អត្រាអ្នកអត់ការងារធ្វើនៅអាមេរិកក្នុងខែមីនាមាន ៦,៧%
នៅសហរដ្ឋអាមេរិក ក្រសួងការងារទើបបានបោះផ្សាយតួលេខស្តីពីចំនួនអ្នកអត់ការងារធ្វើក្នុងខែមីនាកន្លងទៅ។ បើតាមក្រសួងការងារ អត្រានៃចំនួនអ្នកអត់ការងារធ្វើក្នុងខែមីនាកន្លងទៅ គឺមិនសូវខុសគ្នានឹងខែកុម្ភៈប៉ុន្មានទេ។ ទាក់ទងនឹងការបង្កើតការងារវិញ គឺមានការកើនឡើងបន្តិចម្តងៗដូចដែលរដ្ឋាភិបាលបានព្រាងទុក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
៦,៧% នេះជាអត្រានៃចំនួនអ្នកអត់កាងារធ្វើនៅសហរដ្ឋអាមេរិក។ រីឯចំនួនការងារដែលបានបង្កើតឡើងក្នុងខែមីនា គឺមានចំនួន ១៩២ ០០០ការងារ ពោលគឺមានចំនួន ៣ ០០០ការងារតិចជាងការគ្រោងទុក។ យ៉ាងណាក៏ដោយ ការបង្កើតការងារនារយៈពេល ២ខែចុងក្រោយនេះមានការកើនឡើងគួរឲ្យកត់សម្គាល់។ ក្នុងខែមករាដើមឆ្នំា ២០១៤ មានការងារចំនួន ១៥ ០០០ ការងារត្រូវបានបង្កើតបន្ថែម រីឯក្នុងខែកុម្ភៈ មានចំនួន ២២ ០០០ការងារដែលសរុបក្នុង ៣ខែដើមឆ្នំា ២០១៤ នេះ មានចំនួន ១៩៧ ០០០ការងារ។ បើគេគិតសរុបជាមធ្យមក្នុងរយៈពេល ១ឆ្នំា មានការងារចំនួន ១៨៣ ០០០ការងារត្រូវបានបង្កើតឡើងជារៀងរាល់ខែ។ ដូច្នេះឃើញថា ចំនួនអ្នកអត់ការងារធ្វើក្នុងខែមីនាកន្លងទៅ គឺមិនសូវខុសគ្នានឹងខែកុម្ភៈប៉ុន្មានទេ ពោលមានចំនួន ១០លាន ៥សែននាក់។
ក៏ដូចជាខែកុម្ភៈដែរ អ្នកអត់ការងារធ្វើហាក់ដូចជាបានប្រឹងប្រែងត្រឡប់មករកការងារធ្វើឡើងវិញ បន្ទាប់ពីបានបាក់ទឹកចិត្តមួយរយៈពេលមក។ យោងតាមក្រសួងការងារ គឺការងារផ្នែកសេវាដែលបង្កើតការងារបានច្រើនជាងគេក្នុងខែមីនា ពោលមាន ៥៧ ០០០ការងារ ផ្នែកសុខភាពបង្កើតការងារបន្ថែមចំនួន ១៩ ០០០ការងារ និងផ្នែកភោគជនីយដ្ឋានស្ថិតជាផ្នែកមួយដែលបានបង្កើតការងារជាប់ជាប្រចំា ពោលមាន ៣០ ០០០ការងារក្នុងខែមីនា។ ចំណែកនៅក្នុងវិស័យសាងសង់វិញក៏មានសុខភាពល្អដែរ ពោលបង្កើតការងារបានចំនួន ១៩ ០០០ក្នុងខែមីនា។ ដោយឡែក រដ្ឋបាលអាមេរិកំាងមិនបានបង្កើតបន្ថែមចំនួនការងារនៅក្នុងរដ្ឋបាលសាធារណៈទេ ពោលមានតែការកាត់បន្ថយ។ ការកាត់បន្ថយចំនួនការងាររដ្ឋជាការរួមចំណែកកាត់បន្ថយការចំណាយរបស់រដ្ឋ។
នៅអាមេរិក រយៈពេលធ្វើការងារជាមធ្យមប្រចំាសប្តាហ៍បានកើនដល់ ៣៤,៥ម៉ោង។ ចំណែកប្រាក់ខែជាមធ្យមក្នុងមួយម៉ោងបានធ្លាក់មកនៅត្រឹម ២៤,៣០ដុល្លារក្នុងខែមីនា ពោលគឺមានការថយចុះចំនួន ១សេន បន្ទាប់ពីបានឡើង ៩សេនក្នុងខែកុម្ភៈ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ