ក្រសួងធនធានទឹក៖ តំបន់ឆ្នេរសមុទ្រទទួលរងឥទ្ធិពលខ្យល់កន្ត្រាក់ច្រើនជាងគេ
គិតតាំងពីដើមខែ កក្កដានេះ បណ្តាខេត្តមួយចំនួនក្នុងប្រទេសកម្ពុជាបានរងឥទ្ធិពលខ្យល់កន្រ្តាក់ ជាច្រើនករណីដែលបំផ្លាញទ្រព្យសម្បត្តិរបស់ប្រជាពលរដ្ឋយ៉ាងច្រើន។ មូលហេតុនៃខ្យល់កន្ត្រាក់កើតឡើងដោយសារតែ កូនព្យុះតាឡាស ដែលបង្កឲ្យមានភ្លៀងធ្លាក់ច្រើននៅអាងទន្លេមេគង្គ នៅទូទាំងប្រទេសកម្ពុជា ចាប់ពីថ្ងៃទី ១៧ ដល់ថ្ងៃទី ២១ កក្កដា។ ហើយកូនព្យុះនេះ បានជះឥទ្ធិពលខេត្តដែលនៅជិតតំបន់មាត់សមុទ្រច្រើនជាងគេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
អត្ថបទដោយ៖ តាន់ គឹមច័ន្ទវាសនា និងទី កញ្ញា
លោក កែវ វី នាយកខុទ្ទកាល័យគណៈកម្មាធិការជាតិគ្រប់គ្រងគ្រោះមហន្តរាយ បានឲ្យដឹងថា បើគិតចាប់ពីកូនព្យុះតាឡាសបានកើតឡើង មានផលប៉ះពាល់ជាខ្យល់បក់បោកភាគច្រើន នៅតាមតំបន់ឆ្នេរសមុទ្រ ដូចជាខេត្តកំពត កោះកុង និងព្រះសីហនុ។ ដែលបង្កអោយផ្ទះរលំ៨ខ្នង ផ្ទះរងការខូចខាត និងរបើកជញ្ជាំង ១៩៩ខ្នង របើកដំបូលអគាររដ្ឋបាលមួយខ្នង លិចទូកនេសាទ៣គ្រឿង ដែលក្នុងនោះពីរគ្រឿងលិចចូលក្នុងសមុទ្រពុំទាន់រកឃើញនៅឡើយ ហើយអ្នកនេសាទបួននាក់ បានបាត់ខ្លួន និងសង្គ្រោះបាន៨នាក់។
ខណៈពេលដែលភ្លៀងបន្តធ្លាក់ ទឹកទន្លេនៅតែកើនឡើងបន្តបន្ទាប់ ក្រសួងធនធានទឹកបានអំពាវនាវឲ្យអ្នកធ្វើដំណើរតាមផ្លូវទឹក បង្កើនការយកចិត្តទុកដាក់ និងប្រុងប្រយ័ត្ន ជាពិសេសចំពោះក្មេង។ ទឹកដែលកើនឡើងនេះ បន្តហូរចូលទៅកាន់អូរ ព្រែក តំបន់ទំនាបនានា ក្រសួងក៏បានប្រាប់ឲ្យប្រជាកសិករប្រមូលកសិផលឲ្យបានរួសរាន់ទាន់ពេលវេលា ជៀសវាងលិចលង់។
លោក ចាន់ យុត្ថា នាយកខុទ្ទកាល័យ និងអ្នកនាំពាក្យក្រសួងធនធានទឹកបានអោយដឹងថា ចំពោះខ្យល់កន្ត្រាក់នេះ មិនបានប៉ះពាល់ដល់អាយុជីវិតរបស់ប្រជាពលរដ្ឋនោះទេ តែបានបំផ្លាញទ្រព្យសម្បត្តិរបស់ប្រជាពលរដ្ឋ ដូចជា ផ្ទះសម្បែង រថយន្តនិងធ្វើឲ្យលិចទូកនេសាទជាដើម។ តែបើគិតត្រឹមព្រឹកថ្ងៃ១៨ កក្កដានេះ ខ្យល់កន្ត្រាក់ បានថយឥទ្ធិពលហើយ បើទោះជាផ្ទៃមេឃនៅតែមានសភាពអាប់អួរក៏ដោយ។ ក្រោយពីខ្យល់កន្ត្រាក់នេះអស់ឥទ្ធិពល អាចនឹងកើតឡើងនូវប្រព័ន្ធសម្ពាធទាបមួយថ្មី ដែលជាហេតុធ្វើឲ្យភ្លៀងនៅតែបន្តធ្លាក់។
គួរអោយដឹងដែរថា នៅខេត្តកោះកុង ភ្លៀងធ្លាក់ខ្លាំងលាយឡំជាមួយនឹងខ្យល់កន្ត្រាក់ បានវាយប្រហារមកលើក្រុងខេមរភូមិន្ទ នាព្រឹកថ្ងៃទី១៧ ខែកក្កដា ដោយបង្កឱ្យរលំដើមឈើសង្កត់លើរថយន្ត និងផ្ទះរបស់ប្រជាពលរដ្ឋ ហើយតំបន់មួយចំនួនកំពុងរងការលិចលង់។ ដោយឡែក នៅខេត្តព្រះសីហនុ ភ្លៀងបានបន្ដធ្លាក់ជាប់ៗគ្នា៣ថ្ងៃ បណ្ដាលឲ្យតំបន់វាលទំនាបមួយចំនួនរងការជន់លិច ជាហេតុធ្វើឲ្យអាជ្ញាធរ ធ្វើការអំពាវនាវឲ្យប្រជានេសាទត្រូវតែអនុវត្តន៍តាមការហាមប្រាមរបស់សមត្ថកិច្ច ជៀសវាងមានគ្រោះថ្នាក់កើតឡើង ចំណែកប្រជាពលរដ្ឋដែលទៅលេងកម្សាន្ដនៅតំបន់ឆ្នេរសមុទ្រ ត្រូវតែបង្កើនការប្រុងប្រយ័ត្នខ្ពស់។
គួរជម្រាបជូនថា កូនព្យុះ ឈ្មោះ តាឡាស ជាព្យុះទី៤ ប្រចាំឆ្នាំ ២០១៧ ។ កូនព្យុះនេះ បានកើតឡើង និងកំពុងស្ថិតនៅក្នុងសមុទ្រចិនខាងត្បូង ដែលធ្វើឲ្យភ្លៀងបន្តធ្លាក់រាយប៉ាយនៅក្របខណ្ឌទូទាំងប្រទេសកម្ពុជា រហូតដល់ថ្ងៃទី ២១ កក្កដា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ