នាងផល្លា៖កិត្តិយសថ្ងៃនេះជាលទ្ធផលប្រឹងប្រែងជាង២០ឆ្នាំ
នៅថ្ងៃទី១៨ មីនានេះអ្នកគ្រូនាងផល្លាដែលជាគ្រូបង្រៀនកុមារគ ថ្លង់របស់អង្គការគ្រួសារថ្មីបានវិលមកកាន់មាតុប្រទេសវិញហើយ បន្ទាប់ពីបានចូលរួមការប្រកួតប្រជែងការជ្រើសរើសកម្មវិធីពានរង្វាន់គ្រូឆ្នើមពិភពលោកក្នុងទីក្រុងឌូប៊ៃ។ អ្នកគ្រូនាងផល្លាបានលើកឡើងថា អ្វីដែលអ្នកគ្រូមានថ្ងៃនេះ គឺជាសមិទ្ធិផលជាង២០ឆ្នាំមកហើយ។
ចុះផ្សាយនៅថ្ងៃ៖
ស្តាប់ - ០២:២៥
នេះជាការលើកឡើងរបស់អ្នកគ្រូនាងដែលទើបតែត្រឡប់ពីការប្រកួតប្រជែងពានរង្វាន់គ្រូឆ្នើមពិភពលោក (Global Teacher Prize)ក្រោមសំឡេងទះដៃអបអរសាទរ និងការស្វាគមន៍ពីមនុស្សជិត៦០០នាក់ដែលបានឈរចាំតម្រៀបជួរនៅផ្លូវច្រកចេញនៃព្រលានយន្តហោះអន្តរជាតិភ្នំពេញ។ អ្នកដែលចាំទទួលមានរដ្ឋមន្ត្រីក្រសួងអប់រំ កុមារនៃអង្គការគ្រួសារថ្មី និងក្រុមយុវជនដែលដឹកនាំដោយលោកហ៊ុន ម៉ានី។ ពាក្យបដា ដែលសរសេរថា អ្នកគ្រូនាងផល្លា ជាគ្រាប់ពេជ្រនៃស្រី្តខ្មែរ អ្នកគ្រូនាងផល្លា នាំមកនូវកិត្តិយសជូនជាតិជាដើម រួមទាំងសម្លេងស្រែកជយោអ្នកគ្រូនាងផល្លាត្រូវបានលើកឡើងគ្រវីនិងស្រែកបន្ទរ។ អ្នកកាន់កម្រងផ្កាជាច្រើនសម្រុកបំពាក់ជូនអ្នកគ្រូ ហើយអ្នកខ្លះបានលួចបង្ហូរទឹកភ្នែកព្រោះតែរំភើប។
អ្នកគ្រូនាងផល្លាដែលជាគ្រូបង្រៀននៃអង្គការគ្រួសារថ្មី និងជាបុគ្គលិកមន្ត្រីរាជការក្រសួងអប់រំដែរនោះ ត្រូវបានជ្រើសរើសចូលប្រកួតប្រជែងយកពាន់រង្វាន់គ្រូបង្រៀនឆ្នើម២០១៥ដែលមានតម្លៃទឹកប្រាក់១លានដុល្លារអាមេរិក។ ជាការប្រកួតប្រជែងដែលមានអ្នកចូលរួមប្រមាណ៨ពាន់នាក់មកពីជុំវិញពិភពលោក ហើយអ្នកគ្រូបានស្ថិតក្នុងចំណោម១០នាក់ចុងក្រោយ។ លោកហង់ ជួនណារ៉ុន រដ្ឋមន្ត្រីក្រសួងអប់រំបានសរសើរអ្នកគ្រូនាងផល្លាបាននាំមកនៅមោទនភាពជូនជាតិកម្ពុជាបើទោះបីជាអ្នកគ្រូមិនបានទទួលជ័យលាភីក៏ដោយ។ លោករដ្ឋមន្ត្រីដែលបានមកឈរចាំទទួលតាំងពីប្រមាណជិត១ម៉ោងមុនការមកដល់របស់អ្នកគ្រូនាង ផល្លានៅម៉ោង១០ និង១៥នាទីព្រឹក បានបញ្ជាក់ថា រដ្ឋាភិបាលនឹងបំពាក់មេដៃថ្នាក់មហាសេរីវឌ្ឍន៍នៃព្រះរាជាណាចក្រកម្ពុជាដែលជាមេដៃខ្ពស់ជាងគេបង្អស់ ដោយលោកនាយករដ្ឋមន្ត្រីហ៊ុន សែន នៅថ្ងៃទី២៦មីនាខាងមុខ។
ហើយក្រៅពីនោះ រដ្ឋាភិបាលនឹងផ្តល់ប្រាក់រង្វាន់លើកទឹកចិត្តដល់អ្នកគ្រូនាងផល្លាចំនួន១០០លានរៀលផងដែរ។ អ្នកគ្រូ នាង ផល្លា បានប្រើប្រាស់ពេលវេលាបង្រៀនកុមារគថ្លង់នៅក្នុងអង្គការគ្រួសារថ្មីតាំងពីឆ្នាំ១៩៩៣។ យ៉ាងណាក៏ដោយអ្នកគ្រូនាងផល្លាដែលបាននាំកិត្តិយសជូនប្រទេសកម្ពុជានោះ បានអះអាងថានឹងបន្តអាជីពបង្រៀនកុមារពិការគថ្លង់ជារៀងរហូតដល់ពេលអស់សមត្ថភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ