រដ្ឋរំពឹងថាឆ្នាំ២០២០ នឹងមានភ្ញៀវទេសចរណ៍ជាង ៩លាននាក់ ប៉ុន្តែអ្នកជំនាញថាចំនួននេះតិចតួច
រដ្ឋាភិបាលកម្ពុជានៅថ្ងៃទី១៩ ធ្នូនេះ បានរៀបចំវេទិកាយុវជនស្តីពីវិស័យអាកាសចរស៊ីវិល និងឱកាសការងារនៅកម្ពុជា នៅវិទ្យាស្ថានបច្ចេកវិទ្យាកម្ពុជា។ រដ្ឋលេខាធិការអាកាសចរណ៍ស៊ីវិល លោក ម៉ៅហាវណ្ណាល់ បានលើកឡើងថា អាកាសយាន្តដ្ឋានទាំងបីរបស់កម្ពុជានឹងអាចមានភ្ញៀវឆ្លងកាត់ប្រមាណជាង ៩លាននាក់ ខណៈដែលអ្នកជំនាញវិស័យទេសចរណ៍ថាចំនួននេះនៅតិចតួច។
ចុះផ្សាយនៅថ្ងៃ៖
ឆ្នាំ២០២០ខាងមុខ ភ្ញៀវទេសចរ ដែលឆ្លងកាត់អាកាសយាន្តដ្ឋានទាំងបីរបស់កម្ពុជានឹងមានប្រមាណជាង ៩លាននាក់។ អាកាសយានដ្ឋានទាំងបីរួមមាន អាកាសយានដ្ឋានក្រុងព្រះសីហនុ អាកាសយានដ្ឋានភ្នំពេញ និងអាកាសយានដ្ឋានក្រុងសៀមរាប។ លោកម៉ៅ ហាវណ្ណាល់ បានថ្លែងថាក្នុងឆ្នាំ ២០២០ ខាងមុខនេះ ចំនួនអ្នកដំណើរឆ្លងកាត់អាកាសយានដ្ឋាន អន្ដរជាតិភ្នំពេញត្រូវបាន ព្យាករណ៍ថា កើនឡើងលើស ៤.២លាននាក់ និងចំនួនអ្នកដំណើរឆ្លងកាត់អាកាសយានដ្ឋានអាកាសយានដ្ឋានសៀមរាប នឹងកើនឡើង ដល់ទៅ៥លាននាក់។
ប៉ុន្តែអ្នកតាមដានវិស័យទេសចរណ៍នៅកម្ពុជាជាទូទៅបានវាយតម្លៃថា ចំនួនដែលរដ្ឋាភិបាលលើកឡើងនេះ គឺនៅមានចំនួនតិចតួច ហើយរដ្ឋាភិបាលនឹងអាចសម្រេចបានដោយសារតែមានកំណើនភ្ញៀវទេសចរណ៍មកកាន់កម្ពុជា។ កម្ពុជាដែលជាប្រទេស ដែលមានមនុស្សរស់រាយរាក់ទាក់ និងមានសម្បត្តិវប្បធម៌ និងធម្មជាតិ ដែលជាទីចាប់អារម្មណ៍របស់ភ្ញៀវទេសចរណ៍សកលលោក។ លោកអាង គឹម អ៊ាង បានលើកឡើងថា កម្ពុជាដែលជាប្រទេសនៅកណ្តាលអាស៊ានគួរតែក្លាយទៅជាប្រទេស ដែលពិភពលោកមកកាន់ដំបូងគេ ហើយទើបបែងចែកចេញពីកម្ពុជាទៅកាន់ប្រទេសជិតខាង។
លោកបានសង្កត់ធ្ងន់ថា កម្ពុជាគួរតែមានភ្ញៀវទេសចរឆ្លងកាន់អាកាសយានដ្ឋានទាំងបីយ៉ាងហោចណាស់ ចំនួន ៤០លាននាក់ក្នុងមួយឆ្នាំនារយៈពេល ពី១០ទៅ២០ខាងមុខ។ ប៉ុន្តែលោកបានគូសបញ្ជាក់ថា រដ្ឋាភិបាលត្រូវធ្វើការងារជាច្រើនដើម្បីក្លាយទៅជាបេះដូងអាស៊ី និងត្រូវហ៊ានក្នុងការវិនិយោគតាមកញ្ចប់ថវិកាពិសេសរបស់រដ្ឋ គឺការបង្កើតសាលាថ្នាក់ជាតិស្តីពីអាកាសចរណ៍ស៊ីវិល បង្កើនធនធានមនុស្ស ដែលមានគុណភាព ការយោគយល់គ្នារវាងវិស័យរដ្ឋ និងឯកជនឱ្យបានច្រើន ហើយត្រូវផ្តល់ការគាំទ្រដូចជាការសម្រួលផ្លូវច្បាប់ និងកម្រិតពន្ធជាដើម។ គួរបញ្ជាក់ថា ក្នុងឆ្នាំ ២០១៥កន្លងទៅភ្ញៀវទេសចរណ៍ដែលឆ្លងកាត់ អាកាសយានដ្ឋានទាំងបីរបស់កម្ពុជាគឺមានត្រឹមតែជាង ២០០ជើងក្នុងមួយថ្ងៃតែប៉ុណ្ណោះ ដោយមានក្រុមហ៊ុនអាកាសចរណ៍ បរទេសចំនួន ៣៤ក្រុមហ៊ុន ដែលជាក្រុមហ៊ុនក្នុងនិងក្រៅប្រទេសដែលកំពុងធ្វើដំណើរមកកាន់ប្រទេសកម្ពុជា។
បើទោះបីជាអ្នកជំនាញមើលឃើញថា វិស័យដ៏មានសក្តានុពលនេះគួរតែទទួលបានភ្ញៀវទេសចរណ៍ឆ្លងកាត់ច្រើនជាងការព្យាករណ៍របស់រដ្ឋាភិបាល ប៉ុន្តែរដ្ឋបានអះអាងថាចំនួនប៉ុណ្ណេះ គឺការជារីកចម្រើនលូតលាស់បំផុតមួយ។ គួរបញ្ជាក់ថា ភ្ញៀវទេសចរណ៍អន្តរជាតិ ដែលមកកាន់កម្ពុជា មានប្រមាណ ៤.៧លាននាក់ នៅក្នុងឆ្នាំ២០១៥ ហើយកម្ពុជាបានរំពឹងថានឹងមានការកើនឡើង ភ្ញៀវទេសចរអន្ដរជាតិរហូតដល់ ៧លាននាក់ក្នុងឆ្នាំ២០២០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ