លោកស្រីរ៉ូណា ស្មីត មិនបានបង្ហាញជំហររិះគន់រដ្ឋាភិបាលកម្ពុជានោះទេ
ថ្លែងនៅក្នុងសន្និសីទកាសែតនៅរសៀលថ្ងៃព្រហស្បតិ៍ ទី ២៤ កញ្ញា នៅឯការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស នៅក្នុងទីក្រុងភ្នំពេញ លោកស្រីរ៉ូណា ស្មីត មិនបានថ្លែងពីចំណុចអវិជ្ជមានច្រើននៅកម្ពុជានោះទេ។ ប៉ុន្តែលោកស្រីបានថ្លែងពីភាពរីកចម្រើន និងកោតសរសើរដល់មន្ត្រីរដ្ឋាភិបាល ដែលបានសន្យាថានិងបន្តកិច្ចសហប្រតិបត្តិការជាមួយ និង UNHCR។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៩
ខុសពីលោកសូរិយា ប្រាសាទ ស៊ូប៊ែឌី អ្នករាយការណ៍ពិសេសរបស់អង្គការសហប្រជាជាតិប្រចាំនៅកម្ពុជានៅអាណត្តិមុន ដែលបានថ្លែងច្រើនពីបញ្ហាអវិជ្ជមាននៅកម្ពុជា ទៅកាន់ពិភពលោកនោះ លោកស្រីរ៉ូណា ស្មីត មិនបានថ្លែងអ្វីច្រើននោះទេស្តីពីបញ្ហាសិទ្ធមនុស្ស ក្នុងដំណើរទស្សនៈកិច្ចជាលើកដំបូង ក្នុងនាមជាអ្នករាយការណ៍ពិសេសរបស់អង្គការសហប្រជាជាតិប្រចាំនៅកម្ពុជា។
លោកស្រីស្មីត ចាប់ផ្តើមដំបូងដោយថ្លែងពីតួនាទីរបស់លោកស្រី ដែលមានមុខងារធំៗចំនួនបីគឺ ផ្តល់ប្រឹក្សាយោបល់ ឃ្លាំមើល និងរាយការណ៍អំពីស្ថានភាពសិទ្ធិមនុស្សនៅកម្ពុជា។ និងបន្តដោយជំនួបរបស់លោកស្រីក្នុងរយៈពេល៨ថ្ងៃនៃដំណើរទស្សនៈកិច្ចនៅកម្ពុជា ដែលក្នុងនោះលោកស្រីបានជួបជាមួយលោកនាយករដ្ឋមន្ត្រីហ៊ុន សែន លោកស ខេង រដ្ឋមន្ត្រីក្រសួងមហាផ្ទៃ និងរដ្ឋមន្ត្រីជាច្រើនផ្សេងទៀត។ លោកស្រីក៏បានធ្វើដំណើរទៅកាន់ខេត្តកោះកុង ដើម្បីទៅជួបតំណាងសង្គមស៊ីវិល សមាជិកសហគមន៍ផ្សេងៗ អ្នកវិនិយោគ អាជ្ញាធរខេត្ត និងអាជ្ញាធរតុលាការផងដែរ។
លោកស្រីរ៉ូណា ស្មីតបានទទួលស្គាល់ថាវាពិតជាមានបញ្ហាប្រឈមជាច្រើនកើតមាននៅក្នុងតំបន់ដែលមានការផ្តល់ដីសម្បទាន ហើយនៅទីនោះគឺមានបញ្ហាសិទ្ធិមនុស្សដ៏ស្មុគស្មាញ ដែលកម្ពុជាកំពុងជួបប្រទះ។ ប៉ុន្តែការយល់ឃើញនេះ ត្រូវបានលោកស៊ូប៊ែឌីផ្តល់អនុសាសន៍ ឲ្យលោកស្រីនិងលើកទឹកចិត្តដល់ការបន្តត្រួតពិនិត្យលើដីសម្បទាន ដែលរាប់ទាំងការលុបចោល និងការបែងចែកជូនប្រជាពលរដ្ឋវិញ តាមការសមស្រប។
សូមបញ្ជាក់ថាលោកស្រីរ៉ូណា ស្មីត គឺជាអ្នករាយការណ៍ពិសេសថ្មីរបស់អង្គការសហប្រជាជាតិស្តីពីស្ថានភាពសិទ្ធិមនុស្សនៅកម្ពុជា នៅក្នុងឆ្នាំ២០១៥នេះ។ លោកស្រី បានបន្តតំណែងនេះពីលោកសូរិយា ប្រាសាទ ស៊ូប៊ែឌី។ លោកស្រីស្មីតបានបំពេញទស្សនៈកិច្ចនៅកម្ពុជា រយៈពេល៨ថ្ងៃចាប់ពីថ្ងៃទី ១៦ កញ្ញា ដល់ថ្ងៃទី ២៤ កញ្ញានេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ