អង្គការមាតាធម្មជាតិ នឹងរៀបចំបុណ្យកោងកាងនៅកោះស្រឡៅ ដើម្បីជំរុញឲ្យស្រឡាញ់ព្រៃកោងកាង
អង្គការមាតាធម្មជាតិសហការជាមួយក្រុមយុវជនEco-life Cambodia, Khmer Cam Youth និង N1M នឹងរៀបចំកម្មវិធីបុណ្យកោងកាងនៅក្នុងតំបន់កោះស្រឡៅ ដែលជាតំបន់ធ្លាប់រងផលប៉ះពាល់ពីការបូមខ្សាច់។ ពិធីបុណ្យនេះ នឹងរៀបចំធ្វើឡើងចាប់ពីថ្ងៃទី ១៣ ដល់ថ្ងៃទី ១៦ ខែឧសភាខាងមុខ នៅក្នុងភូមិកោះស្រឡៅ ឃុំកោះកាពិ ស្រុកកោះកុង ខេត្តកោះកុង។ អង្គការមាតាធម្មជាតិបានឲ្យដឹងថា ពិធីបុណ្យនេះ ធ្វើឡើងដើម្បីជំរុញឲ្យស្រឡាញ់ និងអភិរក្សព្រៃកោងកាង។
ចុះផ្សាយនៅថ្ងៃ៖
ស្តាប់ - ០១:៥១
នេះ គឺជាលើកទីមួយហើយដែលអង្គការមាតាធម្មជាតិ និងក្រុមយុវជនក៏ដូចព្រះសង្ឃដទៃទៀត បានផ្តួចផ្តើមរៀបចំកម្មវិធីបុណ្យកោងកាងនេះឡើង។ កម្មវិធីបុណ្យនេះ វាបៀបដូចជាដំណើរកម្សាន្តមួយដូច្នេះដែរ ដោយមានអ្នកចូលរួមចំនួនជាង ២០០នាក់ ហើយចេញដំណើរពីភ្នំពេញទៅកាន់ខេត្តកោះកុងត្រង់ចំណុចតំបន់កោះស្រឡៅតែម្តង។ អ្នកដែលចូលរួមទាំងជាង ២០០នាក់នេះ គឺសុទ្ធសឹងតែបានទិញសំបុត្រចូលរួមដែលមានតម្លៃ ៣០ដុល្លារអាមេរិក។ បើតាមអ្នករៀបចំដំណើរកម្សាន្តបុណ្យកោងកាង ពិធីបុណ្យនេះគ្រោងចំណាយជិត ១ម៉ឺនដុល្លារអាមេរិក។
លោកសាន់ ម៉ាឡា សមាជិកអង្គការមាតាធម្មជាតិ បានបញ្ជាក់ថា មូលហេតុនៃការរៀបចំពិធីបុណ្យកោងកាងនេះនៅកោះស្រឡៅ គឺដើម្បីផ្សព្វផ្សាយពីសារៈសំខាន់នៃព្រៃកោងកាង ក៏ដូចជានាំសិស្សនិស្សិតដែលចូលរួមបានស្គាល់កោះស្រឡៅ និងសក្តានុពលទេសចរនៅលើកោះនេះ ។ ម្យ៉ាងវិញទៀត ក៏ជាការផ្សព្វផ្សាយ និងជំរុញឲ្យរដ្ឋាភិបាលកម្ពុជាងាកមកអភិវឌ្ឍតំបន់កោះស្រឡៅឲ្យទៅជាតំបន់អេកូទេសចរដោយផ្អាកនិងមិនបន្តអាជ្ញាប័ណ្ណឲ្យមានការបូមខ្សាច់នៅក្នុងតំបន់នេះទៀត។ បើតាមលោកសាន់ ម៉ាឡា ពិធីបុណ្យនេះគឺកើតចេញពីគំនិតផ្តួចផ្តើមរបស់ក្រុមយុវជន និងព្រះសង្ឃដែលបានទៅបំបួសព្រៃកោងកាង ដើម្បីឲ្យរួចផុតការកាប់បំផ្លាញកាលពីឆ្នាំមុន។
កម្មវិធីដំណើរកម្សាន្តបុណ្យកោងកាងនេះ មានរយៈពេល ៤ថ្ងៃចាប់ពីថ្ងៃទី ១៣ ដល់ថ្ងៃទី ១៦ ខែឧសភា ឆ្នាំ ២០១៧។ បើតាមរបៀបវារៈ ដំណើរកម្សាន្តក្នុងន័យបណ្តុះក្តីស្រឡាញ់ និងអភិរក្សព្រៃធម្មជាតិកោងកាងនេះ ក៏មានការចូលរួមពីមន្រ្តីនៃក្រសួងស្ថាប័នពាក់ព័ន្ធ។ កម្មវិធីនេះ ក៏មានការតាំងពិព័រណ៍ ការធ្វើបទបង្ហាញពីសារៈសំខាន់នៃព្រៃកោងកាង ការដាំកូនឈើ ការទស្សនាសម្រស់ព្រៃកោងកាងក្នុងតំបន់កោះស្រឡៅ ក៏ដូចជាតំបន់ការពារស្មៅសមុទ្រជាដើម។ ក្រៅពីនេះ ក៏មានការធ្វើបទបង្ហាញអំពីស្ថានភាព និងជីវភាពរស់នៅរបស់សហគមន៍នៅទីនោះ និងការបង្ហាញពីបញ្ហាប្រឈមនានារបស់តំណាងសហគមន៍នៅក្នុងតំបន់កោះស្រឡៅនេះផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ