សមាជិកសភាបក្សប្រជាធិបតេយ្យអាមេរិកប្តេជ្ញាបន្តបាតុកម្មប្រឆាំងអាវុធ នៅសភា
នៅសភាអាមេរិក ថ្ងៃព្រហស្បតិ៍២៣មិថុនានេះ សមាជិកសភាបក្សប្រជាធិបតេយ្យជាច្រើនរូបបានប្តេជ្ញាចិត្តបន្ត អង្គុយធ្វើបាតុកម្មប្រឆាំងអាវុធ តទៅទៀត។ បាតុកម្មនេះមានការគាំទ្រពេញទំហឹងពីប្រធានាធិបតីអូបាម៉ា។ បក្សប្រជាធិបតេយ្យធ្វើបាតុកម្មនេះឡើង តាំងពីថ្ងៃពុធមក ក្រោយសភាមិនព្រមអោយមានការបោះឆ្នោតលើសំណើច្បាប់រឹតបន្តឹងការ ប្រើប្រាស់អាវុធ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៥
១០ថ្ងៃក្រោយភេរវកម្មនៅOrlando រដ្ឋFloride សមាជិកសភាបក្សប្រជាធិបតេយ្យអាមេរិកបាននាំគ្នាអង្គុយបាតុកម្មនៅសភា តវ៉ាចំពោះការដែលសភាមិនអនុញ្ញាតអោយមានការបោះឆ្នោតលើសំណើច្បាប់រឹតបន្តឹងការប្រើប្រាស់អាវុធ។
សំណើច្បាប់គ្រប់គ្រងអាវុធរបស់បក្សប្រជាធិបតេយ្យអាមេរិកមាន២ចំនុច៖ ទី១- គឺ ត្រួតពិនិត្យអតីតភាពរបស់អតិថិជន ទោះជាការលក់អាវុធត្រូវធ្វើនៅតាមអ៊ីនថឺនេតក៏ដោយ។ ទី២ គឺហាមឃាត់មិនអោយលក់អាវុធដល់ដៃជនដែលស្ថិតក្រោមការឃ្លាំមើលភេរវកម្ម ពីអាជ្ញាធរ។ លោកប៉ូល រ៉ាយយ៉ាន់ ជាប្រធានសភា មកពីបក្សប្រឆាំងសាធារណរដ្ឋ ក៏ដូចជាសមាជិកសភាបក្សសាធារណរដ្ឋជំទាស់ដាច់ខាតមិនអោយប៉ះពាល់សិទ្ធិកាន់អាវុធ ចែងក្នុងរដ្ឋធម្មនុញ្ញឡើយ។
ទោះយ៉ាងនេះក្តី សមាជិកសភាបក្សប្រជាធិបតេយ្យសន្យាមិនបោះបង់ជនរងគ្រោះក្នុងហិង្សាភេរវកម្មនៅរង្គសាលអ្នកស្រលាញ់ភេទដូចគ្នា នៅOrlando កាលពីយប់ថ្ងៃ១១មិថុនាទេ។ ភេរវកម្មថ្ងៃ១១មិថុនា បានសម្លាប់មនុស្ស៤៩នាក់ ធ្វើអោយបក្សប្រជាធិបតេយ្យរបស់លោកអូបាម៉ាដាក់សំណើច្បាប់ជាច្រើន ក្នុងទិសដៅរឹតបន្តឹងអាវុធ ទៅអោយសភា។
ពេលនេះ សមាជិកសភាបក្សប្រជាធិបតេយ្យបានទាមទារអោយថ្នាក់ដឹកនាំបក្សសាធារណរដ្ឋលុបចោលថ្ងៃសម្រាកបុណ្យជាតិ ៤កក្កដាខាងមុខ ព្រោះថា សម្រាប់បុណ្យជាតិ៤កក្កដា សភាមានពេលសម្រាកការងារ២សប្តាហ៍។ បក្សប្រជាធិបតេយ្យចង់អោយសភាយកពេលសម្រាកនេះ មកជជែកពីច្បាប់គ្រប់គ្រងអាវុធវិញ។ ប៉ុន្តែ ប្រធានសភាបានបដិសេធ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ