ចិនមិនព្រមឲ្យនាវាចម្បាំងអាមេរិកចូលចតនៅហុងកុង ក្រោយរងទណ្ឌកម្មពីអាមេរិក
ប្រទេសចិនមិនអនុញ្ញាតឲ្យនាវាចម្បាំងអាមេរិកចូលចតនៅកំពង់ផែកោះហុងកុង។ នេះបើតាមការបញ្ជាក់ពីស្ថានកុងស៊ុលអាមេរិក ប្រចាំទីក្រុងហុងកុងនាថ្ងៃពុធ ទី២៧កញ្ញា។ បម្រាមមិនឲ្យនាវាចម្បាំងចូលចតនៅហុងកុងនេះ ធ្វើឡើងតែមួយសប្ដាហ៍ប៉ុណ្ណោះ បន្ទាប់ពីអាមេរិកសម្រេចដាក់ទណ្ឌកម្មលើអង្គភាពយោធាចិន ដែលបានទិញសព្វាវុធនិងមីស៊ីលពីប្រទេសរុស្ស៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៧
នាវាចម្បាំងអាមេរិកប្រភេទ USS Wasp មានគម្រោងចូលចតនៅឯកំពង់ផែហុងកុង នៅខែតុលា។ មន្ដ្រីនាំពាក្យស្ថានកុងស៊ុលអាមេរិកប្រចាំក្រុងហុងកុងគូសបញ្ជាក់ថា នាវានេះ ធ្លាប់ចូលចតនៅកំពង់ផែហុងកុងជាច្រើនដងមកហើយ ប៉ុន្តែលើកនេះ អាជ្ញាធរចិនបែរជាមិនព្រមឲ្យចូលចតទៅវិញ។
នេះមិនមែនជាលើកទី១ឡើយ ដែលអាជ្ញាធរចិនដាក់ចេញបម្រាមរបៀបនេះ។ កាលពីឆ្នាំ២០១៦ នាវាចម្បាំងអាមេរិកប្រភេទ USS John C. Stennis ត្រូវអាជ្ញាធរចិនហាមមិនឲ្យចូលចតនៅកំពង់ផែហុងកុង ក្រោយពីនាវានេះ ដឹករដ្ឋមន្ដ្រីការពារជាតិអាមេរិកជំនាន់នោះ គឺលោក Ash Carter ទៅសមុទ្រចិនខាងត្បូង។ ករណីថ្មីចុងក្រោយនេះ ត្រូវគេមើលឃើញថា ជាចេតនាវាយបកវិញរបស់ចិន ប្រឆាំងនឹងការដាក់ទណ្ឌកម្មរបស់អាមេរិកលើអង្គភាពយោធាចិន។ អង្គភាពយោធាចិន ដែលបានទិញសព្វាវុធនិងមីស៊ីលពីប្រទេសរុស្ស៊ី។
យ៉ាងណាក៏ដោយ អ្នកនាំពាក្យក្រសួងការបរទេសចិន លោក Geng Shuang បានគូសបញ្ជាក់ថា រដ្ឋាភិបាលចិន ពិនិត្យនិងអនុម័តលើសំណើសុំលើករណីមួយៗ ដោយអនុលោមទៅតាមគោលការណ៍អធិបតេយ្យភាព និងតាមស្ថានភាពជាក់ស្ដែង។
គួរជម្រាបដែរថា ការឆ្លើយតបរបស់ចិនចំពោះទណ្ឌកម្មអាមេរិកមិនមែនមានត្រឹមប៉ុណ្ណឹងទេ។ ទីក្រុងប៉េកាំងក៏បានលុបចោលផងដែរ កិច្ចប្រជុំថ្នាក់មេបញ្ជាការជើងទឹកកំពូលនៃប្រទេសទាំងពីរ ដែលគ្រោងធ្វើក្នុងសប្ដាហ៍នេះ។ ចិនចាត់ទុកទង្វើដាក់ទណ្ឌកម្មពីអាមេរិកថាជាកំហុស ហើយព្រមានចាត់វិធានការប្រឆាំងតបវិញឲ្យសក្តិសមជាទីបំផុត ប្រសិនបើអាមេរិកមិនកែប្រែកំហុសនេះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ