដូរទូរស័ព្ទសេរីថ្មី ដែលនឹកស្មានមិនដល់។ ចំណុចនេះត្រូវម្ចាស់ហ្វេសប៊ុកលើកឡើងថា «លោកយាយលោកតានិងពុទ្ធបរិស័ទ លោកសន្សំលុយដែលកូនចៅឲ្យមិនហ៊ានទិញចំណីទទួលទាន ទុកដល់ភ្ជុំនឹងអាលទៅវត្តធ្វើបុណ្យ» ក៏ប៉ុន្តែឃ្លាខាងក្រោយបញ្ជាក់ថាបានជាធ្វើបុណ្យទៅហើយកុំគិតដូច្នេះនាំតែអសទ្ធារទេ។
ទាក់ទងទៅនឹងការរិះគន់ តាមរយៈអត្ថាធិប្បាយតគ្នានិងមានរូបភាពបង្ហោះលើបណ្តាញសង្គមដូច្នេះ សម្តេចឧត្តមចរិយា ឆឹង ប៊ុនឈា សមាជិកថេរសភាសង្ឃ និងជាអគ្គនាយករងពុទ្ធិកសិក្សាគណៈមហានិកាយ បានប្រតិកម្មថាជាការយករូបភាពផ្តេសផ្តាសមកបង្ហោះដែលធ្វើឲ្យប៉ះពាល់ដល់ឥទ្ធិពលព្រះពុទ្ធសាសនា ដោយលោកចាត់ទុកថាជារឿងមិនបានការ។
ជាមួយគ្នានេះលោក ស៊ិន សុមុនី អ្នកនាំពាក្យក្រសួងធម្មការ បានពន្យល់ថាការទិញរបស់ប្រើប្រាស់ទំនើបគឺជាសិទ្ធិរបស់ព្រះសង្ឃដែលជាពលរដ្ឋមួយរូប ហើយទទួលបានសេរីភាពពេញលេញពីរដ្ឋដូចអ្នកឯទៀតដែរ។ លោកថាអ្វីដែលជាកំហុសឆ្គងគឺការយកទៅប្រើប្រាស់របស់ព្រះសង្ឃ ដែលលោកត្រូវទទួលខុសត្រូវទាក់ទងទៅនឹងធម៌វិន័យ។
ភិក្ខុធួ ធា គង់នៅវត្តបុទុមវតី ដែលបានប្រើប្រាស់សម្ភារៈទំនើបសម្រាប់ការងារសង្គមដែរនោះ មានសង្ឃដីការទទួលស្គាល់ថាមានព្រះសង្ឃមួយចំនួនតូចទេ ដែលបានប្រើប្រាស់សម្ភារៈទាន់សម័យ ក៏ប៉ុន្តែភាគច្រើនសម្រាប់ប្រយោជន៍នៅក្នុងការងារសង្គម។ភិក្ខុអង្គនេះមានសង្ឃដីការបន្តថា គេមិនគួរផ្សព្វផ្សាយជាសាធារណៈបែបនេះទេ គួរតែរកមធ្យោបាយដោះស្រាយទៅតាមព្រះចៅអធិការវត្តអារ៉ាមនីមួយៗ ដើម្បីកុំឲ្យប៉ះពាល់ព្រះសង្ឃទូទៅជាទីសក្ការៈរបស់ពុទ្ធបរិស័ទ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ