សមាគមអង្គការមិនមែនរដ្ឋាភិបាលខ្វែងគំនិតគ្នា លើច្បាប់ស្តីពីសមាគមអង្គការ
អង្គការសង្គមស៊ីវិលភាគតិចបានសម្តែងការពេញចិត្តចំពោះច្បាប់ស្តីពីសមាគមអង្គការមិនមែនរដ្ឋាភិបាល។ ចំណែកឯអង្គកាសង្គមស៊ីវិលមួយភាគច្រើន បានសម្តែងការមិនពេញចិត្តចំពោះការបញ្ជូនច្បាប់នេះ ទៅកាន់គណៈរដ្ឋមន្ត្រី ដោយពួកគេលើកឡើងថាច្បាប់នេះ ខ្វះតម្លាភាពក្នុងដំណើរការអនុមតិ និងអំពាវនាវឲ្យមានការពិគ្រោះយោបល់ជាសាធារណៈ។
ចុះផ្សាយនៅថ្ងៃ៖
ស្តាប់ - ០២:៤៨
សហព័ន្ធសិទ្ធិមនុស្ស និងអភិវឌ្ឍន៍កម្ពុជា និងសមាគមនិស្សិតខ្មែរ ដែលតំណាងឲ្យអង្គការសង្គមស៊ីវិលប្រមាណជាង ៣០ស្ថាប័ន បានសម្តែងការពេញចិត្តចំពោះសេចក្តីព្រាងច្បាប់ស្តីពី សមាគមអង្គការមិនមែនរដ្ឋាភិបាល ខណៈពេលដែលច្បាប់នេះ ត្រូវបានសម្រេចបញ្ជូនទៅកាន់គណៈរដ្ឋមន្ត្រី។ ក្រុមអង្គការសង្គមស៊ីវិលប្រមាណ ៣០ស្ថាប័ននេះ បានបញ្ហានូវការគាំទ្រ ៥ចំណុច។ នេះបើតាមសេចក្តីថ្លែងការណ៍កាលពីថ្ងៃទី៧ ឧសភា។
តាមរយៈសេចក្តីថ្លែងការណ៍ដដែលបានឲ្យដឹងថា សហព័ន្ធសិទ្ធិមនុស្ស និងអភិវឌ្ឍន៍កម្ពុជា និងសមាគមនិស្សិតខ្មែរ បានស្នើឲ្យអង្គនីតិប្រតិបត្តិ និងអង្គនីតិបញ្ញតិ ជម្រុញការពិភាក្សា និងអនុមតិច្បាប់ស្តីពីសមាគម និងអង្គការមិនមែនរដ្ឋាភិបាល ឲ្យបានឆាប់រហ័ស ដើម្បីជាគុណប្រយោជន៍សម្រាប់ NGOs សមាគមក្នុងប្រទេសកម្ពុជា។ បើតាមចំណុចមួយនៃសេចក្តីថ្លែងការដដែល បានបញ្ជាក់ថា សេចក្តីព្រាងច្បាប់ស្តីពីសមាគម និងអង្គការមិនមែនរដ្ឋាភិបាលនេះ ត្រូវបានក្រសួងមហាផ្ទៃបើកទូលាយឲ្យមានការចូលរួមពិនិត្យ និងផ្តល់យោបល់ច្រើនលើកច្រើនសារជាមួយនឹងស្ថាប័នពាក់ព័ន្ធនានា។
ចំណែកអង្គការសមាគមជាច្រើនទៀត បានសម្តែងការសោកស្តាយចំពោះការសម្រេចបញ្ជូនសេចក្តីព្រាងច្បាប់ស្តីពី សមាគម និងអង្គការមិនមែនរដ្ឋាភិ ទៅកាន់គណៈរដ្ឋមន្ត្រី។ យោងតាមសេចក្តីថ្លែងការណ៍រួម កាលពីថ្ងៃទី៧ ខែមេសា ឆ្នាំ២០១៥ ដែលមានអង្គការសង្គមស៊ីវិលជាតិ និងអន្តរជាតិប្រមាណ ៣០០ស្ថាប័ន បានបង្ហាញការព្រួយបារម្ភរបស់ខ្លួនចំពោះកង្វះតម្លាភាពក្នុងដំណើរការអនុមតិច្បាប់ និងស្នើឲ្យមានការពិគ្រោះយោបល់ជាសាធារណៈ។
យ៉ាងណាមិញ បើតាមលោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រីបានបញ្ជាក់ថា រហូតមកដល់ពេលនេះ គណៈរដ្ឋមន្ត្រីមិនទាន់ទទួលបានសេចក្តីព្រាងច្បាប់ស្តីពី សមាគម និងអង្គការមិនមែនរដ្ឋាភិបាល នៅឡើយទេ។ ហើយលោកបន្តថា ការពិតច្បាប់នេះបានទទួលការឆ្លងមតិយោបល់ពីសង្គមស៊ីវិលម្តងរួចមកហើយ ម្យ៉ាងវិញទៀតគ្មានច្បាប់ណាមួយ ដែលតម្រូវឲ្យសង្គមស៊ីវិលមកអង្គុយជាមួយរដ្ឋាភិបាលក្នុងការចែងច្បាប់នោះទេ។
អ្នកស្រី ចក់ សុភាព នាយកាប្រតិបត្តិមជ្ឃមណ្ឌលសិទ្ធិមនុស្សកម្ពុជា បានថ្លែងតាមរយៈវិចារណកថាព័ត៌មានរបស់ CCHR ថា កម្ពុជាជាប្រទេសមួយ ដែលច្បាប់សំខាន់ៗ នៅតែបន្តអនុមតិដោយគ្មានកិច្ចពីគ្រោះយោបល់ជាមួយសាធារណជនឲ្យបានគ្រប់គ្រាន់។ ថ្វីបើហាក់ដូចជាមានការប្តេជ្ញាចិត្តពីរដ្ឋាភិបាល ក្នុងការបង្កើតដំណើរការប្រជាធិបតេយ្យ ដែលមានតម្លាភាព និងមានការចូលរួម រួមមានការចែកផ្សាយសេចក្តីព្រៀងច្បាប់ កិច្ចពិគ្រោះយោបល់ប្រកបដោយអត្ថន័យជាមួយអង្គការសង្គមស៊ីវិល តែការពិតជាក់ស្តែងបែរជាផ្ទុយទាំងស្រុងទៅវិញ។
សូមបញ្ជាក់ថា ច្បាប់អង្គការសមាគមនេះ ត្រូវបានអង្គការសង្គមស៊ីវិលភាគច្រើនសម្តែងការព្រួយបារម្ភថាអាចនឹងប៉ះពាល់ដល់ការបំពេញតួនាទីរបស់ខ្លួន ហើយសេចក្តីព្រាងច្បាប់នេះក៏ត្រូវបានពន្យារពេល២ឆ្នាំ ក្នុងការអនុម័ត កាលពីឆ្នាំ២០១១៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ