អាជីវករបារម្ភពីការជាប់បំណុលធនាគារប្រសិនបើអាក់ខានលក់ដូរ
លោក ប៉ា សុជាតិវង្ស នៅព្រឹកថ្ងៃសុក្រនេះបានចុះទៅជួបអាជីវករផ្សារដើមគរនិងត្រួតពិនិត្យសោភ័ណភាពរបស់ផ្សារ។ ការជួបនេះក៏បានពិភាក្សាទៅលើគម្រោងសាងសង់ផ្សារថ្មីផងដែរ។ តំណាងអាជីវករនៅតែបារម្ភចំពោះគម្រោងធ្វើផ្សារថ្មីអាចធ្វើឲ្យពួកគាត់ប្រឈមជាមួយបំណុលធនាគារ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣១
រហូតមកដល់ពេលនេះគម្រោងផ្លូវការអ្វីមួយសម្រាប់សាងសង់ផ្សារដើមគរថ្មី នៅមិនទាន់លេចចេញជារូបរាងនៅឡើយ។ មិនទាន់លេចចេញជារូបរាងក៏ព្រោះតែអាជីវករបន្តប្រឆាំងគម្រោងធ្វើផ្សារថ្មីនេះ។
លោក ឡុង ឌីម៉ង អ្នកនាំពាក្យសាលារាជធានីភ្នំពេញបានប្រាប់វិទ្យុបារាំងអន្តរជាតិ នៅថ្ងៃព្រឹកថ្ងៃសុក្រថា សាលារាជធានីភ្នំពេញជាអ្នកចំណាយប្រាក់ដោយផ្ទាល់ក្នុងការធ្វើផ្សារថ្មីនេះពោលគឺមិនមែនប្រគល់សិទ្ធទៅឲ្យក្រុមហ៊ុនឯកជនជាអ្នកសាងសងនោះទេ។ បើតាមលោក ឡុង ឌីម៉ង គម្រោងសាងសង់ផ្សារថ្មីគឺដើម្បីបង្កលក្ខណៈងាយស្រួលដល់ប្រជាពលរដ្ឋខ្មែរនិងអាជីវករខ្លួនឯងក្នុងការរៀបចំសណ្ដាប់ធ្នាប់ផ្សារឡើងវិញទាំងអនាម័យនិងសោភ័ណភាព។
ជាការគត់សម្គាល់ ផ្សារដើមគរដែលបច្ចុប្បន្នមើលឃើញជាទូទៅថាមានភាពរញ៉េរញ៉ៃទាំងសណ្ដាប់ធ្នាប់និងអនាម័យ។ លោកឡុង ឌីម៉ង បានបញ្ជាក់ទៀតថា ប្រសិនបើអាជីវករយល់ព្រមឲ្យសាងសង់ផ្សារឡើងវិញ នោះសាលារាជធានីភ្នំពេញនឹងរកទីតាំងបណ្ដោះអាសន្នឲ្យពួកគាត់លក់ដូរមួយរយៈសិន។
លោក តូច ធន់ តំណាងអាជីវករផ្សារដើមគរបានឲ្យវិទ្យុបារាំងដឹងនៅថ្ងៃសៅរ៍នេះដែរថា អាជីវករបារម្ភពីការរុះរើផ្សារអាចធ្វើពួកគាត់ប្រឈមបំណុលធនាគារក្នុងករណីបើសិនជាផ្អាកលក់។ ក្ដីព្រួយបារម្ភផ្សេងទៀតនោះពួកគាត់អាចនឹងបាត់បង់ទីតាំងតូបចាស់។
អាជីវករបានស្នើសុំទៅសាលារាជធានីភ្នំពេញឲ្យពន្យាពេលចំពោះគម្រោងធ្វើផ្សារថ្មីដល់ឆ្នាំ២០២១ និងស្នើឲ្យរៀបចំជាមុនសិនលើការកែសម្រួលទៅលើតម្លៃប្រមូលសម្រាម រៀបចំប្រព័ន្ធលូជាថ្មី។ យ៉ាងណាក៏ដោយ លោក តូច ធន់ ចង់ឲ្យសាលារាជធានីភ្នំពេញផ្សព្វផ្សាយគម្រោងជាសាធារណៈដល់អាជីវករដើម្បីងាយស្រួលក្នុងការឯកភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ