កម្ពុជា បញ្ជាក់ជាថ្មីពីការមិនចូលរួមបញ្ចេញជំហររួមចំពោះសាលដីការឿងសមុទ្រចិនខាងត្បូង
នៅរសៀលថ្ងៃសៅរ៍នេះ ក្រសួងការបរទេសកម្ពុជា បានចេញសេចក្តីប្រកាសជំហរជាថ្មីរបស់រដ្ឋាភិបាលចំពោះសាលដីកាតុលាការមជ្ឈត្តិកម្មអចិន្ត្រៃយ៍ទីក្រុងឡាអេលើសំណុំរឿងជម្លោះនៅសមុទ្រចិនខាងត្បូង។ ចំពោះសាលដីកាដែលនឹងចេញនៅថ្ងៃទី១២ កក្កដា ខាងមុខ រដ្ឋាភិបាលកម្ពុជានៅតែប្រកាន់មិនបញ្ចេញជំហររួមណាមួយចំពោះសាលដីកានេះឡើយ។
ចុះផ្សាយនៅថ្ងៃ៖
ស្តាប់ - ០១:៥៩
កម្ពុជា នឹងមិនចូលរួមក្នុងការបញ្ចេញជំហររួមណាមួយចំពោះសាលដីកាតុលាការមជ្ឈត្តិកម្មអចិន្ត្រៃយ៍ដែលនឹងធ្វើការសម្រេចលើវិវាទរវាងប្រទេសហ្វីលីពីន និង ប្រទេសចិននោះឡើយ។ នេះ គឺជាការបញ្ជាក់ជំហរជាថ្មីរបស់រដ្ឋាភិបាលកម្ពុជាចំពោះបញ្ហានៅសមុទ្រចិនខាងត្បូង។ ការប្រកាសមិនបញ្ចេញជំហររួមនេះ គឺដោយសារតែកម្ពុជាយល់ថា បណ្តឹងរបស់ប្រទេសហ្វីលីពីន គឺដើម្បីសុំឲ្យតុលាការមជ្ឈត្តិកម្មអចិន្ត្រៃយ៍ដោះស្រាយជម្លោះរបស់ខ្លួនជាមួយប្រទេសចិន ហើយដែលដំណើរការនេះមិនពាក់ព័ន្ធជាមួយរដ្ឋទាំងអស់ជាសមាជិកអាស៊ានឡើយ។
ការបញ្ជាក់ជាថ្មីនេះ បានធ្វើឡើង បន្ទាប់ពីក្រសួងការបរទេសកម្ពុជា បានកត់សម្គាល់ឃើញថា នាប៉ុន្មានថ្ងៃចុងក្រោយនេះ ពោល គឺបន្ទាប់ពីតុលាការមជ្ឈត្តិកម្មអចិន្ត្រៃយ៍ទីក្រុងឡាអេបានកំណត់យកថ្ងៃទី១២ កក្កដា ខាងមុខ ជាថ្ងៃចេញសាលដីកាលើសំណុំរឿងជម្លោះនៅសមុទ្រចិនខាងត្បូងមក មានការពិភាក្សា ការវិភាគ និង ការព្រួយបារម្ភដែលកើតមានក្នុងមជ្ឈដ្ឋានជាតិ និងពីសំណាក់ប្រទេសមួយចំនួន។ កាលពីថ្ងៃទី១៨ និង ទី២០ មិថុនាកន្លងទៅ ប្រមុខរដ្ឋាភិបាលកម្ពុជាលោកនាយករដ្ឋមន្ត្រីហ៊ុន សែន ក៏ធ្លាប់បានបញ្ជាក់ជំហរម្តងជាពីរដងហើយថា កម្ពុជានឹងមិនចូលរួមចេញសេចក្តីថ្លែងការណ៍រួមណាមួយចំពោះសាលដីកាតុលាការអន្តរជាតិនេះទេ។ យ៉ាងណាក៏ដោយ រដ្ឋាភិបាលកម្ពុជានៅតែអំពាវនាវដល់ប្រទេសហ្វីលីពីន និង ប្រទេសចិន បន្តដោះស្រាយជម្លោះរបស់ខ្លួននៅសមុទ្រចិនខាងត្បូងដោយសន្តិវិធី។
សូមបញ្ជាក់ថា ប្រទេសហ្វីលីពីនកាលឆ្នាំ២០១៣ បានដាក់ពាក្យបណ្តឹងទៅតុលាការអន្តរជាតិនេះ ដោយប្តឹងតវ៉ានឹងការទាមទាររបស់ចិនដែលបានគូសវាតយកប្រមាណជា ៩០% នៃសមុទ្រចិនខាងត្បូងទាំងមូលតែម្តង។ បើតាមហ្វីលីពីន សកម្មភាពរបស់ចិននៅក្នុងសមុទ្រចិនខាងត្បូងនេះ គឺជាទង្វើផ្ទុយនឹងច្បាប់អន្តរជាតិ។ ចំណែកសម្រាប់ប្រទេសចិន ចិនមិនបានទទួលស្គាល់ឡើយនូវយុត្ថាធិការរបស់តុលាការអន្តរជាតិមួយនេះ ប៉ុន្តែចិននៅតែទាមទារឲ្យដោះស្រាយជម្លោះដោយផ្អែកលើការពិតនៃប្រវត្តិសាស្ត្រ និងច្បាប់អន្តរជាតិ។
ថ្វីបើសាលដីកានៅមិនទាន់ចេញក៏ដោយ ប៉ុន្តែរដ្ឋាភិបាលថ្មីរបស់ហ្វីលីពីន បានបញ្ជាក់រួចហើយថា គេបានត្រៀមខ្លួនជាស្រេច ដើម្បីចែករំលែកនូវធនធានធម្មជាតិនៃតំបន់ជម្លោះក្នុងសមុទ្រចិនខាងត្បូងជាមួយប្រទេសចិន បើទោះបីតុលាការអន្តរជាតិ អាកាត់ឲ្យហ្វីលីពីនឈ្នះក្តីក៏ដោយចុះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ