បក្សនយោបាយមួយចំនួនឯកភាពនឹងសំណើច្បាប់អាពាហ៍ពិពាហ៍អ្នកស្រឡាញ់ភេទដូចគ្នា
តំណាងគណបក្សនយោបាយចំនួន៥ ដែលបានចូលរួមក្នុងវេទិការបស់អង្គការក្រៅរដ្ឋាភិបាលនៅថ្ងៃនេះ បានលើកឡើងថា ពួកគេទទួលយកសំណើរបស់ក្រុមអ្នកស្រឡាញ់ភេទដូចគ្នា ដែលចង់បានច្បាប់អាពាហ៍ពិពាហ៍អ្នកស្រឡាញ់ភេទដូចគ្នា។ ខណៈគណបក្សនយោបាយខ្លះ មិនបានផ្តល់អាទិភាពចំពោះច្បាប់នេះឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៣
តំណាងគណបក្សសង្គ្រោះជាតិលោក សួន រីដា បានលើកឡើងថាគណបក្សនេះនឹងធ្វើប្រជាមតិចំពោះសំណើច្បាប់អាពាហ៍ពិពាហ៍អ្នកស្រឡាញ់ភេទដូចគ្នា ប្រសិនបើបក្សនេះដឹកនាំរដ្ឋាភិបាលនៅឆ្នាំ២០១៨។ លោក សួន រីដា បានបញ្ជាក់ទៀតថាប្រសិនបើមានប្រជាពលរដ្ឋភាគច្រើនគាំទ្រ នោះគណបក្សសង្គ្រោះជាតិនឹងអនុម័តភ្លាម។ តំណាងគណបក្សសង្គ្រោះជាតិដដែលបន្តការស្រឡាញ់ភេទដូចគ្នា មិនមែនជារឿងខុសធម្មជាតិនោះទេ។
តំណាងគណបក្សសម្ព័ន្ធដើម្បីប្រជាធិបតេយ្យ លោកសយ ជីវ័ន្ត បានលើកឡើងថា គណបក្សនេះមិនត្រឹមតែកែប្រែច្បាប់ទេ គឺរើទាំងរដ្ឋធម្មនុញ្ញទៀត នៅពេលដឹកនាំប្រទេស។ ប៉ុន្តែគណបក្សនឹងជ្រើសរើសយកតែបញ្ហា ឬច្បាប់ណា ដែលត្រូវដោះស្រាយ ឬកែប្រែមុនគេប៉ុណ្ណោះ បន្ទាប់មកទើបដោះស្រាយបញ្ហាតូចៗតាមក្រោយ។
លោក ឆាំ ប៊ុនថេត ទីប្រឹក្សាគណបក្សប្រជាធិបតេយ្យមូលដ្ឋាន និងតំណាងគណបក្សខ្មែររួបរួមជាតិ កញ្ញា សុខ រតនា បានលើកឡើងថាគណបក្សនឹងពិចារណាលើការទាមទាររបស់ក្រុមអ្នកស្រឡាញ់ភេទដូចគ្នា ហើយគណបក្សនឹងមិនបដិសេធទេ។
ចំណែកចុងក្រោយ គឺគណបក្សហ្វ៊ិនស៊ិនប៉ិចវិញ បានលើកឡើងថាគណបក្សនេះគាំទ្រចំពោះសំណើបង្កើតច្បាប់អាពាហ៍ពិពាហ៍អ្នកស្រឡាញ់ភេទដូចគ្នា។ តំណាងហ្វ៊ិនស៊ិនប៉ិចលោកផន ចន្ថា បញ្ជាក់ថា នៅពេលដែលគណបក្សនេះជាប់ឆ្នោតជាមេឃុំ នោះមេឃុំនឹងធ្វើសំណើមកកាន់រដ្ឋសភា ដើម្បីឲ្យមានការកែប្រែ។
សូមជម្រាបជូនថាកាលឆ្នាំ២០០៤ អតីតព្រះមហាក្សត្រព្រះបរមរតនកោដ្ឋ ទទួលបានការសាទរពីការប្រទានការគាំទ្រទៅកាន់សហគមន៍អ្នកស្រឡាញ់ភេទដូចគ្នា ហើយនៅឆ្នាំ២០១២ប្រមុខរដ្ឋាភិបាលកម្ពុជាបានថ្លែងអំពាវនាវមិនអោយមានការរើសអើងចំពោះមនុស្សស្រឡាញ់ភេទដូចគ្នា។
គួរជម្រាបជូនថានៅដើមខែឧសភា មជ្ឈមណ្ឌលសិទ្ធិមនុស្សកម្ពុជាបានឲ្យដឹងថាបច្ចុប្បន្ននេះនៅក្នុងប្រទេសកម្ពុជាមានគូស្រករ ដែលមានភេទដូចគ្នា៦ពាន់គូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ