ដើមបណ្តឹងរដ្ឋប្បវេណី និងមេធាវី ជួបគ្នា មុនឡើងសវនាការលើសំណុំរឿង០០២ ដំណាក់កាលទី២
ដើមបណ្តឹងរដ្ឋប្បវេណី ប្រមាណ ២២០ នាក់ រួមទាំងជនរងគ្រោះ ដោយអំពើហិង្សាផ្លូវភេទ នៅក្នុងសម័យខ្មែរក្រហម បានជួបប្រជុំជាមួយមេធាវី រយៈពេលពេញមួយថ្ងៃ នៅថ្ងៃទី៦តុលានេះ។ ជាកិច្ចប្រជុំ ដើម្បីផ្តល់ព័ត៌មាន ស្តីពីការប្រកាសសាលក្រមសំណុំរឿង ០០២ ដំណាក់កាលទី១ ដល់ដើមបណ្តឹងរដ្ឋប្បវេណី និងផ្តល់ព័ត៌មានពីដំណើការក្តី នៅតុលាការខ្មែរក្រហម ផ្តល់ឱកាសឲ្យដើមបណ្តឹងរដ្ឋប្បវេណី បានជួបពិភាក្សាផ្ទាល់ជាមួយមេធាវី ទាក់ទងនឹងសំណុំរឿង០០២ ដំណាក់កាលទី២ ព្រមទាំងផ្តល់ព័ត៌មានដល់ដើមបណ្តឹងរដ្ឋប្បវេណី ស្តីពីការវិវឌ្ឍទៅ នៃគម្រោងសំណង ជាដើម។ កិច្ចប្រជុំរវាងដើមបណ្តឹងរដ្ឋប្បវេណី និងមេធាវី នៅថ្ងៃចន្ទនេះ បានធ្វើឡើង មុនពេលសវនាការលើសំណុំរឿង០០២ ដំណាក់កាលទី២ នឹងចាប់ផ្តើម នៅថ្ងៃទី១៧តុលា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៥
កិច្ចប្រជុំរវាងដើមបណ្តឹងរដ្ឋប្បវេណី និងមេធាវីដើមបណ្តឹងរដ្ឋប្បវេណី ក្នុងសំណុំរឿង០០២ ត្រូវបានធ្វើឡើង រយៈពេលពេញមួយថ្ងៃ នៅថ្ងៃចន្ទនេះ ជិតគុកទួលស្លែង ក្នុងរាជធានីភ្នំពេញ។ ជាកិច្ចប្រជុំ ដែលមានដើមបណ្តឹងរដ្ឋប្បវេណី ប្រមាណ ២២០ នាក់ រួមទាំងជនរងគ្រោះ ដោយអំពើហិង្សាផ្លូវភេទ នៅសម័យខ្មែរក្រហម មកពីរាជធានីភ្នំពេញ និងខេត្តផ្សេងៗ រួមមាន ខេត្តកណ្តាល កំពង់ស្ពឺ កំពត ក្រចេះ បន្ទាយមានជ័យ ពោធិ៍សាត់ បាត់ដំបង កំពង់ឆ្នាំង កំពង់ចាម ស្ទឹងត្រែង ស្វាយរៀង ព្រៃវែង និងខេត្តតាកែវ។
កិច្ចប្រជុំ ដែលបើកធ្វើក្រោមវត្តមានរបស់លោកក្រាញ់តូនី ប្រធានការិយាល័យរដ្ឋបាលស្តីទី របស់សាលាក្តីខ្មែរក្រហម និងលោក Joachim Baron Von Marschall ឯកអគ្គរដ្ឋទូតអាល្លឺម៉ង់ ប្រចាំកម្ពុជា មានគោលបំណងសំខាន់ ៣ គឺទី១-ផ្តល់ព័ត៌មានស្តីពីការប្រកាសសាលក្រម សំណុំរឿង ០០២ ដំណាក់កាលទី១ ដល់ដើមបណ្តឹងរដ្ឋប្បវេណី និងផ្តល់ព័ត៌មានពីដណើរការក្តី នៅសាលាក្តីខ្មែរក្រហម ទី២-ផ្តល់ឱកាសឲ្យដើមបណ្តឹងរដ្ឋប្បវេណី បានជួបពិភាក្សាផ្ទាល់ជាមួយមេធាវីរបស់ខ្លួន ស្តីពីបញ្ហាផ្សេងៗ ទាក់ទងនឹងសំនុំរឿង ០០២ ដំណាក់កាលទី២ និងទីគោលបំណងទី៣-ផ្តល់ព័ត៌មានដល់ដើមបណ្តឹងរដ្ឋប្បវេណី ស្តីពីការវិវឌ្ឍទៅនៃគម្រោងសំណងដើមបណ្តឹងរដ្ឋប្បវេណី សំណុំរឿង០០២ និងវិធានការនានា មិនពាក់ព័ន្ធនឹងបច្ចេកទេសតុលាការ។
ជាការកត់សម្គាល់ កិច្ចប្រជុំរវាងដើមបណ្តឹងរដ្ឋប្បវេណី និងមេធាវី ក្នុងសំណុំរឿង០០២ នាថ្ងៃចន្ទនេះ បានធ្វើឡើងតែប៉ុន្មានថ្ងៃប៉ុណ្ណោះ មុនពេលសវនាការលើអង្គសេចក្តី ក្នុងសំណុំរឿង០០២ ដំណាក់កាលទី២ នឹងត្រូវបើកធ្វើ នាថ្ងៃទី១៧តុលា។ សំណុំរឿង០០២ នៅសល់ជនជាប់ចោទចាស់ជរាពីររូប គឺនួនជា និងខៀវសំផន។ អតីតមេដឹកនាំកំពូលខ្មែរក្រហមទាំងពីររូប ត្រូវបានអង្គជំនុំជម្រះសាលាដំបូង របស់សាលាក្តីខ្មែរក្រហម បានសម្រេចផ្តន្ទាទោស ដាក់ពន្ធនាគារអស់មួយជីវិត ក្នុងបទឧក្រិដ្ឋកម្មប្រឆាំងមនុស្សជាតិ។
សាលក្រមផ្តន្ទាទោសមេដឹកនាំខ្មែរក្រហម ក្នុងសំណុំរឿង០០២ ដំណាក់កាលទី១ ត្រូវបានលោក ឌឹម សុវណ្ណារុំ ប្រធានផ្នែកកិច្ចការសាធារណៈរបស់សាលាក្តីខ្មែរក្រហម ឲ្យដឹងថា សាលាក្តី នឹងបោះពុម្ពជាសៀវភៅកម្រាស់ជាង ១០០០ ទំព័រ ជាបីភាសា ភាសាខ្មែរ អង់គ្លេស និងបារាំង ហើយគ្រោងនឹងផ្តល់ឲ្យអង្គភាពគាំពាំរជនរងគ្រោះ ១០០០ ក្បាល ដើម្បីចែកជូនដើមបណ្តឹងរដ្ឋប្បវេណី។ ដំណើរការបោះពុម្ពសាលក្រម នឹងធ្វើឡើងឆាប់ៗខាងមុខ ខណៈដែលពេលនេះ គម្រោងសៀវភៅសាលក្រមនោះ ត្រូវបានរៀបចំ រចនារួចរាល់ហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ