ផ្ទេរតំណែងគជប៖ ប្រធានចាស់រម្លឹកពីប្រវត្តិ និងស្នាដៃ ឯប្រធានថ្មី សន្យា និងប្តេជ្ញា
ពិធីផ្ទេរតំណែងគជប ទាំង ៩ រូប ត្រូវបានធ្វើឡើង កាលពីព្រឹកថ្ងៃចន្ទ ទី១៣មេសា ក្រោមវត្តមានតំណាងព្រះមហាក្សត្រ និងសម្តេចព្រះមហាសង្ឃរាជទាំងពីរគណៈ។ មុននឹងប្រគល់ និងទទួលត្រា ប្រធានគជបចាស់ លោក អ៊ឹម សួស្តី បានរម្លឹកពីប្រវត្តិ និងស្នាដៃ ដែលគជប បានរៀបចំការបោះឆ្នោត ១២ លើកមកហើយ។ ចំណែកប្រធានថ្មី លោក ស៊ិក ប៊ុនហុក បានប្រកាសសន្យា និងប្តេជ្ញា អនុវត្តតួនាទី ភារកិច្ច ប្រកបដោយឯករាជ្យ អព្យាក្រឹត្យ សុចរិតភាព តម្លាភាព សំដៅធានាឲ្យការបោះឆ្នោត បានប្រព្រឹត្តទៅដោយសេរី ត្រឹមត្រូវ និងយុត្តិធម៌។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២១
ការផ្ទេរតំណែងគជប កាលពីព្រឹកថ្ងៃចន្ទ ទី១៣មេសានេះ គឺជាលើកទី៤ ហើយ ចាប់តាំងពីគជប ត្រូវបានបង្កើតឡើងលើកដំបូង កាលពីថ្ងៃទី១កុម្ភៈ ឆ្នាំ១៩៩។ ក្នុងរយៈពេល ១៧ ឆ្នាំមកនេះ គជប បានរៀបចំការបោះឆ្នោត ១២ លើក រួមមាន ការបោះឆ្នោតព្រឹទ្ធសភា ការបោះឆ្នោតតំណាងរាស្ត្រ ការបោះឆ្នោតឃុំសង្កាត់ និងការបោះឆ្នោតក្រុមប្រឹក្សារាជធានី ខេត្ត ក្រុងស្រុកខណ្ឌ។
មុនពេលប្រគល់ត្រា លោក អ៊ឹម សួស្តី ប្រធានគជបចាស់ លើកឡើងថា តាមរយៈការរៀបចំការបោះឆ្នោតជាច្រើនលើក បានបង្ហាញពីសមត្ថភាពគ្រប់គ្រង និងការរៀបចំចាត់ចែងការបោះឆ្នោតរបស់គជប កាន់តែរឹងមាំ រហូតដល់មានប្រទេសមួយចំនួន ដូចជា អ៊ីរ៉ាក់ នេប៉ាល់ ទីម័រខាងកើត និងមីយ៉ាន់ម៉ា បានមកស្វែងយល់ និងដកស្រង់បទពិសោធ។
លោក អ៊ឹម សួស្តី បានបញ្ជាក់ថា “បើទោះបីជានិច្ចជាកាល តែងតែទទួលរងនូវការទិទៀន ការចោទប្រកាន់ឥតឈប់ឈរពីសំណាក់ភាគីពាក់ព័ន្ធមួយចំនួនយ៉ាងណាក៏ដោយ ក៏គណៈកម្មាធិការជាតិរៀបចំការបោះឆ្នោតមួយនេះ តែងតែប្រកាន់ភ្ជាប់នូវបាវចនារបស់ខ្លួន គឺឯករាជ្យ អព្យាក្រឹត សច្ចៈ យុត្តិធម៌ និងតម្លាភាព។
ដោយទទួលស្គាល់ថា ការងាររៀបចំការបោះឆ្នោត ជាភារកិច្ចមួយ ដែលមានការលំបាក និងមានភាពស្មុគស្មាញខ្លាំង លោក ស៊ិក ប៊ុនហុក ប្រធានគជបថ្មី បានសរសើរពីស្នាដៃរបស់គជបអាណត្តិមុន ហើយលោកប្រកាសសន្យា និងប្តេជ្ញា បន្តអនុវត្តការងាររៀបចំការបោះឆ្នោតឲ្យទទួលលទ្ធផលកាន់តែល្អប្រសើរ ពិសេសការបោះឆ្នោតឃុំសង្កាត់ ឆ្នាំ២០១៧ និងការបោះឆ្នោតតំណាងរាស្ត្រ ឆ្នាំ២០១៨។
លោក ស៊ិក ប៊ុនហុក បានបញ្ជាក់ថា “យើងខ្ញុំសូមប្តេជ្ញា ខិតខំប្រឹងប្រែង យកអស់កម្លាំងកាយចិត្ត អនុវត្តតួនាទី ភារកិច្ច ប្រកបដោយឯករាជ្យ អព្យាក្រឹត្យ សុចរិតភាព តម្លាភាព សំដៅធានាឲ្យការបោះឆ្នោតបានប្រព្រឹត្តទៅដោយសេរី ត្រឹមត្រូវ និងយុត្តិធម៌ និងរៀបចំចាត់ចែងការបោះឆ្នោតតាមបទដ្ឋានបច្ចេកទេសមួយដ៏សមរម្យ ស្របតាមច្បាប់ បទបញ្ជា និងនីតិវិធីនៃការបោះឆ្នោត ប្រកបដោយស្មារតីទទួលខុសត្រូវខ្ពស់ ដើម្បីសម្រេចបានការបោះឆ្នោតមួយ ដែលលទ្ធផលអាចទទួលយកបានពីគ្រប់ភាគីពាក់ព័ន្ធទាំងអស់។
ដោយឡែកលោក គួយ ប៊ុនរឿន អនុប្រធានគជបថ្មី ដែលមកពីគណបក្សសង្គ្រោះជាតិ បានចាត់ទុកថ្ងៃផ្ទេរតំណែងនេះ ជាថ្ងៃប្រវត្តិសាស្ត្រ ហើយលោកសង្ឃឹមថា គជបថ្មី ដែលមានការប្តេជ្ញាចិត្តខ្ពស់ នឹងបង្កើនជំនឿចិត្តរបស់មហាជន ក្នុងការរៀបចំការបោះឆ្នោត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ