លោក សម រង្ស៊ី ឆ្លើយតបនឹងលោក ហ៊ុន សែន ថាបើសង្គ្រោះជាតិឈ្នះឆ្នោតនឹងមិនមានសង្គ្រាមទេ
លោក សម រង្ស៊ី ប្រធានគណបក្សសង្គ្រោះជាតិ បាននិយាយ កាលពីថ្ងៃម្សិលមិញថា គោលការណ៍របស់គណបក្សសង្គ្រោះជាតិមិនចាត់ទុកអ្នកណាជាសត្រូវ ហើយនឹងដោះស្រាយបញ្ហាព្រំដែន ដោយសន្តិវិធី នឹងមិនអាចធ្វើឲ្យមានសង្គ្រាមកើតឡើងនោះទេ។ ការបញ្ជាក់របស់ប្រធានគណបក្សប្រឆាំងយ៉ាងដូច្នេះ បានធ្វើឡើងក្រោយពីលោកនាយករដ្ឋមន្ត្រី ហ៊ុន សែន ធ្លាប់បានព្រមានថា កម្ពុជានឹងមានសង្គ្រាមជាមួយប្រទេសជិតខាង បើបក្សថ្មីកាន់អំណាច។
ចុះផ្សាយនៅថ្ងៃ៖
ស្តាប់ - ០២:១៧
ប្រធានគណបក្សសង្គ្រោះជាតិ ហាក់ដូចជាឆ្លើយតបនឹងការលើកឡើងរបស់លោកនាយករដ្ឋមន្ត្រី ហ៊ុន សែន កាលពីពេលថ្មីៗនេះ ជុំវិញការកើតសង្គ្រាម ប្រសិនបើគណបក្សថ្មីឡើងកាន់អំណាច ក្រៅពីគណបក្សប្រជាជនកម្ពុជា។ លោក សម រង្ស៊ី បានបញ្ជាក់ថា គណបក្សសង្គ្រោះជាតិនឹងដោះស្រាយបញ្ហាដីធ្លី ពោលគឺប្រមូលដីពីក្រុមឧកញ្ញា ដែលលួចប្លន់ពីប្រជាពលរដ្ឋ ហើយប្រគល់ឲ្យប្រជាពលរដ្ឋវិញ។ ការបញ្ជាក់របស់លោក បានធ្វើឡើងនៅក្នុងវេទិកាសាធារណៈរបស់គណបក្សសង្គ្រោះជាតិនៅឃុំបាធាយ ស្រុកបាធាយ ខេត្តកំពង់ចាម កាលពីថ្ងៃទី២៦ កញ្ញាម្សិលមិញ ដោយមានវត្តមានលោក កឹម សុខា អនុប្រធានគណបក្សសង្គ្រោះជាតិចូលរួមផងដែរ។
ចំពោះបញ្ហាព្រំដែនរវាងប្រទេសជិតខាងវិញ ប្រធានគណបក្សប្រឆាំងបាននិយាយថា គណបក្សប្រឆាំងត្រូវតែទាមទារចំពោះទឹកដី ដែលបានបាត់បង់ប៉ុន្មានឆ្នាំក្រោយនេះ ដោយសន្តិវិធី ដោយមិនប្រើការច្បាំងនោះទេ។ ហើយសង្គ្រោះជាតិក៏មិនយកខ្មែរណា ធ្វើជាសត្រូវដែរ ដូច្នេះគឺគណបក្សសង្គ្រោះជាតិគ្មានសត្រូវ ដែលត្រូវធ្វើសង្គ្រាមជាមួយទេ។ លោកបានបន្ថែមថាអ្នក ដែលនិយាយថាមានសង្គ្រាម គឺជាការបំភ័យប្រជាពលរដ្ឋខ្មែរ។ ចំណែកឯការដោះស្រាយបញ្ហាព្រំដែនរវាងប្រទេសនីមួយៗ គឺត្រូវតែធ្វើឡើងតាមផ្លូវច្បាប់ ជាពិសេសគឺច្បាប់អន្តរជាតិ និងសន្ធិសញ្ញាអន្តរជាតិជាដើម។
ការបញ្ជាក់របស់ លោក សម រង្ស៊ី នៅពេលនេះ បានធ្វើឡើង ក្រោយពីមាន ការព្រមានពីការផ្ទុះសង្គ្រាមរបស់លោក ហ៊ុន សែន ដែលបានធ្វើឡើងផ្ទួនៗគ្នា ហើយមិនធ្លាប់មានពីមុនមក ក្នុងរយៈតែមួយខែប៉ុណ្ណោះ។ កាលពីថ្ងៃទី៨ កញ្ញា កន្លងទៅលោកនាយករដ្ឋមន្ត្រី ហ៊ុន សែន ក្នុងបទបង្ហាញតាមរយៈស្ថានីយទូរទស្សន៍ជាតិ បានព្រមានថា ការលើកឡើងពីបញ្ហាប្រើប្រាស់ផែនទីក្នុងការបោះបង្គោលព្រំដែនរបស់រដ្ឋាភិបាលជាមួយប្រទេសវៀតណាមអាចជាដើមចមមួយឈានទៅរកការផ្ទុះសង្គ្រាម បើគណបក្សប្រឆាំងនៅតែបន្តលើកឡើងមិនចេះចប់។
ក្នុងថ្ងៃទី២២ ខែកញ្ញាដដែល ពោលគឺរយៈពេល ១៤ក្រោយមក លោក ហ៊ុន សែន បានថ្លែងបញ្ជាក់ជាថ្មីម្តងទៀតពីមូលហេតុពីរនៃការផ្ទុះសង្គ្រាមក្នុងប្រទេសកម្ពុជា ប្រសិនបើគណបក្សសង្គ្រោះជាតិរបស់លោក សម រង្ស៊ី ឈ្នះឆ្នោតនោះ។ មូលហេតុទាំងពីរ ដែលលោកនាយករដ្ឋមន្ត្រីកម្ពុជាលើកឡើង គឺគោលនយោបាយរឹបអូសទ្រព្យសម្បតិ្តពីអ្នកមានឲ្យអ្នកក្រ ឬចាត់ទុកអ្នកមានជាសត្រូវ និងការយកប្រទេសជិតខាងជាសត្រូវ។ ការថ្លែងនេះ បានធ្វើឡើងនៅក្នុងពីធីបិទសន្និបាទ ស្តីពីការប្រឡងប្រណាំងទីក្រុងស្អាត រមណីយដ្ឋានស្អាត សេវាល្អ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ