ទិវាជាតិអំណានលើកទី ២ ឆ្នាំ ២០១៧៖ «អានដើម្បីភាពសុខដុមនៃជីវិត»
ទិវាជាតិអំណានលើកទី ២ ត្រូវរៀបចំធ្វើឡើងនៅវិទ្យាស្ថានជាតិអប់រំ នាថ្ងៃទី ១១ខែមីនានេះ ក្រោមប្រធានបទ «អានដើម្បីភាពសុខដុមនៃជីវិត»។ ទិវានេះរៀបចំដោយក្រសួងអប់រំ យុវជននិង កីឡា ក្នុងគោលដៅពង្រឹងឡើងវិញនូវវប្បធម៌អំណាន ដើម្បីលើកកម្ពស់អក្សរសាស្រ្តខ្មែរ និងពិសេសជំរុញឲ្យប្រជាជនកម្ពុជាចាប់យកសេចក្ដីស្រឡាញ់ការអានបន្ថែមទៀត។ បើតាមក្រសួងអប់រំ រដ្ឋាភិបាល អង្គការសង្គមស៊ីវិល និងស្ថាប័នពាក់ព័ន្ធ កំពុងតែសហការគ្នា ស្ដារទម្លាប់ការអាននៅកម្ពុជាឡើងវិញ តាមរយៈមធ្យោបាយផ្សេងៗ ហើយក្នុងនោះ ការប្រារព្ធទិវាជាតិអំណានក៏ជាមធ្យោបាយមួយដែរ។
ចុះផ្សាយនៅថ្ងៃ៖
ស្តាប់ - ០២:០៤
«អានដើម្បីភាពសុខដុមនៃជីវិត» នេះគឺជាប្រធានបទសម្រាប់ទិវាជាតិអំណានឆ្នាំ ២០១៧។ មិនខុសពីឆ្នាំមុន ទិវានេះត្រូវបានរៀបចំដោយក្រសួងអប់រំយុវជន និងកីឡា សហការជាមួយក្រសួងព័ត៌មាន និង ក្រសួងវប្បធម៌ និងវិចិត្រសិល្បៈ។ បើតាមក្រសួងអប់រំ យុវជន និងកីឡា, ថ្វីត្បិតតែទិវានេះ ក្នុង ១ឆ្នាំមានតែ ១ថ្ងៃ ក៏ពិតមែន តែវាក៏ជាឱកាសដែលអាចជំរុញឱ្យប្រជាជនបណ្តុះទំលាប់ ស្វែងយល់ និង ចាប់យកសេចក្តីស្រឡាញ់នៃការអានបានមួយចំណែកដែរ។
លោក រស់ សាលីន នាំពាក្យក្រសួងអប់រំយុវជន និងកីឡា បានឱ្យដឹងថា អ្វីដែលពិសេសនៅថ្ងៃទិវាជាតិអំណាននៅឆ្នាំនេះវិញ! កម្មវិធីប្រកួតប្រជែងការអាន និង ស្មូតកំណាព្យ គឺជាកម្មវិធីថ្មីមួយដែលក្រសួងអប់រំទើបតែរៀបចំឡើងជាលើកដំបូងនៅក្នុងឆ្នាំនេះ។ សិស្សានុសិស្ស ថ្នាក់ទី ៦ និង ថ្នាក់ទី ៩ មកពី ២៥ រាជធានី ខេត្ត ដែលទទួលបានជ័យលាភី ១ប្រចាំខេត្ត ក្រុងនីមួយៗ ត្រូវឡើងមកប្រកួតប្រជែងយកពានរង្វាន់វគ្គផ្តាច់ព្រ័ត្រ នៅរាជធានីភ្នំពេញបន្តទៀត ដើម្បីចំរាញ់យក លេខ ១ លេខ ២ និង លេខទី ៣ ប្រចាំប្រទេស។
បន្ថែមពីនេះ កម្មវិធីរយៈពេលពេញមួយថ្ងៃទី ១១ មីនា ពីម៉ោង ៨ព្រឹករហូតដល់ម៉ោង ៥ល្ងាចនោះ ក៏រួមមាន ការតាំងពិពរណ៌សៀវភៅ ស្តង់ថតរូប ការធ្វើបទបង្ហាញ និង ចែករំលែកពីរបៀបនៃការអាន ការសរសេរ និង ការតែងនិពន្ធផងដែរ។ ហើយក្នុងនោះអ្នកចូលរួមកម្មវិធីក៏បានជួបជាមួយវាគ្មិនល្បីៗ ដែលអញ្ជើញមកធ្វើបាឋកថាទាក់ទងទៅនឹងភាពជោគជ័យក្នុងជីវិតតាមរយៈការអានព្រមទាំងកម្មវិធីផ្សេងៗទៀត។
ដោយឡែកនៅតាមគ្រឹះសា្ថនសិក្សាសាធារណៈ និង ឯកជនតាមបណ្តា ២៥ រាជធានីខេត្តក៏មានរៀបចំប្រារព្ធកម្មវិធីនេះ តាមលទ្ធភាពរៀងៗខ្លួន ដើម្បីរួមគ្នាអបអរទិវាជាតិអំណាននៅទូទាំងប្រទេស។
គួរជម្រាបជូនថា ទិវាជាតិអំណានត្រូវបានរាជរដ្ឋាភិបាលចេញអនុក្រឹត ចុះថ្ងៃទី ១៤ ខែ កញ្ញា ឆ្នាំ ២០១៥ កំណត់យកថ្ងៃទី ១១ ខែមីនា ដែលជា ថ្ងៃ ខែ ឆ្នាំកំណើតរបស់សម្តេចសង្ឃរាជ ជួន ណាត ជាថ្ងៃប្រារព្ធកម្មវិធីនេះ។ ទិវាជាតិអំណានលើកទី ១ បានរៀបចំធ្វើឡើងនៅឆ្នាំ ២០១៦ ក្រោមប្រធានបទ «បណ្តុះទម្លាប់អានជំរុញវប្បធម៌អាន» ដែលមានមនុស្សចូលរួមចំនួន ១៨៨៣ នាក់ ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ