ការរារាំងមិនឲ្យពលរដ្ឋបោះឆ្នោតដូចឆ្នាំ២០១៣៖ គ.ជ.ប. ជឿថានឹងមិនកើតឡើងទៀតទេ!
គណៈកម្មាធិការជាតិរៀបចំការបោះឆ្នោត បង្ហាញពីជំនឿថា នៅក្នុងការបោះឆ្នោតជ្រើសរើសក្រុមប្រឹក្សាឃុំសង្កាត់នាពេលខាងមុខ នឹងមិនមានការរារាំងពលរដ្ឋណាម្នាក់មិនឲ្យបោះឆ្នោត ដោយចោទថាជាជនបរទេស ដូចការបោះឆ្នោតខែកក្កដាឆ្នាំ២០១៣ឡើយ។ នេះបើតាមលោក គួយ ប៊ុនរឿន អនុប្រធាន គ.ជ.ប. ដែលបានថ្លែងនៅក្នុងពិធីបិទកិច្ចប្រជុំពិគ្រោះយោបល់លើសេចក្ដីព្រាងបទបញ្ជា និង នីតិវិធីសម្រាប់ការបោះឆ្នោតជ្រើសរើសក្រុមប្រឹក្សាឃុំសង្កាត់ ឆ្នាំ២០១៧ នាថ្ងៃសុក្រម្សិលមិញ។
ចុះផ្សាយនៅថ្ងៃ៖
ស្តាប់ - ០២:១៥
លោក គួយ ប៊ុនរឿន អនុប្រធាន គ.ជ.ប. ជឿជាក់ថានឹងមិនមានហេតុការណ៍រារាំងពលរដ្ឋមិនឲ្យបោះឆ្នោតដោយចោទថាជាជនបរទេសដូចអាណត្តិមុន ព្រោះតែការចុះឈ្មោះបោះឆ្នោតនិងការបញ្ជាក់ពីសញ្ជាតិខ្មែរ ត្រូវបានធ្វើឡើងយ៉ាងលម្អិតជាច្រើនដំណាក់កាល។ មិនត្រឹមតែប៉ុនណោះ គ.ជ.ប. បានបើកសិទ្ធិឲ្យពលរដ្ឋប្ដឹងតវ៉ានិងប្ដឹងជំទាស់ ចំពោះជនណាម្នាក់ដែលពលរដ្ឋសង្ស័យថាមិនមែនសញ្ជាតិខ្មែរ មិនទាន់គ្រប់អាយុ ឬជាប់ពិរុទ្ធថែមទៀត។
សូមរំលឹកជូនថា នៅក្នុងការបោះឆ្នោតជាតិកាលពីឆ្នាំ២០១៣កន្លងទៅ អ្នកបោះឆ្នោតនៅតាមការិយាល័យមួយចំនួន បាននាំគ្នារារាំងជនជាតិវៀតណាមដែលបានចូលទៅបោះឆ្នោត។ ជាក់ស្ដែង ការិយាល័យមួយនៅក្នុងឃុំក្ដឿងរាយ ស្រុកកញ្ជ្រៀច ខេត្តព្រៃវែង ត្រូវគេរាយការណ៍ថា អ្នកបោះឆ្នោតនៅទីនោះបាននាំគ្នាធ្វើបាតុកម្ម តវ៉ាប្រឆាំង នៅពេលពួកគេឃើញជនជាតិវៀតណាមជាច្រើន នាំគ្នាទៅបោះឆ្នោត។ បញ្ហារារាំងជនជាតិវៀតណាមមិនឲ្យបោះឆ្នោត ក៏កើតមានដែរនៅក្នុងវត្តចំប៉ា ស្រុកកៀនស្វាយ ខេត្តកណ្ដាល។
យ៉ាងណាមិញ បើទោះបីជា គ.ជ.ប. រំពឹងថា នឹងមិនមានការរារាំងដូច្នេះកើតឡើងនៅក្នុងការបោះឆ្នោតជ្រើសរើសក្រុមប្រឹក្សាឃុំសង្កាត់ ក្នុងឆ្នាំ២០១៧នេះក៏ដោយ ក៏មន្ដ្រីរដ្ឋាភិបាលបានព្រមានទុកជាមុនពីវិធានការរបស់ខ្លួន ប្រសិនបើហេតុការណ៍ដូច្នេះនៅតែកើតឡើង។ បើតាមមន្ដ្រីក្រសួងមហាផ្ទៃ លោក សោម ចាន់ឌីណា ជនណាដែលរារាំងអ្នកដទៃមិនឲ្យបោះឆ្នោត ត្រូវប្រឈមមុខនឹងការឃាត់ខ្លួន និងផាកពិន័យ។ វិធានការនេះត្រូវបានមន្ដ្រីក្រសួងមហាផ្ទៃដដែលពន្យល់ថា ធ្វើឡើងតាមរយៈកិច្ចព្រមព្រៀងជាមួយ គ.ជ.ប. ដែលបានស្នើសុំកិច្ចសហការពីក្រសួងមហាផ្ទៃនិងក្រសួងការពារជាតិ ដើម្បីរក្សាសណ្ដាប់ធ្នាប់ក្នុងអំឡុងពេលបោះឆ្នោត។
ជាការកត់សម្គាល់ ក្នុងគោលដៅទប់ស្កាត់ការរារាំងអ្នកមានសិទ្ធិបោះឆ្នោតមិនឲ្យបោះឆ្នោត អំពើហិង្សា និង បាតុភូតមិនប្រក្រតីនានាក្នុងការបោះឆ្នោតខាងមុខ រដ្ឋាភិបាលត្រៀមដាក់ពង្រាយកម្លាំងប្រដាប់អាវុធចម្លោះពី៥ពាន់ រហូតដល់៧ម៉ឺននាក់ដើម្បីការពារសន្តិសុខ សណ្ដាប់ធ្នាប់។ ការពង្រាយកម្លាំងប្រដាប់អាវុធចំនួនច្រើនដូច្នេះ ត្រូវបានអ្នកតាមដានការបោះឆ្នោតមួយចំនួនបារម្ភថា អាចក្លាយទៅជាការគម្រាមកំហែង និង បំភិតបំភ័យដល់អ្នកបោះឆ្នោតទៅវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ