ការចរចាអំពីបញ្ហាអាកាសធាតុចូលដល់ថ្ងៃចុងក្រោយនៅតែមានភាពចម្រូងចម្រាស
ថ្ងៃសុក្រ ទី១០ ធ្នូនេះ ការចរចាស្តីពីបញ្ហាអាកាសធាតុ នៅកង់គូន ប្រទេសម៉ិចស៊ិក បានឈានចូលដល់ថ្ងៃចុងក្រោយទៅហើយ ក៏ប៉ុន្តែ ប្រទេសអ្នកមាន និងប្រទេសអ្នកក្រនៅតែមានគំនិតខ្វែងគ្នា មិនអាចសម្រុះសម្រួលគ្នាបាន។ កាលពីយប់ថ្ងៃព្រហស្បតិ៍ ការចរចាបានប្រព្រឹត្តធ្វើទៅពេញមួយយប់ ដើម្បីព្យាយាមរកចំណុចសម្រុះសម្រួលគ្នាឲ្យបានមុនពេលបិទបញ្ចប់ សន្និសីទ។
ចុះផ្សាយនៅថ្ងៃ៖
ការពន្យល់របស់សេង ឌីណា
ចាប់តាំងពីថ្ងៃទី២៩ វិច្ឆិកា ២០១០មក ប្រទេសជាង ១៩០ បានជួបជុំគ្នា នៅកង់គូន (Cancun) ប្រទេសម៉ិចស៊ិក ដើម្បីចរចាគ្នារកវិធីទប់ទល់នឹងការឡើងកម្តៅនៃភពផែនដី។ ចំណុចសំខាន់នៃការចរចានេះ គឺស្វែងរកកិច្ចព្រមព្រៀងថ្មី ដើម្បីជំនួសពិធីសារក្រុងក្យូតូ ដែលនឹងត្រូវផុតសុពលភាព នៅចុងឆ្នាំ២០១២ខាងមុខ។
ក្រៅពីរឿងបន្តសុពលភាពពិធីសារក្រុងក្យូតូ ការចរចា នៅកង់គូន ផ្តោតលើចំណុចសំខាន់ៗមួយចំនួនផ្សេងទៀត ដូចជា ការទប់ស្កាត់ការកាប់បំផ្លាញព្រៃឈើ និងការជួយដល់ប្រទេសក្រីក្រឲ្យកាត់បន្ថយការបញ្ចេញឧស្ម័នផ្ទះកញ្ចក់ និងប្រុងប្រៀបរៀបចំខ្លួន ដើម្បទប់ទល់នឹងផលវិបាក ដែលបង្កឡើងដោយការឡើងកម្តៅនៃអាកាសធាតុ។
គួររំឭកឡើងវិញថា ឧស្ម័នផ្ទះកញ្ចក់ (តាមភាសាអង់គ្លេស Greenhouse Gas ឬតាមភាសាបារាំង Gaz à effet de serre) គឺជាប្រភេទឧស្ម័ន រួមមានដូចជា ឧស្ម័នកាបូនិក (CO2) និងមេតាន (CH4) ជាដើម ដែលបង្កឲ្យផែនដីឡើងកម្តៅ។
ភាពចម្រូងចម្រាស់ ក្នុងការចរចា នៅកង់គូន កើតឡើងជុំវិញបញ្ហាពីរ៖ ទីមួយ ការស្វែងរកប្រភពហិរញ្ញវត្ថុ ដើម្បីបង្កើតមូលនិធិជួយប្រទេសក្រីក្រ ក្នុងការទប់ទល់នឹងការឡើងកម្តៅនៃភពផែនដី និង ទី២ ការបន្តសុពលភាពនៃពិធីសារក្រុងក្យូតូ។
ប្រទេសអ្នកមានមួយចំនួន ជាពិសេស ជប៉ុន កាណាដា និងរុស្ស៊ី ជំទាស់មិនឲ្យបន្តយន្តការ ដែលមានចែងក្នុងពិធីសារក្រុងក្យូតូតទៅទៀតទេ ដោយលើកហេតុផលថា នៅក្នុងយន្តការក្យូតូនេះ ចិន និងអាមេរិក ដែលជាមេខ្លោងខាងបញ្ចេញឧស្ម័នផ្ទះកញ្ចក់ មិនមានជាប់កាតព្វកិច្ចកាត់បន្ថយការបញ្ចេញឧស្ម័ននេះទេ។ ប្រទេសទាំងនេះទាមទារឲ្យមានចុះកិច្ចព្រមព្រៀងថ្មី ដែលមានលក្ខណៈទន់ភ្លន់ជាងពិធីសារក្រុងក្យូតូ ដើម្បីឲ្យមានការចូលរួមពីសំណាក់ប្រទេសធំៗ ដូចជា អាមេរិក និងចិន ជាដើម។
ផ្ទុយទៅវិញ ប្រទេសកំពុងអភិវឌ្ឍភាគច្រើនទាមទារឲ្យបន្តយន្តការក្យូតូតទៅទៀត ហើយត្រូវឲ្យប្រទេសអ្នកមានបង្កើនការកាត់បន្ថយឧស្ម័នផ្ទះកញ្ចក់ឲ្យ បានច្រើនជាងការចែងក្នុងពិធីសារក្រុងក្យូតូនេះទៀតផង។
ដើម្បីឲ្យការចរចា នៅកង់គូន បញ្ចប់ទៅដោយមានកិច្ចព្រមព្រៀងមួយ គេចាំបាច់ត្រូវឲ្យមានការព្រៀមព្រៀងជាឯកច្ឆន្ទពីសំណាក់ប្រទេសទាំង ១៩១។ ប្រសិនបើមានប្រទេសណាមួយបដិសេធមិនចុះហត្ថលេខា បើទោះជាប្រទេសនោះជាប្រទេសតូចប៉ុណ្ណាក៏ដោយ ក៏កិច្ចព្រមព្រៀងមិនអាចចេញរួចដែរ។
ហេតុដូច្នេះហើយបានជាពេញមួយយប់ថ្ងៃព្រហស្បតិ៍ គេបានធ្វើការចរចាគ្នាពេញមួយយប់ ដើម្បីព្យាយាមសម្រុះសម្រួលគ្នារកចំណុចកណ្តាលមួយ ចៀសវាងកុំឲ្យការចរចាត្រូវបរាជ័យ។ ចំណុច ដែលត្រូវសម្រុះសម្រួលគ្នានេះ គឺនៅជុំវិញរឿងបន្តពិធីសារក្រុងក្យូតូ។ ដោយសារតែបញ្ហាពិធីសារក្រុងក្យូតូនេះ ជារឿងចម្រូងចម្រាស់ខ្លាំង ដើម្បីសម្រុះសម្រួលគ្នា គេប្រហែលជាសម្រេចទុកបញ្ហាពិធីសារនេះដោយឡែកសិន ទុកចរចាគ្នានៅពេលក្រោយទៀត។
គួរបញ្ជាក់ថា ពិធីសារក្រុងក្យូតូ ត្រូវផុតសុពលភាព នៅថ្ងៃទី៣១ ខែធ្នូ ២០១២ ហើយការព្រមព្រៀងបន្តពិធីសារនេះ ត្រូវធ្វើឡើង យ៉ាងយូរបំផុត ៦ខែមុនពេលផុតសុពលភាព។ ដូច្នេះ ប្រទេសហត្ថលេខី នៅមានពេលរហូតដល់ថ្ងៃទី៣០ ខែមិថុនា ឆ្នាំ២០១២ ដើម្បីចរចាគ្នា។ គេអាចលើកយកបញ្ហានេះទៅចរចាឡើងវិញ នៅក្នុងសន្និសីទឆ្នាំក្រោយ ដែលគ្រោងធ្វើ នៅក្នុងប្រទេសអាហ្វ្រិកខាងត្បូង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ